ރާއްޖޭގެ ގައުމީ އެއަރލައިން މޯލްޑިވިއަންއިން ރާއްޖެ ގެނެސްފައިވާ 42 މަރުކާގެ އާ އޭޓީއާރު ބޯޓުގެ ދަތުރުތައް ފަށައިފިއެވެ.
42 މީހުންގެ ޖާގައިގެ މި ބޯޓު ރާއްޖެ އައިސްފައިވަނީ ފްރާންސްގެ ޓުލޫސްއިން ފުރައިގެން، މިމަހުގެ ދެވަނަ ދުވަހުއެވެ.
މި ބޯދުގެ ފުރަތަމަ ދަތުރު މިއަދު މެންދުރު 12:00ގައި މާލެއިން ފުރައިގެން 26 ފަސެންޖަރުންނާއެކު ކޮށްފައިވަނީ ލ ކައްދޫއަށެވެ.
މި ބޯޓު މާލެ ގެނައުމާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން މޯލްޑިވިއަން ކުންފުނީގެ ޑެޕިއުޓީ މެނޭޖިންގ ޑިރެކްޓަރ އައިޝަތު ޖެނިފަރ މީގެ ކުރިން ވިދާޅުވެފައިވަނީ މިއީ މިއަހަރުގެ ތެރޭގައި އެ ކުންފުނިން ގަނެފައިވާ 3 ވަނަ ބޯޓު ކަމަށްވުމުން މިއީ އެކުންފުންޏަށް ލިބިގެންދިޔަ ވަރަށްބޮޑު ކުރިއެރުމެއް ކަމުގައެވެ.
އޭނާ އިތުރަށް ވިދާޅުވީ އައިލޭންޑް އޭވިއޭޝަން ސާވިސަސްއިން މިހާރު ބޭނުން ކުރަމުންދާ ބޯޓުތަކަކީ ބޭނުންކުރާތާ 20 އަހަރުވެފައިވާ ބޯޓުތަކެއް ކަމުން، އެ ބޯޓުތަކުގެ މެއިންޓެނަންސަށް ވަރަށް ބޮޑު ޚަރަދެއް ކުރަން ޖެހޭކަމުގައެވެ. އެހެންކަމުން އަލަށް ގަތް އޭޓީއާރު ބޯޓުތަކުގެ ސަބަބުން މެއިންޓަނަންސް ޚަރަދު ވަރަށްވެސް ބޮޑުތަނުން ކުޑަވެގެންދާނެ ކަމުގައިވެސް އޭނާ ވިދާޅުވެފައި ވެއެވެ.
މިގޮތުން. ކުންފުނިން މިހާރު ބޭނުންކުރަމުންދާ ޑޭޝް މަރުކާގެ ހުރިހާ ބޯޓަކީވެސް މިހާރު އަމިއްލަ ކުރެވިފައިވާ ބޯޓުތަކެއްކަން ފާހަގަކުރައްވަމުން، އެހެންނަމެސް އެމަރުކާގެ ބޯޓުތައް މިހާރު އުފައްދަމުން ނުދާތީ، އެ ބޯޓުތަކުގެ ސްޕެއަރ ޕާޓް ލިބުން ދަތިވެފައި ވުމާއި ގުޅިގެން މި މަރުކާގެ ހުރިހާ ބޯޓެއްވެސް ފޭސް އައުޓު ކުރުމަށް ކުންފުނިން ޕްލޭނެއްވެސް ހަދާފައިވާކަމުގައިވެސް އޭނާ ވިދާޅުވިއެވެ.
އޭނާ ވިދާޅުވީ މިއަހަރާއި 2024ގައި އެކުންފުނިން ބޯޓުތައް އާކުރަމުން ދާނެކަމުގައެވެ. އަދި މިހާރު ގެނެވުނު ބޯޓާއެކު، އޭޓީއާރު މަރުކާގެ 3 ބޯޓު މިހާރު ކުންފުނީގައި އޮތްއިރު 2024ގެ ނިޔަލަށް އިތުރު 5 ބޯޓު ގެނައުމަށް ކުންފުނިން މަސައްކަތް ކުރަމުންދާ ކަމުގައިވެސް އޭނާ ވިދާޅުވިއެވެ.
އަދި މިހާރު ހުރި ބޯޓުތަކަށްވުރެ ބޮޑު ބޯޓެއް ގެނެސް، ރާއްޖެއިން ބޭރަށް މިހާރު ދަތުރު ކުރަމުންދާ އިންޑިއާ ބަންގްލަދޭޝްގެ އިތުރުން އިތުރު ޑެސްޓިނޭޝަންތަކަށް ދަތުރު ފެށުމުގެ މަސައްކަތް ކުރިޔަށްދާކަމަށްވެސް ޖެނިފަ ވިދާޅުވިއެވެ.
