ޗާގޮސް މައްސަލައިގައި މޮރޮޝިއަސް އާއި ރާއްޖޭގެ އިން ކަނޑައެޅިގެން ދިއުމަކީ ދެމެހެއްޓެނިވި މަސްވެރިކަމެއް ކުރުމަށް އެޅުނު ބިންގަލެއް އެންވަޔަރަމެންޓް މިނިސްޓްރީއިން ބުނެފިއެވެ.

އެންވަޔަރަމަންޓް މިނިސްޓްރީން ނެރުނު ބަޔާނެއްގައި ބުނެފައިވަނީ، އިންޓަރނޭޝަލް ޓްރައިބިއުނަލް ފޯރ ދަ ލޯ އޮފް ދަ ސީ (އިޓްލޮސް) ގެ ނިންމުމާއެކު ރާއްޖެ ވަނީ ބައިނަލްއަގުވާމީ ޤާނޫނުތަކާއި އެއްގޮތަށް ފުރިހަމައަށް އިން ވަކިކުރެވިފައިވާ ޤައުމަކަށް ވެފައިކަމަށެވެ. އެންވަޔަރަމަންޓް މިނިސްޓްރީގެ ބަޔާނުގައި، ޗާގޯސްގެ މެރިން ރިޒާވްއަކީ ދުނިޔޭގެ ނިސްބަތުން ޤުދުރަތީ ދިރުންތައް އެންމެ މުއްސަންދި އެއް ސަރަޙައްދުކަމަށެވެ. އެގޮތުން ޗާގޯސްގެ 7 އަތޮޅާއި 70 ރަށް ހިމެނޭގޮތަށް ވަށައިގެންވާ ކަނޑުގެ 640،000 ސްކެއަރ ކިލޯމީޓަރުގެ ސަރަޙައްދަކީ 2010 ވަނަ އަހަރުން ފެށިގެން މެރިން ރިޒާވެއް ގޮތުގައި ހިމާޔަތްކޮށްފައިވާ ސަރަޙަދެއްކަމަށް އެންވަޔަރަމަންޓް މިނިސްޓްރީގެ ބަޔާނުގައި ފާހަގަކުރައްވާފައިވެއެވެ.

އަދި ޗާގޯސްގެ އުތުރުން އޮތް ސަރަހައްދަކީ ޙިމާޔަތްކޮށްފައިވާ ކަނޑުގެ ސަރަޙައްދަކަށް މޮރީޝަސްއިން ނިންމާނެކަމަށް އެޤައުމުން ވަނީ ހާމަކޮށްފައެވެ. މިކަމާއި ގުޅިގެން މިނިސްޓްރީން ވަނީ އަލަށް ޙިމާޔަތްކުރާ ސަރަޙަދުގެ ސަބަބުން ކަނޑުގެ ދިރުންތައް އާލާވެ ދެމެހެއްޓެނެވި ގޮތެއްގައި މަސްވެރިކަން ކުރުމަށް ރާއްޖެއަށްވެސް އެހީއަކަށް ވާނެކަމަށެވެ. އަދި އޭގެ ސަބަބުން ރާއްޖޭގެ ސަލާމަތާއި ރައްކާތެރިކަމާއި، ކަނޑުގެ ދިރުންތައް ދެމެހެއްޓެނިވި ގޮތެއްގައި ހިމާޔަތްކޮށް ދެމެހެއްޓުމަށް ސަރުކާރުން ކުރަމުންދާ މަސައްކަތްތަކަށްވެސް އިތުރު ކުރިއެރުމެއް ލިބޭނެކަން މިނިސްޓްރީގެ ބަޔާނުގައި ފާހަގަކުރައްވާފައިއެވެ.

ޗާގޯސްގެ ހިމާޔަތްކުރެވިފައިވާ ސަރަޙައްދާއި އަދި ރާއްޖޭގެ ސަރަޙައްދުން ހިމާޔަތްކުރެވޭ ސަރަޙައްދުތައް ގުޅިގެން އުފެދޭ ސަރަޙައްދުތައް ވެގެންދާނީ އިންޑިއާ ކަނޑުގެ ދިރުންތައް އާލާވުމަށް މަގުފަހިކޮށްދޭނެ އަދި އޭގެ ސަބަބުން ދިވެހިރާއްޖޭގެ މަސްވެރިކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް އެޅޭ މުހިއްމު ބިންގަލަކަށް.

– އެންވަޔަރަމަންޓް މިނިސްޓްރީގެ ބަޔާނުގައި ބުނެފައިވެއެވެ.

އެންވަޔަރަމަންޓް މިނިސްޓްރީން ބުނީ އިޓްލޮސްގެ ނިންމުމަކީ 'ހައި އެމްބިޝަން ކޯލިޝަން' އަދި 'ގްލޯބަލް އޯޝަންސް އެލިއަންސް' އިން ދުނިޔޭގެ ކަނޑުތަކުގެ 30 އިންސައްތަ އަކީ ހިމާޔަތްކުރެވިފައިވާ ތަންތަނުގެ ގޮތުގައި ހަމަޖެއްސުމަށް ކުރިއަށް ގެންދާ ކޮންވެންޝަން އޮން ބަޔޮލޮޖިކަލް ޑައިވަރސިޓީ ގެ ގްލޯބަލް ބަޔޯޑައިވަރސިޓީ ފްރޭމްވޯކް ގައިވާ ލަނޑުދަނޑި ހާސިލްކުރުމަށް ލިބުނު ބާރެއްކަމުގައެވެ. އަދި ފާއިތުވި އަހަރުތެރޭގައި ދުނިޔޭގެ ކަނޑުތަކުގެ ދިރުން ހިމާޔަތްކުރުމަށް ހައިސީސްގައި ވެށި ޙިމާޔަތްކުރުމަށް ވެވުނު އެއްބަސްވުމަށްވެސް ލިބޭނެ ބާރަކަށްވެގެންދާނެކަމަށް މިނިސްޓްރީން ބުނެފައިވެއެވެ.

ދިވެހި ސަރުކާރާއި ބައިނަލްއަގުވާމީ ޖަމްއިއްޔާއެއް ކަމުގައިވާ ބްލޫ ޕްރޮސްޕެރިޓީ ކޯލިޝަނާއެކު ވެފައިވާ އެއްބަސްވުމެއްގެ ދަށުން ފަށާފައިވާ "ނޫ ރާއްޖެ" މަޝްރޫއަށް އަލިއަޅުވާލަމުން މިނިސްޓްރީއިން ބުނެފައިވަނީ އެ މަޝްރޫއުގެ ދަށުން މިހާރު ކުރެވެމުންދާ މަސައްކަތުގެ ތެރެއިން ސައިންޓިފިކް މައުލޫމާތުގެ އަލީގައި މެރިން ސްޕޭޝަލް ޕްލޭނެއް ހެދިގެންދާނެ ކަމަށެވެ.

ޗާގޯސްގެ ހިމާޔަތްކުރެވިފައިވާ ސަރަހައްދާއި އަދި ރާއްޖޭގެ ސަރަހައްދުން ހިމާޔަތްކުރެވޭ ބައި ގުޅިގެން އުފެދޭ ސަރަހައްދުތައް ވެގެންދާނީ އިންޑިޔާ ކަނޑުގެ ދިރުންތައް އާލާވުމަށް މަގުފަހިކޮށްދޭނެ އަދި އޭގެ ސަބަބުން ދިވެހިރާއްޖޭގެ މަސްވެރިކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް އެޅޭ މުހިއްމު ބިންގަލަކަށް ކަމަށް މިނިސްޓްރީއިން ބުނެއެވެ.