އެމްޑީޕީގެ ރައީސް މުހައްމަދު ނަޝީދުގެ ފޮޓޯއާއި ނުލައި، އެމްޑީޕީގެ ސިޔާދަތުތަކަށް ލިބޭ ވޯޓު މިހާރު މާބޮޑަށްވެސް އިތުރުވެފައިވާކަމަށް އާރުޑީސީގެ މެނޭޖިން ޑިރެކްޓަރ މޫސާ އަލިމަނިކު (މޫކޭ) ވިދާޅުވެއްޖެއެވެ.
އޭނާ މިހެން ވިދާޅުވީ ނިމިދިޔަ ގުރައިދޫ ދާއިރާގެ ބައި އިލެކްޝަންގައި ވާދަކުރި އެމްޑީޕީގެ ކެނޑިޑޭޓާއި ދެކޮޅަށް އެޕާޓީގެ ރައީސް މުހައްމަދު ނަޝީދަށް ތާއީދުކުރާ ފިކުރެއްގެ ދިރުމުން މަސައްކަތް ކުރި ކަމުގެ ތުހުމަތުތަކާއިއެކު ކިޔަމުންދާ ފާޑުކިޔުންތަކާއި އެކުގައެވެ.
މިއިންތިޚާބު އެމްޑީޕީގެ ކެނޑިޑޭޓަށް ކާމިޔާބު ވެފައިވަނީ އެޕާޓީގެ ރައީސް މުހައްމަދު ނަޝީދާއި، ރައީސް ނަޝީދަށް ތާއީދުކުރާ އެމްޑީޕީގެ އިސްސަފުގެ ބޭފުޅުންގެ ބައިވެރިވުމާއި ނުލައެވެ. މިއިންތިޚާބު ކާމިޔާބު ކުރުމުން ރައީސް ޞާލިހަށް ތާއީދު ކުރާ ފަރާތްތަކުން ވިދާޅުވަމުން ދަނީ އެމްޑީޕީ އަކީ ވަކި މީހެއްގެ އެއްޗެއް ނޫންކަން ހާމަވެފައިވާކަމަށެވެ.
އާރުޑީސީގެ އެމްޑީ ވިދާޅުވީ ރައީސް ނަޝީދުގެ ފޮޓޯއާއިއެކު މީގެ ކުރިން ތަޅު އެޅުވިފައިވާ ކިތަންމެ ވޯޓެއް މިހާރު އެމްޑީޕީގެ ސިޔާސަތު ވިއްކައިގެން ލިބޭ ވޯޓު މާގިނަކަމަށެވެ. އަދި މިހާރު ރައީސް އިބްރާހިމް މުހައްމަދު ޞާލިހު ގެންގުޅުއްވާ ސިޔާސަތުތަކުގެ ހަރުދަނާ ކަމަށާއި، އެންމެ ގޮވައިގެން ކުރިއަށް ދިއުމުގެ ސިޔާސަތަކީ ރައްޔިތުން ބަލައިގަންނަން މާފަސޭހަ މާބޮޑަށް ވިއްކޭ ސިޔާސަތެއްކަމަށެވެ.
އެ ފޮޓޯ ގަނޑާއި އެކު ތަޅުއެޅުވިފައި ހުންނަ ކިތަންމެ ވޯޓެއް އެ ފޮޓޯ އާ ނުލާ އެމްޑީޕީގެ ސިޔާސަތަށް ފަސޭހަ ކަމާ އެކު ލިބޭ. ޙަޤީޤަތުގައި އެމްޑީޕީ ކުރިއަށް ގެންދިއުމަށް ރައީސް ޞާލިޙު ގެންގުޅުއްވާ އެންމެން ބައިވެރި ކުރުމުގެ ސިޔާސަތު ރައްޔިތުންނަށް ވިއްކަން މާ ފަސޭހަ.
– މޫކޭ ވިދާޅުވިއެވެ.
ގުރައިދޫ ދާއިރާގެ އިންތިޚާބަކީ އެމްޑީޕީގެ ރައީސާއި ނުލައި ކާމިޔާބުކުރި ބޮޑު އިންތިޚާބަކަށް ވާއިރު، މިއީ ރައީސް ޞާލިހަށް ކުރިއަށް އޮތް ރިޔާސީ އިންތިޚާބު ކާމިޔާބު ކުރުމަށް ލިބިގެންދިޔަ އިތުރު ހިތްވަރެއްކަމަށް ރައީސް ޞާލިހަށް ތާއީދުކުރާ މެމްބަރުން ދެކެއެވެ.
