މިހާތަނަށްވެސް އުޅެފައިވާނީ އަބުރުވެރިކަމާއެކު ކަމަށާއި، ދައުލަތުން ހެކި ހުށައަޅާފައިވަނީ އަބުރު ނަގާލުމުގެ ގޮތުންކަމަށް ކުރީގެ ރައީސް ޔާމީނު ވިދާޅުވެއްޖެއެވެ.

ފުއްގިރީގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުލާފައިވަނީ ރިޝްވަތު ޤަބޫލުކުރުމާއި މަނީ ލޯންޑަރިންގގެ ދައުވާއެވެ. އެގޮތުން ރިސޯޓެއްގެ ގޮތުގައި ރ. ފުއްގިރި ތަރައްޤީކުރަން ކުއްޔަށް ދޫކުރުމުގެ މުޢާމަލާތުގައި މަޤާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯއްދަވާފައިވާކަމަށް ދަޢުލަތުން ތުހުމަތުކުރެއެވެ.

މިމައްސަލައިގެ މިއަދުގެ އަޑު އެހުމަކީ މައްސަލައިގެ ޝަރީއަތް ފެށުމަށް ބޭއްވި އަޑު އުހުމެވެ. މިޝަރީއަތް ކުރިއަށް ގެންގޮސްފައިވަނީ އޮންލައިންކޮށެވެ. ނަމަވެސް ރައީސް ޔާމީންގެ މައްޗަށް އުފުލާފައިވާ ދައުވާތައް ސާބިތު ކުރުމަށް ދައުލަތުން ހުށަހެޅި ހެކިތަކާއި ގުޅޭގޮތުން ސްޕްރީމް ކޯޓަށް ހުށަހަޅާފައިވާ މައްސަލަ އޮތުމުން ޝަރީއަތް ފެށުން ވަނީ ފަސްކުރަން ޖެހިފައެވެ. ރައީސް ޔާމީންގެ ވަކީލުން ވަނީ މިމައްސަލާގައި ސްޕްރީމް ކޯޓުން ވަކި ގޮތެއް ކަނޑައަޅަންދެން އަޑުއެހުންތައް މަޑު ޖައްސާލުމަށް އެދިވަޑައިގެންފައެވެ. ޝަރީއަތް މަޑު ޖައްސާލެއްވުމަށް ދައުލަތުންވެސް ދެކޮޅެއް ނުހައްދަވައެވެ.

ނަމަވެސް މައްސަލަ ބައްލަވާ ޤާޟީ ޢަލީ ނަސީމް ވިދާޅުވީ އިސްތިއުނާފް ކޮށްފައިވާ ދެ ނުކުތާއަކީވެސް މި ޝަރީއަތަށް އަސަރު ކުރާނެ ދެކަމެއް ނޫންކަމަށެވެ. އަދި ޝަރީއަތް މަޑުޖައްސާލަން ޖެހޭ ފަދަ ސަބަބެއް އޮތްކަމަށް ދެކެވަޑައި ނުގަންވާކަމަށް ޤާޟީ ވިދާޅުވިއެވެ. ޤާޞީ ވަނީ މިމައްސަލަ ކޯޓަށް ހުށަހެޅިފައިވާތާ ތިން އަހަރު ވެފައިވާއިރު، އިފްތިތާޙީ ބަޔާން ތައްޔާރު ނުކުރެވުނީ ކީއްވެތީ ސުވާލު ކުރައްވާފައެވެ. އަދި ދެން އޮންނަ އަޑު އެހުމެއްގައި އިފްތިތާޙީ ބަޔާން ނެގުމުގެ މަރުހަލާ ކުރިއަށް ގެންދަވާނެކަމަށް ޤާޟީ ވިދާޅުވިއެވެ.

މިއަޑު އެހުމުގައި ރައީސް ޔާމީން ވިދާޅުވީ އަވަސް އަރުވާލައިގެން ޝަރީއަތް ކުރިއަށް ނުގެންގޮސް، ވަކީލުންނާއިއެކު ބައްދަލުކޮށް މަޝްވަރާ ކުރެވޭނެ އެކަށީގެންވާ ވަގުތު ދެއްވުމަށް އެދިވަޑައިގެންފައެވެ. އަދި މިމައްސަލައިގައިވެސް އެމަނިކުފާނަށް ކުރަމުންދާ ތުހުމަތުތަކަކީ އިންސާފުން ބޭރުން ކޮށްފައިވާ ތުހުމަތުތަކެއްކަން ދިވެހި ރައްޔިތުންނަށް ހާމަކޮށްދެއްވަން ބޭނުންވާ ކަމަށާއި، ޝަރީއަތް ލައިވް ކޮށްދެއްވުމަކީ ވަރަށް ބޮޑު އެދުމެއްކަމަށެވެ.

