ޑޮކްޓަރުން ސްޕެޝަލައިޒްވުމަށް 7 ސްކޮލާޝިޕަށް ކުރިމަތިލުމުގެ ފުރުޞަތު މިނިސްޓްރީ އޮފް ހަޔަރ އެޑިއުކޭޝަނުން ހުޅުއްވައިލައްވައިފިއެވެ.
ހުރިހާ ޚަރަދެއް ދިވެހި ސަރުކާރުން ކުރައްވާގޮތަށް ސްކޮލަރޝިޕްތަކަށް ކުރިމަތިލުމުގެ ފުރުޞަތު ހުޅުވާލާފައިވަނީ އަންނަ މަހުގެ 4 ވަނަ ދުވަހާއި ހަމައަށެވެ. މި ސްކޮލަޝިޕްތަކުގެ އެޕްލިކޭޝަން ހުށަހަޅަން ޖެހޭނީ "މައި އެޑިއު" ޕޯޓަލް މެދުވެރިކޮށެވެ.
މި ސްކޮލަރޝިޕްތަކުގައި ކިޔެވުމަށް ހިނގާ ހުރިހާ ޚަރަދެއް ހަމަޖައްސަވާނީ ދިވެހި ސަރުކާރުންނެވެ. އަދި ސްކޮލަރޝިޕްތަކަށް ކުރިމަތިލުމުގެ ފުރުޞަތު މިހާރު ވަނީ ހުޅުއްވައިލައްވައިފައެވެ. 21 ގައުމަކުން ކިޔަވަން ދިޔުމުގެ ފުރުޞަތު އެބައޮތެވެ.
މި ކޯހުގައި ބައިވެރިވެވޭ ދާއިރާތަކުގެ ތެރޭގައި، އެނެސްތީއޮލޮޖީ، އިންޓަރނަލް މެޑިސިން، ސްޕައިން ސާޖަރީ، ޕީޑިއޭޓްރިކް ޕަލްމޮނޮލޮޖީ، ގައިނަކޮލޮޖީ، ޖެނެރަލް ސާރޖަރީ އަދި ޕީޑިއޭޓްރިކް ހިމެނެއެވެ. މި ހަތް ދާއިރާއިން ކޮންމެ ދާއިރާއަކުން އެއް ފުރުޞަތު ވަނީ ހުޅުއްވައިލައްވައިފައެވެ.
މި ކޯސްތަކުގައި ކިޔަވަން ދެވޭ ޤައުމުތަކަކީ ނޭޕާލް، ސްރީލަންކާ، ބަންގްލަދޭޝް، ބޫޓާން، އިންޑިޔާ، ޕާކިސްތާން، ހިމެނޭހެން އޭޝިއާ ބައްރުގެ ޤައުމުތަކެވެ.
މި ކޯސްތަކުގައި ބައިވެރިވެވޭނީ އެމްބީބީއެސް ޙާޞިލްކޮށްފައިވާ މީހުންނާއި، ޕީޑީއޭޓްރިކް ޕަލްމޮނޮލޮޖީއަށް ހުށަހަޅާ ފަރާތްތަކުން ޕީޑީއޭޓްރިކްސް އިން ސެޕެޝަލިޓީ ޙާޞިލްކޮށްފައިވާ މީހުންނަށެވެ. އަދި މޯލްޑިވްސް މެޑިކަލް އެންޑް ޑެންޓަލް ކައުންސިލްގައި ރަޖިސްޓްރީވެފައިވާ ފަރާތެއް ކަމުގައި ވާންޖެހޭނެއެވެ.
ހަޔަރ އެޑިއުކޭޝަން މިނިސްޓްރީން މަޢުލޫމާތުދޭ ގޮތުގައި މި ފުރުޞަތުތަކަށް މީހުން ހޮއްވެވުމުގައި އެންމެ ފުރަތަމަ އިސްކަންދެއްވާނީ މި ސްކޮލަރޝިޕްގައި ކިޔަވައި ނިންމުމަށްފަހު ކަނޑައެޅިފައިވާ މުއްދަތަށް އަތޮޅުތަކުގައި ޚިދުމަތްކުރަން އެއްބަސްވާ ފަރާތްތަކަށް ކަމަށެވެ. ނަމަވެސް ހުޅުވާލާފައިވާ ފުރުޞަތުގެ ޢަދަދަށްވުރެ ގިނަ ފަރާތްތަކުން އަތޮޅުތަކުގައި ޚިދުމަތްކުރަން އެއްބަސްވާނަމަ ދެން އިސްކަންދެވޭނީ އެ ފަރާތްތަކުން އެމް.ބީ.ބީ.އެސް ފުރިހަމަކުރުމަށްފަހު ޞިއްޙީ ޚިދުމަތް ދެއްވާ ތަނެއްގައި ޚިދުމަތްކޮށްފައިވާ މުއްދަތަށްކަމަށް މިނިސްޓްރީން ވިދާޅުވެއެވެ. އަދި ޚިދުމަތުގެ މުއްދަތު އެއްވަރުވެއްޖެނަމަ ކެންޑިޑޭޓުން ހޮވާނީ އެކަޑަމިކް މެރިޓަށް ޕޮއިންޓް ދެއްވައިގެން އެންމެ މަތިން ޕޮއިންޓް ލިބޭ ތަރުތީބުންނެވެ.
