އައްޑޫގައި މޯލްޑިވްސް ކޮރަލް އިންސްޓިއުޓުން ބާއްވާ ކޮރަލް ފެސްޓިވަލްގައި ބައިވެރިވެ ވަޑައިގެންނެވުމަށް ވަޑައިގެންނެވި ސީޝެލްސްގެ އެންވާރުމަންޓް މިނިސްޓަރަށް ސަރުކާރުން އިހުތިރާމް އަދާނުކުރުމުން ހުޅުދޫ ދާއިރާގެ މެމްބަރު އިލްޔާސް ލަބީބުގެ ފާޑުކިޔުން ސަރުކާރަށް އަމާޒުވެއްޖެއެވެ.
އައްޑޫގައި މޯލްޑިވްސް ކޮރަލް އިންސްޓިއުޓުން ބާއްވާ ކޮރަލް ފެސްޓިވަލް ޝަރަފްވެރި ކޮށްދެއްވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. ނަޝީދާއިއެކު އެމަނިކުފާނަށް ތާއީދުކުރާ މަޖިލިސް މެމްބަރުންވެސް ތިބީ އައްޑޫގައެވެ. މިފެސްޓިވަލްގައި ބައިވެރިވުމަށް ދައުލަތުގެ އެއްވެސް ވަޒީރަކު ވަޑައިގެންފައި ނުވެއެވެ.
މިފެސްޓިވަލުގައި ބައިވެރިވުމަށް ވަޑައިގެންނެވި ސީޝެލްސްގެ އެންވާރުމަންޓް މިނިސްޓަރ އަށް ސަރުކާރުން އަދަބު އިހުތިރާމު ނުކުރާކަމުގެ ކަންބޮޑުވުން މެމްބަރު އިލްޔާސް ވަނީ ފާހަގަކުރައްވާފައެވެ. އަދި މިކަމަކީ ސަރުކާރުން ރައީސް މުހައްމަދު ނަޝީދުދެކެ ހިތްހަމަ ނުޖެހިގެންވެސް ކޮށްގެންވާނެފަދަ ކަމެއް ނޫންކަމަށް އިލްޔާސް ފާހަގަކުރެއްވިއެވެ.
މުހައްމަދު ނަޝީދަށް އޮންނަ ޒާތީ ތަޢަށްސުބުގެ ބޮޑުކަމުން އައްޑޫ ސިޓީ ގައި މިހާރު ކުރިއަށްދާ އެމްސީސީއައިގެ ކޮރަލް ފެސްޓިވަލުގައި ބައިވެރިވެ ވަޑައިގަތުމަށް އައްޑޫގައި މިވަގުތު ހުންނެވި ސީޝެލްސްގެ އެންވާރުމަންޓް މިނިސްޓަރ އަށް ސަރުކާރުން އަދަބު އިހުތިރާމު އަދާކުރައްވާފައި ނެތުން މިއީ ބަލައިގަނެވޭނެ ކަމެއްނޫން.
– އިލްޔާސް ލަބީބް ވިދާޅުވިއެވެ.
Very pleased to welcome Flavien Joubert, Minister for Agriculture, Climate Change & Environment of #Seychelles to Addu City for the @MaldivesCoral Coral Festival 2023 #BlueDepartment pic.twitter.com/1iEkdxaWCR
— Mohamed Nasheed (@MohamedNasheed) April 29, 2023
ދުނިޔޭގެ މަޝްހޫރު މުރަކައިގެ ތަޖުރިބާކާރުންނާއި ސައިންޓިސްޓުން ފެސްޓިވަލްގައި ބައިވެރިވެފައިވެއިވެއެވެ. އަދި ރާއްޖޭގެ އަމިއްލަ ޖަމިއްޔާތަކާއި ސިޔާސީ ލީޑަރުންނާއި އާންމުން ވެސް ފެސްޓިވަލްގައި ބައިވެރިވެއެވެ. މިފެސްޓިވަލްގައި ވޯކްޝޮޕްތަކުގެ އިތުރުން މިއުޒިކާއި ދެކުނުގެ ހާއްސަ ކެއުންތައް ވެސް އޮންނާނެއެވެ. އަދި ކުޑަކުދިންނަށް ހާއްސަކޮށް ބާއްވާ ކުޅިވަރުތައް ވެސް ފެސްޓިވްލްގައި ކުރިއަށް ދާނެއެވެ.
މޯލްޑިވްސް ކޮރަލް އިންސްޓިޓިއުޓުން ފުރަތަމަ ކޮރަލް ފެސްޓިވަލް ބޭއްވީ 2020 ވަނަ އަހަރު ކ. ތުލުސްދޫގަ އެވެ.
