ދިވެހިން އެންމެގިނައިން ދިރިއުޅޭ އަވައްޓެރި ސްރީލަންކާގައި ދިވެހިންނަށް ޚާއްސަ ކެފޭއެއް އަނެއްކާވެސް ހުޅުވައިފިއެވެ.
"ދަ ގާރޑަން ވެލް ކެފޭ" ގެ ނަމުން ލަންކާގައި ހުޅުވި މި ކެފޭއަކީ އެ ގައުމުގައި ދިރިއުޅޭ ދިވެއްސަކު އިސްވެހުރެ ހުޅުވި ކެފޭއެކެއެވެ. ކެފޭ ހިންގުމުގައި އެންމެ އިސްކޮށް ހުރި ދިވެއްސަކީ ރާއްޖޭގެ މަޝްހޫރު ފިލްމީ ތަރި މަރްޙޫމް ޗިޅިޔާ މޫސާ މަނިކުގެ ދަރިކަލުން ޗިޅިޔާ އަހުމަދު ޝާހިދެވެ. މިދިޔަ ހުކުރު ދުވަހުގެ ރޭ ކެފޭ ހުޅުވުމުގެ ގޮތުން ބޭއްވި ކުޑަ ރަސްމިއްޔާތަށް ލަންކާގައި ދިރިއުޅޭ ވަރަށް ގިނަ ދިވެހިން ގޮސްފައިވެއެވެ.
އެއީ ހުޅުވި ރޭ ކަމަށްވުމުން އެރޭ ކެފޭއަށް ދިޔަ ކޮންމެ މީހަކަށް ކެއުން އޮތީ ހިލެއެވެ. "ދަ ގާރޑަން ވެލް ކެފޭ" ހުޅުވާފައި ވަނީ މީގެކުރިން "ޑްރީމަން ކެފޭ" ހިންގި ތަނުގައެވެ. ދިވެހިން ގިނަ އަދަދަކަށް ދިރިއުޅެމުންދާ ދެހިވަލަ، ކަލުބޯވިލާ ސަރަހައްދުގައި ކުރިން "ޑްރީމަން ކެފޭ" ގެ ނަމުގައި ހިންގި ތަން، ޗިޅިޔާ ޝާހިދުގެ ބެލުމުގެ ދަށުން މިފަހަރު ހުޅުވިއިރު މެނޭޖްމަންޓްވެސް މުޅިން ބަދަލުވެ، މުޅި ކެފޭގެ ސަރަހައްދުވެސް ވަނީ ޒަމާނީ ހިތްގައިމު ބަދަލު ތަކެއް ގެނެސްފައެވެ.
އެންޑަސަން ރޯޑާއި ގުޅިފައިވާ ކަށިޔައްޕަރޯޑްގައި ހުންނަ މި ކެފޭއިން ދިވެހި ރަހަ ތަކާއި އެނޫންވެސް ރަހަތައް ލިބެން ހުރެއެވެ.
