22 އަހަރުވީ އަންހެން ޖޫނިއާ 100 މީޓަރު ދުވުމުގެ ރިކޯޑު ޖެެމެއިކާގައި ތަމްރީނު ހަދަމުން އަންނަ މަރިޔަމް ރޫޔާ އަލީ މުގުރާލައިފިއެވެ.
އުމުރުން 17 އަހަރުގެ ރޫޔާ ރިކޯޑު ހަދާފައިވަނީ ޖެމެއިކާގެ ކިންގްސްޓަންގައި ކުރިއަށްދިޔަ "ވެލޯސިޓީ ފެސްޓް" މުބާރާތުގައި 12.21 ސިކުންތުން ރޭސް ނިންމައިގެންނެވެ. މީގެ ކުރިން މި ރިކޯޑު އޮތީ 2001 ވަނަ އަހަރު ވޯލްޑް ޖޫނިއާ ޗެމްޕިއަންޝިޕުގައި ދުވުނު ޝަމްހާ އަޙްމަދުގެ އަތުގައެވެ. ޝަމްހާ އެ ފަހަރު ރިކޯޑު ހަދާފައިވަނީ 12.27 ސިކުންތުންނެވެ. އެެހެންކަމުން ރޫޔާ ރިކޯޑު މުގުރާލީ 0.06 ސިކުންތުގެ ތަފާތަކުންނެވެ.
މިދިޔަ އަހަރު އިނގިރޭސިވިލާތުގެ ބާމިންހަމުގައި ބޭއްވި ކޮމަންވެލްތު ގޭމްސް އާއި ތުރުކީވިލާތުގެ ކޮންޔާގައި ބޭއްވި އިސްލާމިކް ސޮލިޑާރިޓީ ގޭމްސްގައި ވާދަކުރި ރޫޔާ ޖެެމެއިކާގައި މިހާރު ތަމްރީނު ހަދަމުން އަންނަނީ ބޭންކް އޮފް މޯލްޑިވްސް (ބީއެމްއެލް) އިން ތަނަވަސްކޮށްދިން ސްކޮލަޝިޕެއްގެ ދަށުންނެވެ.
ކޮމަންވެލްތު ގޭމްސް އާއި އިސްލާމިކް ސޮލިޑާރިޓީ ގޭމްސްގެ އިތުރުން ރޫޔާ ވަނީ މި އަހަރުގެ ފެބްރުއަރީ މަހު ކަޒަކިސްތާނުގައި އޮތް 10 ވަނަ އޭޝިއަން އިންޑޯ އެތުލެޓިކްސް ޗެމްޕިއަންޝިޕުގައި ވާދަކޮށްފައެވެ. އެ މުބާރާތުގައި ރޫޔާ ވަނީ 60 މީޓަރު ދުވުމުގައި ވާދަކޮށް އަހުނާ ނިޒާރު ހެދި ރިކޯޑު މުގުރާލާފައެވެ.
