ފުވައްމުލަކު ސިޓީގެ ގޮނޑުދޮށް ހިމާޔަތްކުރުމުގެ މަޝްރޫއު ކުރިއަށް ގެންދާ ހޯގާޑު ކުންފުނީގެ އިމާރާތެއްގައި އަލިފާން ރޯވެއްޖެއެވެ.
ސޯޝަލް މީޑިއާގައި އާންމުވެފައިވާ ވީޑިއޯއިން ފެނަނަ ގޮތުން އެތަނުގައި ވަރަށް ބޮޑަށް ރޯވެ ވަނީ އަދާފައެވެ. އަދި އަލިފާން ކޮންޓްރޯލް ކުރުމަށް އެތަނުގައި ތިބި ބިދޭސީން ހަރަކާތްތެރިވާ މަންޒަރު ފެނެއެވެ.
މިހާދިސާއާއި ގުޅިގެން އެމްއެންޑީއެފްއިން ބުނީ އަލިފާންރޯވީ ހޯގާޑް ކުންފުނީގެ ބައްދަލުވުންތައް ބޭއްވުމަށާއި ބައެއް ތަކެތި ބެހެއްޓުމަށް ބޭނުންކުރާ އިމާރާތެއްގައި ކަމަށެވެ. މިއަލިފާން މިހާރުވަނީ ނިއްވާލާފައި ނަމަވެސް އަދިވެސް ދުންއަރަމުންދާތީ ދަނީ މޮނީޓަރކުރަމުން ކަމަށެވެ. މިހާދިސާގެ ރިޕޯޓް ލިބިފައިވަނީ 11:13 ހާއިރުކަމަށް އެމްއެންޑީއެފްއިން ބުނެއެވެ.
ހޯގާޑަކީ ރާއްޖޭގެ އެހެން ބައެއް ރަށްރަށުގައިވެސް މަޝްރޫޢުތައް ހިންގަނމުންދާ ކުންފުންޏެކެވެ. މިހާދިސާގައި އެއިމާރާތަށް ވަނީ ބޮޑެތި ގެއްލުންތަކެއް ލިބިފައެވެ. ނަމަވެސް އަދި އެކަމުގެ ތަފްސީލެއް ހާމަ ނުކުރެއެވެ.
