ސިއްހީ ދާއިރާގެ ޚިދުމަތްތެރިންގެ އުޖޫރަ އަށް ގެނެސްދެއްވި ހެޔޮ ބަދަލާއި ކުރިމަގު ތަނަވަސްކޮށްދެއްވިކަމަށްޓަކައި އެ ޚިދުމަތްތެރިންގެ ނަމުގައި ހެލްތް މިނިސްޓަރު އަހްމަދު ނަސީމް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހްއަށް ޝުކުރު ދަންނަވައިފިއެވެ.
މިނިސްޓަރު ރައީސްއަށް ޝުކުރު ދަންނަވާ ޓްވީޓް ކުރައްވާފައިވަނީ ސިއްހީ ދާއިރާގެ މުވައްޒަފުންގެ މުސާރަ މާދަމާ އިން ފެށިގެން ބޮޑުކުރަން ރައީސް އިބްރާހީމް މުހައްމަދު ޞާލިހު މިއަދު ނިންމުމާ ގުޅިގެންނެވެ.
ސިއްހީ ދާއިރާގެ މުވައްޒަފުންގެ މުސާރަ އަށް ގެނައި ބަދަލަށް ބަލާ އިރު، ރެޖިސްޓަޑް ނަރުހެއްގެ މުސާރަ މިހާރު ވަނީ 29،271ރ. އަށް ބޮޑުކޮށްފަ އެވެ. ސްޕެޝަލިސްޓް ނަރުހެއްގެ މުސާރަ ވަނީ އިތުރު ގަޑީގެ އެލަވަންސް ނުލައި 41،976ރ. ރުފިޔާ އަށް ބޮޑުކޮށްފަ އެވެ.
ސީނިއަ މެޑިކަލް އޮފިސަރަކަށް އިތުރު ގަޑީގެ އެލަވަންސާ އެކު ލިބެމުން އައީ އެވްރެޖްކޮށް މަހަކު 28،727ރ. ކަމަށް ވިޔަސް އިތުރު ގަޑީގެ އެލަވަންސާ ނުލައި އެވްރެޖްކޮށް ދެން މަހަކު 41،541ރ. ލިބޭނެ އެވެ. ސަބް ސްޕެޝަލިސްޓް ކޮންސަލްޓަންޓުންގެ އެންމެ މަތީ ގިންތީގެ މުސާރައަށް މިހާރު ވަނީ އިތުރު ގަޑީގެ އެލަވަންސް ނުލައި 98،137ރ. އަށް ބޮޑުކޮށްފަ އެވެ.
ސޯޝަލް ވޯކަރަކަށް މީގެ ކުރިން އިތުރު ގަޑީގެ އެލަވަންސާ އެކު ލިބެމުން އައީ އެވްރެޖްކޮށް މަހަކު 12،944ރ. ނަމަވެސް މުސާރަ އަށް ގެނައި ބަދަލާ އެކީ އިތުރު ގަޑީގެ އެލަވަންސާ ނުލައި އެވްރެޖްކޮށް ދެން މަހަކު 21،585ރ. ރުފިޔާ ލިބޭނެ އެވެ.
ރައީސް ވިދާޅުވި ގޮތުގައި ޞިއްޙީ ދާއިރާގެ މުވައްޒަފުންގެ މުސާރައަށް މިގެންނަ ހެޔޮ ބަދަލާއި ސަރުކާރުގެ ވުޒާރާތަކުގައި 35 ޕަސެންޓް އެލަވަންސް ނުލިބި ތިބި މުވައްޒަފުންނަށް ލިބޭ އެލަވަންސާ އެކު، ޖުމްލަ 9،838 މުވައްޒަފުންގެ މުސާރައަށް ހެޔޮބަދަލެއް އަންނާނެ އެވެ. ކަމަށެވެ. މި ހުރިހާ ބަދަލަކަށް، އަހަރަކު ގާތްގަނޑަކަށް 482 މިލިއަން ރުފިޔާ ދައުލަތުގެ ބަޖެޓުން ހޭދަވާނެ ކަމަށް ވެސް ވިދާޅުވި އެވެ.
