ތިމާއަށް ބޭނުންވާ ގޮތަކަށް ކަންކަން ނުދާ ކޮންމެ ފަހަރަކު ގަބޫލުކުރާ ހަމަތަކާއި އުސޫލުތައް އެއްފަރާތްކޮށް އަމިއްލަ ފިކުރު ދޫކޮށް އެހެން ބަޔަކާއި ގުޅިގެން މަސައްކަތް ކުރުމަކީ ލީޑަރުންގެ ސިފައެއް ނޫންކަމަށް ވިދާޅުވެ، ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު މުހައްމަދު ރާޝިދުގެ ރައްދެއް ރައީސް ނަޝީދަށް ދެއްވައިފިއެވެ.
އެމްޑީޕީގެ ރިިޔާސީ ޕްރައިމަރީއަށްފަހު ރައީސް މުހައްމަދު ނަޝީދު ގެންދަވަނީ އިންތިޚާބުގެ ނަތީޖާ އާއިމެދު ސުވާލު އުފައްދައި ވޯޓުން އިންތިޚާބުވެފައިވާ އެޕާޓީގެ ރިޔާސީ ކެނޑިޑޭޓް ރައީސް ޞާލިހާއި ދެކޮޅަށް ވަރަށް ފާޅުގައި މަސައެކަތް ކުރައްވަމުންނެވެ. ރައީސް ނަޝީދު ވަނީ ރިޔާސީ އިންތިޚާބުގައި ރައީސް ޞާލިހާއިއެކު މަސައްކަތް ނުކުރައްވާނެކަން އިއުލާންކޮށް، ޖޭޕީގެ ކެނޑިޑޭޓް ޤާސިމް އިބްރާހިމަށް ތާއީދު ކުރައްވައި މަޝްވަރާތައް ފައްޓަވާފައެވެ.
ރައީސް ނަޝީދުގެ މިނިންމުމާއި ގުޅިގެން އެމަނިކުފާނަށް އެމްޑީޕީގެ ރައީސް ޞާލިހަށް ތާއީދު ކުރާ މެމްބަރުންގެ ފަރާތުން ފާޑުކިޔުން އަމާޒުވެއެވެ. މެމްބަރު ރާޝިދު ވަނީ ރައީސް ނަޝީދު އަމަލު ކުރެއްވި ގޮތް ފުޓުބޯޅަ މެޗެއްގެ ކަންކަން ހިނގާ ގޮތާއި ގުޅޭގޮތުން މިސާލު ނަންގަވާފައެވެ. އޭނާ ވިދާޅުވީ ޓީމުގެ ކެމްޕްޓަން ކަނޑައަޅަނީ އެންމެންގެ މެދުގައި މަޝްވަރާކޮށްގެން ކަމަށާއި، ކެޕްޓަންކަން ކަނޑައެޅުމުން އެކަމާއި ނުރުހު ވާދަވެރި ޓީމަށް ކުޅެން އުރުމަކީ ލީޑަރުންގެ ސިފައެއް ނޫންކަމަށެވެ.
ޓީމްގެ ކެޕްޓަން ކަނޑަ އަޅަނީ ޓީމުގެ އެންމެންގެ މެދުގައި މަޝްވަރާކުރެވި ގިނަ ގޮތްގޮތުން އެންމެ ރަނގަޅު މީހާ. ކެޕްޓަން ކަން ނުލިބޭ ކޮންމެ ފަހަރަކު ބައި ކޮޅަށް ގޯލް ޖަހަންދިނުން،ޓީމް ދޫކޮށް ދިއުން ނުވަތަ ބޮޑާ ހާކާފަ އިދިކޮޅު ޓީމަށް ބަދަލު ވުން މީ ލީޑަރުންގެ ސިފައެއްނޫން.
– ރާޝިދު ވިދާޅުވިއެވެ.
ރައީސް ނަޝީދާއި، ޤާސިމް އެކީގައި ރިޔާސީ ރޭހުގައި ކުރިއަށް ދިއުމުގެ މަސައްކަތް ފަށާފައިވާއިރު، ދެފަރާތުން ދަނީ މެނިފެސްޓޯއެއްވެސް އެކުލަވާލަމުންނެވެ. ރިޔާސީ ރޭހުގައި ރައީސް ޞާލިހަށް އޮތް އެންމެ ބޮޑު ގޮންޖެހުމަކީ ރައީސް ނަޝީދު އެމްޑީޕީއާއި ދެކޮޅަށް މަސައްކަތް ކުރުންކަމަށްވާއިރު، މިކަމުގައި ހައްލެއް ހޯދަންޖެހޭކަމަށް އެމްޑީޕީގެ މެމްބަރުން ދަނީ ބުނަމުންނެވެ. ރައީސް ޞާލިހަށް ތާއީދުކުރާ މެމްބަރުން ރައީސް ނަޝީދު ޕާޓީން ވަކިކުރަން ގޮވާލި ނަމަވެސް މިހާތަނަށް ރައީސް ނަޝީދާއިމެދު އެއްވެސް ފިޔަވަޅެއް އަޅަފައި ނުވެއެވެ.
މިއީ ރާއްޖޭގެ ތާރީހުގައިވެސް ރިޔާސީ އިންތީޚަބުގައި އަމިއްލަ ޕާޓީން ވާދަކުރާއިރު، އެޕާޓީގެ ރައީސް އެހެން ޕާޓީއެއްގެ ރިޔާސީ ކެނޑިޑޭޓަށް ތާއީދުކުރައްވާ ފުރަތަމަ ފަހަރެވެ.
