ކުރިއަށް އޮތް ރިޔާސީ އިންތިޚާބު އެމްޑީޕީގެ ރިޔާސީ ކެނޑިޑޭޓް ރައީސް އިބްރާހިމް މުހައްމަދު ޞާލިހު ކާމިޔާބު ކުރައްވާނީ އެމްޑީޕީގެ ރައީސް މުހައްމަދު ނަޝީދު އެމްޑީޕީގެ ކެނޑިޑޭޓާއި ދެކޮޅަށް އުފައްދާފައިވާ ފިކުރެއްގެ ދިރުމުގެ ޓީމު ކިހިލި ޖަހާލައިގެން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
އިއްޔެ ސަން އައިލެންޑުގައި ޖުމްހޫރީ ޕާޓީއާއި، ފިކުރެއްގެ ދިރުމުގެ އިސްބޭފުޅުންގެ މައްޗަށް އެކުލެވޭ ޓީމުން ބޭއްވި ބައްދަލުވުމަށްފަހު ޖުމްހޫރީ ޕާޓީ (ޖޭޕީ) ގެ ލީޑަރު، ގާސިމް އިބްރާހިމް އެކު ރިޔާސީ އިންތިޚާބުގައި ކުރިއަށް ދިއުމަށް އެމްޑީޕީގެ ރައީސް މުހައްމަދު ނަޝީދު ވަނީ ބައިއަތު ހިފައިފައެވެ. ދެބައިވެފައިވާ އެމްޑީޕީގެ ރައީސް މުހައްމަދު ނަޝީދު މަސައްކަތް ކުރަމުންދަނީ ރައީސް ޞާލިހަށް ރިޔާސީ އިންތިޚާބު ކާމިޔާބު ނުކުރެވޭނެ ގޮތަށް ގިނަ މަސައްކަތްތަކެއް ކުުރަމުންނެވެ.
އިއްޔެ ޤާސިމާއި، ރައީސް ނަޝީދުގެ ބައްދަލުވުންތަކާއި ގުޅިގެން ޝަރީފް ވިދާޅުވީ ރިޔާސީ އިންތިޚާބު އެމްޑީޕީން ވާދަކުރާ ކެނޑިޑޭޓް ފަސޭހަ ކަމާއިއެކު ކާމިޔާބު ކުރާނެކަމަށެވެ. އެކަން ކުރާނީ ރައީސް ނަޝީދު އެމްޑީޕީގެ ކެނޑިޑޭޓާއި ދެކޮޅަށް ހިންގާ ހަރަކާތް އެއްފަރާތްކޮށް، ކިހިލި ޖަހައިގެންކަމަށް ޝަރީފް ވިދާޅުވިއެވެ.
މިފަހަރު އެމްޑީޕީން ރިޔާސީ އިންތިޚާބު ކާމިޔާބު ކުރާނީ އިރާދަކުރެއްވިއްޔާ ފިކުރެއްގެ ދިރުން އެއްކައިރިކޮށް ކިހިލި ޖަހާލައިގެން. އެއަޒުމުގައިި އަޅުގަނޑުމެން މި މަސައްކަތް ކުރަނީ.
– ޝަރީފް ވިދާޅުވިއެވެ.
ޝަރީފް ވިދާޅުވީ ރައީސް މުހައްމަދު ނަޝީދާއި، ފިކުރެއްގެ ދިރުމުގެ ޓީމުން އެމްޑީޕީ ބައިބައި ކޮށްލުމަށް ނުކުރާނެ ހަމައެއްވެސް ކަމެއް ނޯންނާނެކަން ވަރަށް ސާފުކަމަށެވެ. ނަމަވެސް އެކަންކަމަކީ އެމްޑީޕީން މިހާރު މާބޮޑަށް ވިސްނާ ކަންކަމެއް ނޫންކަމަށް ޝަރީފް ވިދާޅުވިއެވެ.
އެމްޑީޕީ ރޫޅާލާ ސުންނާފަތި ކޮށްލުމަށްޓަކައި ފިކުރެއްގެ ދިރުމުން ނުކުރާނެ އެއްވެސް ކަމެއް ނެތްކަން ވަރަށް ސާފު.
– ޝަރީފް ވިދާޅުވިއެވެ.
ޖޭޕީން އަންނަ ރިޔާސީ އިންތިހާބުގެ ރޭހަށް ނުކުމެވަޑައިގެންނެވިއިރު، އެ އެ ޕާޓީއާއެކު ކޯލިޝަން ހެދުމާ މެދު މިހާތަނަށް ރަސްމީކޮށް އެއްބަސްވެވިފައި ވަނީ މި ޓީމުން އެކަންޏެވެ. އަދި ނަޝީދުގެ އެ ފެކްޝަނާ އެކު މެނިފެސްޓޯ ތައްޔާރު ކުރުމުގެ މަސައްކަތް ވެސް ވަނީ ފަށައިފައެވެ.
އަދި އެމްއާރްއެމް އިން ވަނީ ކޯލިޝަން ހެދުމަށް މަޝްވަރާތައް ފެށުމަށް އެއްބަސްވެފައެވެ. އޭގެ އިތުރުން އެމްޓީޑީންވެސް ކޯލިޝަންގައި ބައިވެރިވުމާއި ގުޅޭގޮތުން ގޮތެއް ނިންމުމަށް އެ ޕާޓީގެ ކައުންސިލާއި މަޝްވަރާ ކުރަން ނިންމިިއިރު، އެމްއެންޕީން ވަނީ އެ ޕާޓީން ފުރަތަމަ ބުރުގައި އިންތިހާބުގައި ވަކިން ވާދަކުރައްވަން ނިންމަވާފައެވެ. އޭގެ އިތުރުން އިދިކޮޅު ބޮޑު ޕާޓީ ޕީޕީއެމުން ބުނެފައި ވަނީ އެ ޕާޓީން ރިޔާސީ އިންތިހާބުގައި އެއްވެސް ބައެއްގެ ފަހަތަށް ނާރާނެ ކަމަށެވެ.
މީގެ ކުރިން ގާސިމް ވަނީ 2008 އަދި 2013 ވަނަ އަހަރުގެ ރިޔާސީ އިންތިހާބުގައިވެސް ވާދަކުރައްވައިފައެވެ. އެ ދެ އިންތިހާބުގައިވެސް ދެވަނަ ބުރަކަށް ދާން ބޭނުންވާ ވަރަށް ގާސިމަށް ވޯޓު ހޯއްދެވިފައެއް ނުވެއެވެ. ނަމަވެސް ޖޭޕީގެ ލީޑަޝިޕްގައި ތިއްބެވި ބޭފުޅުން ގަބޫލު ކުރައްވާ ގޮތުގައި މިފަހަރުގެ ރިޔާސީ އިންތިހާބު ކާމިޔާބު ކުރުމުގެ އެންމެ ފަހި ފުރުސަތެއް އޮތީ ގާސިމަށެވެ.
