ސިޔާސީ ނުފޫޒުތަކާއި، ނުހައްގު އަނިޔާތަކާ ދެކޮޅަށް ސާބިތުވެ ތިއްބެވުމަށް އިލްތިމާސް ކުރައްވައި ދިވެހި ރައްޔިތުންނަށް ކުރީގެ ރައީސް ޔާމީން އަބްދުލްގައްޔޫމް ފިތުރު އީދުގެ ތަހުނިޔާ ފޮނުއްވައިފިއެވެ.

ޖަލު ބަންދުގައި ހުންނެވި ރައީސް ޔާމީން އީދު ތަހުނިޔާ ފޮނުއްވީ އެމަނިކުފާނުގެ ދޮށީ ދަރިކަލުން ޒޭން ޔާމީން މެދުވެރިކޮށެވެ. އެމަނިކުފާން ދެއްވި އީދު މެސެޖުގައި ވިދާޅުވީ ދިވެހި ގައުމުގެ ހައްގުގައި، ދިވެހި އެންމެހައި ލޮބުވެތި ރައްޔިތުން، ނަހަމަ ސިޔާސީ ނުފޫޒުތަކާއި، ނުހައްގު އަނިޔާތަކާ ދެކޮޅަށް ސާބިތުވެ ތިއްބެވުމަށް އެދިލައްވާ ކަމަށެވެ.

މި ފުރުސަތުގައި ރައީސް ޔާމީންގެ ހައްގުގައި އާއި ދިވެހި ގައުމުގެ ހައްގުގައި، ދިވެހި އެންމެހައި ލޮބުވެތި ރައްޔިތުން، އަދި މުއައްސަސާތަކުން، ނަހަމަ ސިޔާސީ ނުފޫޒުތަކާއި، ނުހައްގު އަނިޔާތަކާ ދެކޮޅަށް ސާބިތުވެ ތިއްބެވުމަށް ރައީސް ޔާމީންގެ ނަސޭހަތް އަޅުގަނޑު ރައްދު ކޮށްދެން.

– ޒޭން ވިދާޅުވިއެވެ.

އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ރިޝްވަތުގެ ގޮތުގައި ފައިސާ ނަގާ ފައިސާ ލޯންޑަކުރި ކަމަށް ކުރި ދައުވާ ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒް ކުރައްވަމުންނެވެ. އެހެންވެ އަންނަ ސެޕްޓެމްބަރު މަހު ބާއްވާ އިންތިހާބުގައި ވާދަކުރެވިދާނެ ކަމާ މެދު ވަނީ ސުވާލު އުފެދިފައެވެ. އެއީ ރައީސް ޔާމިންގެ ޖަލު ހުކުމް އިސްތިއުނާފްގެ މައްސަލަ އިންތިހާބުގެ ކުރިން ބަލައި ނިމޭނެކަމަށް ނުބެލެވޭތީއެވެ.

މި އަހަރު ބާއްވާ ރިޔާސީ އިންތިޚާބުގައި އިދިކޮޅު ކޯލިޝަންގެ ފަރާތުން ވާދަކުރައްވަން ރިޔާސީ ޓިކެޓު ވަނީ އެ މަނިކުފާނަށް އަރުވާފައެވެ. ޖަލުގައި ހުންނެވި ނަމަވެސް އެ މަނިކުފާނު މިނިވަންވެ ވަޑައިގެން އިންތިޚާބުގައި ވާދަކުރައްވާނެ ކަމަށް އިދިކޮޅު ކޯލިޝަނުން އަންނަނީ ބުނަމުންނެވެ. ރައީސް ޔާމީންގެ ފަރާތްޕުޅުން އެ މައްސަލަ މިހާރު ވަނީ ހައިކޯޓުގައި އިސްތިއުނާފް ކޮށްފައެވެ.

ޕީޕީއެމުން ބުނެފައިވަނީ ރިޔާސީ ކެމްޕެއިންގެ މަސައްކަތް ރައީސް ޔާމީންގެ ލަފާފުޅުގެ މަތިން ރޯދަ މަސް ނިމުމާ އެކު މުޅި ރާއްޖޭގައި ފަށާނެ ކަމަށެވެ. އެ ހުރިހާ މަސައްކަތްތައް ވެސް ކުރާނީ ޔާމީންގެ ލަފާފުޅުގެ މަތިން ކަމަށާއި މި އަހަރުގެ އިންތިހާބު ކާމިޔާބު ކުރެވޭނެކަމަށް އެޕާޓީން ބުނެއެވެ.