ދަތުރުފަތުރުގެ ނިޒާމަކުން މުޅި ރާއްޖެ ގުޅާލުމަށް ސަރުކާރުން ފަށްޓަވާފައިވާ ރާއްޖެ ޓްރާންސްޕޯޓް ލިންކް، (އާރްޓީއެލް)ފެރީ ދަތުރުތައް ހުވަދު އަތޮޅުގައި ފެށުމަށްޓަކައި ބަން ފުރަތަމަ ލޯންޗުގެ މަސައްކަތް ނިންމައި އެއުޅަނދު އެމްޓީސީސީއާ ހަވާލުކޮށްފިއެވެ.
މި ފެރީ އުޅަނދުތައް ބަންނަނީ އަލްޝާލީ މެރިންއާ ހަވާލުކޮށްގެންނެވެ. ހުވަދު އަތޮޅު ފެރީގެ ފުރަތަމަ އުޅަނދު ތިލަފުށީގައި ބަނުމަށްފަހު ބޭލުމަށް ބޭއްވި ރަސްމިއްޔާތުގައި އެމް.ޓީ.ސީ.ސީންގެ މެރިން ޓްރާންސްޕޯޓް ޑިވިޝަންގެ ޖެނެރަލް މެނޭޖަރ އިސްމާއިލް ފާރިގް ވިދާޅުވީ މިއީވެސް އާރުޓީއެލްގެ އެހެން އުޅަނދުތަކެކޭ އެއްގޮތަށް ޒަމާނީ ވަޞީލަތްތަކާއެކު ބަނދެފައިވާ ފުރިހަމަ އުޅަނދެއްކަމަށެވެ. އަދި ޢާންމުކޮށް މިހާތަނަށް އާރުޓީއެލްގައި ބޭނުންކުރަމުން އަންނަ އުޅަނދު ތަކަށްވުރެ މި އުޅަނދު ބޮޑުވާނެކަމަށްވެސް އޭނާ ވިދާޅުވިއެވެ.
އަންނަ ޖުލައިގެ ނިޔަލަށް ޖުމުލަ 6 އުޅަނދު ބަނދެ ނިންމައި އާރުޓީއެލްގެ ހުވަދޫ ދަތުރުތަކަށް ނެރެވޭނެކަމަށް އެމްޓީސީސީން ލަފާކުރެއެވެ.