އެއްވެސް ކަމެއް މުތާލިއާ ކުރުމަށް ފުރުސަތެއް ނުލިބޭ، މި ރޯދަ މަހު އަޅުގަނޑަށް ވަކީލު ބައްދަލުވުން ލިބުނީ އެންމެ ދުވަހަކު، ކަރެކްޝަންސް އިން ހަމަޖައްސައިދެނީ ވެސް ދުވާލަކަށް އެންމެ ދެ ގަޑިއިރު، އެހެންވެ އެކަމަށް އެކަށީގެންވާ ވަގުތު ނުލިބޭ، ވަގުތު ބޭނުންވޭ އެބަ. އަޅުގަނޑަކީ އެތައް ހާސް ރައްޔިތެއްގެ ހައްގުތައް އުފުލާ މީހަކަށް ވާތީވެ ތަކުރާރުކޮށް މި ދަންނަވަނީ، ހެކިބަސް ނަގާ ނެގުން ހާއްސަކޮށް ލައިވްކުރަން.

– ޔާމީން ވިދާޅުވިއެވެ.

ރައީސް ޔާމީންގެ ވާހަކަތަކާއި ގުޅިގެން ޤާޟީ ނަދީމް ވިދާޅުވީ ހެކިބަސް ނެގުމުގެ އަޑު އެހުންތައް ލައިވް ނުކުރައްވާނެކަމަށެވެ. ސަބަބަކީ ހެއްކަށް ނުފޫޒު ފޯރުވުމުގެ ފުރުސަތު އޮތުމުންކަމަށެެ. ނަމަވެސް ހެކިބަސް ނަގާ ނިންމުމަށްފަހު އަޑުއެހުންތައް ލައިވް ކުރައްވަން ނިންމަވާފައިވާކަމަށް ޤާޟީ ވިދާޅުވިއެވެ. މިމައްސަލައިގެ އަޑު އެހުމެއް ބޭއްވުމަށް ދެން ތާވަލް ކޮށްފައިވަނީ މިމަހުގެ 30 ވަނަ ދުވަހުއެވެ.

މި މައްސަލާގައި ދެން ދައުވާކޮށްފައިވާ މއ.ކުރިކީލަހިޔާ އަހުމަދު ކްރިކް ރިޒާއާއި، ސަން ކޮންސްޓްރަކްޝަން އެންޑް އިންޖިނިއަރިން ކުންފުންޏާއި ސަން އިންވެސްޓްމަންޓް ކުންފުނިން ވެސް ހެކިތަކާ ގުޅޭ ގޮތުން ދަށު ކޯޓުން ނިންމި ބައެއް ނިންމުންތައް ހައި ކޯޓުގައި އިސްތިއުނާފު ކުރިއެވެ. އޭގެ ތެރޭގައި އެ ދެ ފަރާތުން އެދިފައިވާ ހެކި ރައްކާތެރި ކުރުމުގެ އަމުރު ނެރެދެވެން ނެތް ކަމަށް ކްރިމިނަލް ކޯޓުން ނިންމި ނިންމުން ވެސް ހިމެނެއެވެ. ހައި ކޯޓުގެ މަރުހަލާގައި، އެ މައްސަލާގައި ވެސް ނިންމާފައިވަނީ ދަށު ކޯޓުގެ ނިންމުން ދެމެހެއްޓުމަށެވެ. އެ ނިންމުންތައް ވެސް ވަނީ ސުޕްރީމް ކޯޓުގައި އިސްތިއުނާފްކޮށްފައެވެ.

ޕީޕީއެމްގެ ރިޔާސީ ކެންޑިޑޭޓް ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެއީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި ކަމަށް ކްރިމިނަލް ކޯޓުގައި ސާބިތުވެއްޖެ ކަމަށް ކަނޑައެޅުމަށް ފަހުގަ އެވެ. އެ މައްސަލަ ވެސް ވަނީ ހައި ކޯޓުގައި އިސްތިއުނާފުކޮށްފައެވެ. ޖަލު ހުކުމް ދެމިއޮތްހާ ހިނދަކު ރިޔާސީ އިންތިހާބުގައި ވާދަކުރުމުގެ ފުރުސަތު ޔާމީނަކަށް ނެތެވެ.