ޅ. ނައިފަރުގެ މިސްކިތްތަކުގައި ފާއިތުވެދިޔަ ރޯދަ މަހު ހިފުޒުކޮށް، ތަރާވީހު ނަމާދާއި ދަމު ނަމާދުކޮށްދިން އެރަށުގައި ހުންނަ މަދަރުސަތުލް އިފްތިތާޙު ސްކޫލްގެ ދަރިވަރުންގެ އަގު ވަޒަން ކޮށްފިއެވެ.

ނައިފަރުގެ ހިފްޒު ކްލާހުގައި ކިޔަވައި، އެ ރަށު މަދުރަސަތުލް އިފްތިތާހުގެ ދަރިވަރުންގެ ތެރެއިން އިމާމުވެ ތަރާވީހު ނަމާދާއި ދަމު ނަމާދު ކޮށްދެވޭ ވަރަށް ތަމްރީނު ކުރެވޭ ކުދިން ކަނޑައަޅަ އެވެ. އުމުރުން 11 އަހަރާއި 13 އަހަރާ ދެމެދުގެ ކުދިންތަކަކަށް، ރަށު ކައުންސިލްގައި އެދިގެން އެ ފުރުސަތު ދެއެވެ.

އެކުދިންގެ އަގު ވަޒަންކޮށް ހަނދާނީ ފިލާ ދީފައި ވަނީ އިއްޔެ އީދު ނަމާދަށް ފަހުއެވެ. އެގޮތުން، އިމާމުވެ ނަމާދުކުރި ކޮންމެ ދަރިވަރަކަށް 3،500ރ. ވެސް ދީފައި ވެއެވެ.

އިމާމުވެ ނަމާދުކުރި ދަރިވަރުން:

1. އާސިރު އާސިފް ޔޫސުފް

2. ހަޔާން ހަމީޒު

3. އާރިޝް އިބްރާހީމް

4. އިސްމާއީލް އަޝްހަމް އަހުމަދު

5. މިޝްއާލް މުހައްމަދު ފަސީހް

6. މުހައްމަދު ހާދިން

7. މިރުއާޝް ހުސައިން މިރުޒާ

8. މުހައްމަދު ޔަޒިން ޔާސިރު

އެކުދިންގެ އަގު ވަޒަންކޮށް އިނާމު ދީފައިވަނީ "ދޯކާ އެފްސީ" ނަމަކަށް ކިޔާ އެރަށުގެ ޒުވާނުންގެ ގްރޫޕަކުންނެވެ. ޅައުމުރުން ފެށިގެން، ހިތްތަކުގައި އިސްލާމް ދީނަށް ލޯބި އުފެއްދުމުގެ ނިޔަތުގައި، ރަށު ކައުންސިލާއި ދޯކާ އެފްސީ އާއި ހިފްޒު ކްލާހާ ގުޅިގެން މި ސަގާފަތް ދިރުވަމުން އަންނަތާ ތިން އަހަރުވެއްޖެއެވެ.