ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ)ގެ ޑިރެކްޓަރުންގެ ބޯޑަށް ބޭފުޅަކު އައްޔަންކޮށްފިއެވެ.
ޕްރައިވެޓައިޒޭޝަން ބޯޑުން މިދިޔަ ބުރާސްފަތި ދުވަހު މި މަގާމަށް އައްޔަންކޮށްފައިވަނީ މ. ހަނިފަރު މުހައްމަދު ރަޝީދުއެވެ. އޭނާ މި މަގާމަށް އައްޔަންކުރީ ކުރިން މި މަގާމުގައި ހުންނެވި ޅ. ހިންނަވަރު، ލަންދޫގެ، ޚާލިދު ސުލައިމާންގެ ބަދަލުގައެވެ. މުހައްމަދު ރަޝީދަކީ ބެޗްލާ އޮފް ލޯސް، ބެޗްލާ އޮފް ބިޒްނަސް އަދި ޑިޕްލޮމާ އިން އެކައުންޓިން ހާސިލްކުރައްވާފައިވާ ބޭފުޅެކެވެ.
އެޗްޑީއެފްސީގެ ބޯޑު މެންބަރު ކަމަށް އައްޔަންކުރިއިރު މުހައްމަދު ރަޝީދު ހުންނެވީ ހުޅުމާލެ ސޯމިލްސް ޕްރައިވެޓް ލިމިޓެޑްގެ ޖެނަރަލް މެނޭޖަރުގެ މަގާމުގަ އެވެ. މުހައްމަދު ރަޝީދު މީގެކުރިން ވަނީ ޔޫމެޓް ކޮންސްޓްރަކްޝަން ޕްރައިވެޓް ލިމިޓެޑްގެ ޖެނަރަލް މެނޭޖަރުކަމާއި ޓިމްބަ ހައުސް ޕްރައިވެޓް ލިމިޓެޑްގެ އެގްޒެކްޓިވް ޑިރެކްޓަރުގެ މަގާމުވެސް ފުރުއްވާފަ އެވެ.
2004 ވަނަ އަހަރު ރައީސުލްޖުމްހޫރިއްޔާގެ ގަރާރަކުން އުފެއްދާފައިވާ އެޗްޑީއެފްސީ އަކީ ހައުސިން ސްކީމުތަކަށް ކޮންވެންޝަނަލް އުސޫލުން ލޯނާއި އަދި އިސްލާމީ ޝަރީއާ ހުއްދަ ކުރާ އުސޫލާއި އެއްގޮތަށް ފައިނޭންސް ފެސިލިޓީ ވެސް ދޫކުރާ ކުންފުންޏެކެވެ. އަދި އެޗްޑީއެފްސީގެ ހިއްސާދާރުންގެ ގޮތުގައި ހިމެނެނީ ދިވެހި ސަރުކާރާއި އޭޝިއަން ޑިވެލޮޕްމެންޓް ބޭންކް އަދި އިސްލާމިކް ފައިނޭންސް ކޯޕަރޭޝަން (އައިއެފްސީ)ގެ އިތުރުން އިންޑިއާގެ އެޗްޑީއެފްސީއެވެ.
