ކުރީގެ ރައީސް ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމް ހައިކޯޓުގައި އިސްތިއުނާފު ކުރިތާ ގިނަ ދުވަސްތަކެއް ވެގެން ގޮސްފައިވާއިރު އަދިވެސް އެމައްސަލަ ތާވަލް ނުކުރާތީ ޕީޕީއެމްގެ ލީޑާޝިޕް ބޭފުޅުން މިއަދު ހައިކޯޓަށް ވަޑައިގެންފިއެވެ.

ވ. އާރަށުގެ މައްސަލައިގައި ރައީސް ޔާމީންގެ މައްޗަށް ވަނީ ރިިޝްވަތު ގަބޫލުކުރުމާއި މަނީ ލޯންޑަރިންގ ދައުވާ ސާބިތުވެ، 11 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރުމަށް ހުކުމްކުރީ މިދިޔަ ޑިސެމްބަރުމަހުގެ 25 ވަނަ ދުވަހުއެވެ.

މި މައްސަލަ ޔާމީންގެ ފަރާތުން ކޯޓުގައި އިސްތިއުނާފްކުރީ ފެބްރުއަރީމަހުގެ 21 ވަނަ ދުވަހުއެވެ. ނަމަވެސް މައްސަލައިގައި ހުރި ބައެއް ކަންކަން އިސްލާހުކުރުމަށް އެންގުމުން، އެކަންކަން އިސްލާހުކުރުމަށްފަހު މައްސަލަ ވަނީ އަލުން ހައިކޯޓަށް ހުށަހަޅާފައެވެ. މިހާރު މައްސަލަ ވަނީ ހައި ކޯޓުން ބަލައިވެސް ގަނެފައެވެ.

ހައިކޯޓަށް މިއަދު ވަޑައިގެންނެވި ބޭފުޅުންގެ ތެރޭގައި އިސްކޮށް ހުންނެވީ އިދިކޮޅު ޕީޕީއެމް، ޕީއެންސީ ކޯލިޝަން ހިންގުމާ ހަވާލުވެވަޑައިގެން ހުންނެވި ޕީއެންސީގެ ރައީސް އަބްދުއްރަހީމްއެވެ. ހައިކޯޓަށް ވަޑައިގަތުމަށްފަހު ނޫސްވެރިންނާ ބައްދަލުކުރައްވާ އަބްދުއްރަހީމް ވިދާޅުވީ އެ ބޭފުޅުން ހައިކޯޓަށް ވަޑައިގެންނެވީ ރައީސް ޔާމީންގެ މައްސަލަ ކޯޓުގައި ކުރިއަށް ނުދާތީއެވެ. އަދި އެ މައުލޫމާތު ސާފުކުރުމަށް ހައިކޯޓުގެ ރަޖިސްޓްރާއާ ބައްދަލުކުރުމަށް މަސައްކަތް ކުރި ނަމަވެސް އެކަން ކާމިޔާބު ނުވި ކަމުގައިވެސް ވިދާޅުވިއެވެ.

ކޯޓުތަކަށް ހުށަހަޅާ މައްސަލަތަކުގައި މައްސަލައިގެ ދެ ހަސްމުން ފިޔަވާ އެހެން ބަޔަކާ މައްސަލައާ ގުޅޭގޮތުން ކޯޓުތަކުގެ ކަމާ ގުޅޭ ބޭފުޅުން އާންމު ގޮތެއްގައި ބައްދަލެއް ނުކުރައްވައެވެ. އަބްދުއްރަހީމް އިތުރަށް ރައީސް ޔާމީނަކީ އިދިކޮޅު ރިޔާސީ ކެންޑިޑޭޓަށްވީތީ އެމަނިކުފާނުގެ މައްސަލަ ހާއްސަ އިސްކަމެއް ދީގެން ބަލަންޖެހޭނެއެެވެ. އެމައްސަލަ ކުރިއަަށް ނުދަނީ ސަރުކާރުގެ ނުފޫޒާ ހެދި ކަމަށްވެސް ތުހުމަތުކުރެއްވިއެވެ.

ވ. އާރަށުގެ މައްސަލައިގައި ކުރީގެ ރައީސް ޔާމީންގެ އިތުރުން، ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމުގެ މައްޗަށްވެސް ވަނީ ކުށް ސާބިތުވެ، 3 އަހަރާއި 2 މަހާއި 12 ދުވަހަށް ޖަލަށްލުމަށް ހުކުމްކޮށްފައެވެ.