ޕީޕީއެމްގެ ރިޔާސީ ކެނޑިޑޭޓް އަދި އެޕާޓީގެ ރައީސް ޔާމީނަށް އެޑްރެސް ނުކޮށް ޕީޕީއެމްއަށްފޮނުވާ އެއްވެސް ސިޓީއެއް ބަލައި ނުގަންނާނެކަމަށް ޕްރޮގްރެސިވް ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

އޭނާ މިހެން ވިދާޅުވީ ރިޔާސީ އިންތިޚާބުގައި ޖުމްހޫރީ ޕާޓީއާއިއެކު ކޯލިޝަން ހެދުމަށް ޖުމްހޫރީ ޕާޓީން ފޮނުވި ސިޓީއާއި ގުޅިގެން ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ. މިރޭ މާފުށީގައި އޮތް ޕީޕީއެމްގެ ރަސްމިއްޔާތެއްގައި އަދުރޭ ވިދާޅުވީ ޖުމްހޫރީ ޕާޓީން ފޮނުވި ސިޓީ ލިބިފައިވާކަމަށެވެ. ނަމަވެސް އެއީ އެޕާޓީން ބަލަިއ ގަންނާނެ ސިޓީއެއް ނޫންކަމަށެވެ. ސަބަބަކީ ސިޓީ އެޑްރެސް ކޮށްފައިވަނީ ރައީސް ޔާމީނަށް ނުވުމުންކަމަށެވެ.

ޖުމްހޫރީ ޕާޓީން ސިޓީ އެޑްރެސްކޮށްފައިވަނީ ކާކަމަށް ކަމެއް އަދުރޭ ވިދާޅުވެފައި ނުވެއެވެ. އޭނާ ވިދާޅުވީ ޕީޕީއެމްގެ ރައީސަށް އެޑްރެސް ނުކުރާ ސިޓީއެއް ޕީޕީއެމްއިން ގަބޫލު ނުކުރާނެކަމަށެވެ.

އެސިޓީއަކީ އަޅުގަނޑުމެންނަށް ބަލައި ގަނެވޭނެ ސިޓީއެއް ނޫން. ޕީޕީއެމް، ޕީއެންސީ ކޯލިޝަންގެ ލީޑަރަކީ ރައީސް ޔާމީން. އަޅުގަނޑުމެންގެ ރިޔާސީ ކެނޑިޑޭޓަކީ ރައީސް ޔާމީން. ޕީޕީއެމްގެ ރައީސަކީ ރައީސް ޔާމީން. ޕީޕީއެމް ޕީއެންސީ ކޯލިޝަނަށް އެޑްރެސް ކުރައްވާ ފޮނުވާ ސިޓީއެއް އޮންނަންވާނެކަމަށް އަޅުގަނޑުމެންގެ ލީޑަރޝިޕް އިއްތިފާގުވަނީ ރައީސް ޔާމީނަށްކަމަށް. އެމަނިކުފާނަށް އެޑްރެސް ނުކޮށް އެހެން މީހަކަށް މީހަށް އެޑްރެސްކޮށް ފޮނުވާ ސިޓީއެއް ޕީޕީއެމް ކޯލިޝަނުން ބަލައި ނުގަންނާނެ.

– އަދުރޭ ވިދާޅުވިއެވެ.

އަދުރޭ ވިދާޅުވީ އެންމެ ފުރަތަމަ ރިޔާސީ ކެނޑިޑޭޓެއް ދެއްކީ އެކޯލިޝަނުން ކަމަށެވެ. ރައީސް ޔާމީނަށް ގާސިމާއި ސިޔާސީ ގޮތުންވެސް އަދި އެކުވެރިކަމުގެ ގޮތުންވެސް ގުޅުން އޮތްކަމުގައި ވީނަމަވެސް ރިޔާސީ ރޭހުގައި ކުރާނީ މުޅިން ތަފާތު މަސައްކަތެއްކަމަށެވެ.

އަބްދުއްރަހީމް ވިދާޅުވީ ޕީޕީއެމް ޕީއެންސީއާއިއެކު ކޯލިޝަން މަޝްވަރާއެއް ކުރެވޭނެ އުސޫލުތަކާއި، ހަމަތަށް މާކުރިންވެސް ނިންމާފައިވާކަމަށެވެ. އެގޮތުން މިސަރުކާރު ކޯލިޝަންގައި ހިމެނޭ އެއްވެސް ޕާޓީއަކާއި ވާހަކަ ދައްކާނީވެސް ސަރުކާރު ކޯލިޝަނުން ވަކިވެ، އެކަން ރަސްމީކޮށް އިއުލާން ކުރުމުންކަމަށެވެ.

ހަމަ އެއާއިއެކު ސަރުކާރުން ރައީސް ޔާމީނަށް ގަސްތުގައި އަނިޔާ ކުރަމުންދާކަން ގަބޫލުކުރާ ބަޔަކަށް އެބަޔަކު ވާންޖެހޭނެކަމަށެވެ. މީގެ އިތުރުން ރައީސް ޔާމީންގެ ސިޔާސަތަށް ތާއީދު ކުރާބަޔަކަށް އެބަޔަކު ވާންޖެހޭނެކަމަށެވެ. އޭނާ ވިދާޅުވީ މި އުސޫލުތައް ގަބޫލު ނުކުރާ ބަޔަކާއިއެކު ޕީޕީއެމްއިން ކުރާނެ މަޝްވަރާއެއް ނޯންނާނެކަމަށެވެ.

ޕީޕީއެމްއަކީ ސިޔާސީ މަސައްކަތް ކުރުމަށް ހުރިހާ ޕާޓީތަކާއިވެސް ގުޅިގެން މަސައްކަތް ކުރަން ތައްޔާރަށް އޮތް ބައެއްކަމަށް އަދުރޭ ވިދާޅުވިއެވެ. ނަމަވެސް އެކޯލިޝަނުން ގަބޫލުކުރާ ހަމަތަކަށް ތާއީދުކުރާ ބަޔަކަށް ވެގެން ނޫނީ ކޯލިޝަން މަޝްވަރާ ނުކުރެވޭނެކަމަށެވެ. ޕީޕީއެމް ޕީއެންސީގެ އެންމެ ފުރަތަމަ ޝީއާރަކީ ޤައުމުކަމަށާއި، ޤައުމުގެ މިނިވަންކަން ދިފާއުކުރަން ނިކުންނަ ބަޔަކަށް ނުވެ ކޯލިޝަން މަޝްވަރާ ކުރެވޭނެކަމަށް ގަބޫލު ނުކުރާކަމަށް އެނާ ވިދާޅުވިއެވެ.

ހަމަ މިއާއިއެކު މާތްވެގެންވާ އިސްލާމްދީން ނޫން އެހެން ދީނަކަށް ޖާގަ ދިނުމަށް ކުރާ މަސައްކަތާއި ދެކޮޅު ހަދާބަޔަކަށް އެބަޔަކު ވާންޖެހޭކަމަށެވެ. މީގެ އިތުރުން ޝަރުއީ ދާއިރާއަށާއި މިނިވަން މުވައްސަސާތަކަށް ނުފޫޒު ފޯރުވާފޯރުވުމާއި ދެކޮޅު ހަދާ ބަޔަކަށް އެބަޔަކު ވާންޖެހޭކަމަށެވެ.