ކުއްލިއަކަށް ބޭރުން އިވުނީ ބަޔަކު ހަޅޭއްފަޅޭ ޖަހައިގަތް އަޑެވެ. އަހަރެންވެސް ދިޔައީ ސިއްސައިގެންނެވެ. ފުރަތަމަ އަޑު އިވުނު ގޮތުންވެސް ބަޔަކު ތަޅާ ފޮޅަނީކަން އެނގުނެވެ. ކޮއްކޮ ގާތުގައި މަޑުކޮށްލާށޭ ބުނެފައި އަހަރެން އެޕާޓްމަންޓުން ބޭރަށް ނުކުރީ ޚަބަރު ބަލައިލާށެވެ. އޭރު އަންހެނަކާއި ކުޑަކުއްޖަކު ރޯ އަޑާއި، އިތުރު ބަޔަކު ހަޅޭލަވާ އަޑު އެގޭތެރެއިން އިވެއެވެ. އަޑު އިވެނީ ޖެހިގެން ހުރި ގޭގެ ފުރަތަމަ ފަންގިފިލާގެ އެޕާޓްމަންޓަކުންނެވެ.

ކުޑަކުދިންނާއި އަންހެނުން ރޯއަޑު އިވެމުން ދިޔަ އިރު އެއަޑުގެ ތެރެއިން ފިރިހެނެއްގެ ބަރު ހަރުކަށި އަޑު އިވެމުން ދިޔުމާއި ތަޅާ އަޑާއި އެއްޗެހި ފުނޑުފުނޑުވާ އަޑު އިވެމުންދާތީ، އަހަރެންގެ ހިތްވެސް އަވަސްވިއެވެ. ފުލުހުންގެ އެމަރޖެންސީ ނަމްބަރަށް ޑައިލް ކުރެވުނީވެސް ތިންހަތަރު ފަހަރަކު މަސައްކަތްކޮށްގެންނެވެ. ގެންފައި ހުރި ބިރާއި ހިތް އަވަސްވުމުން، އަތްވެސް ތުރުތުރު އަޅާތީއެވެ. އޭރު އަހަރެންގެ ހިތްވެސް ހީވަނީ މޭފަޅާފައި ބޭރަށް ނުކުމެދާނެ ހެންނެވެ. ކޮންމެ ސިކުންތަކީވެސް ކޮންމެވެސް މީހެއްގެ ފުރާނައަށް ނުރައްކާ ވަގުތެއްކަން އެނގެއެވެ.

ފޯނު ނެގި ފުލުސްމީހާ ގާތުގައި ވެގެން އުޅޭކަމަށް ފެންނަގޮތް ކިޔައިދިނުމުން އޭނާ ފެށީ ތަޙުޤީޤެކެވެ. އޭނާ ބޭނުންވީ އަހަރެންގެ ނަމާއި އެޑްރެހާއި އުމުރާއި ދިރިއުޅޭ ތަނުގެ މައުލޫމާތެވެ. ދެންއެހީ އެމީހުން ތަޅާފޮޅަނީކަން އަހަރެންނަށް ހަމަ ޔަޤީން ތޯއެވެ. އަހަރެންގެ ގާތަށް އައީ އަމަށަރަކު ރުޅިއެއް ނޫނެވެ. ކެޔޮޅަކު ރަތްމަހަށް ނުދޭ ވަރަށް ދީ ބަވާލައިފާނަމޭ ހިތަށް އެރިއެވެ. އެކަމަކު އެއްޗެއް ބުނާނީ ކިހިނެއް ހެއްޔެވެ. ގުޅިފައި މިހުރީ ފުލުހުންގެ އިމަރޖެންސީ ނަމްބަރަށެވެ.

އިރުކޮޅަކުން އަނެއްކާވެސް ކުޑަކުއްޖަކު ވަރަށް ބާރަށް ރޮއިގަތް އަޑާއި އަންހެނަކު ދޫކުރާށޭ ގޮވާ އަޑު އިވުނެވެ. އެއަޑާއި އެކުވެގެން މަރައޭ ލާނީ ކިޔައި ފިރިހެނަކު ގަދަ އަޑުން ހަޅޭލަވާ އަޑު އިވެމުން ދިޔައެވެ. އަހަރެންގެ މޭގައި އޮތް ހިތް ނެގިނެގިފައި ޖެހެއެވެ. ކަންބޮޑުވެގެން އަނެއްކާވެސް ފުލުހުންނަށް ގުޅައިފީމެވެ. މަގުމަތި ޕެޓްރޯލް ކުރަން އުޅޭ ފުލުހަކު ނަމަވެސް ފޮނުވައި ދިނުމަށް އެދުނީމެވެ. ބަޔަކު ތަޅައިފޮޅައި މަރަނީ އޭ ބުނުމުންވެސް ފޯނު ނެގި ފުލުސް ކުއްޖާގެ ޖަވާބު އައީ ފަރުވާ ކުޑަ ގޮތަކަށެވެ. އޭނާ ބުނީ ޕެޓްރޯލްކުރާ ފުލުހުންނަށް އަންގައިފި ކަމަށެވެ. ހިތަށް އެރިއެވެ. އަހަރެން ގޮސް އެގެއަށް ވަންނާނީ އެވެ. އެކަމަކު ކުރިއަށް ނެގި ފިޔަވަޅުގައި ހުއްޓެން ޖެހުނީ ޤާނޫނާއި ޤަވާއިދުތަކާއި މެދު ވިސްނާލާފައެވެ. މި ބޯމަހާލެވެނީ ނުބެހޭ ކަމަކާއޭ ހީވެފައެވެ.

އިރުކޮޅަކުން އެހެން ފިރިހެނަކު ދުވެފައި އައިސް އެގޭދޮރުން ވަދެގެން ސިޑިން މައްޗަށް އަރައިގެން ހިނގައްޖެއެވެ. އަނެއްކާވެސް ރުއިމާ ހަޅޭކާއި ޒުވާބުގެ އަޑުވީ ގަދައެވެ. ބަންލާފައި ދޮރުފަތެއް ޖެހި އަޑުވެސް އިވުނެވެ. ބިއްލޫރި އެއްޗެހިތަކެއް ތަޅައިގެން ދިޔައަޑުވެސް އިވުނެވެ. ދެން ފެނުނީ ދުވެފައި އައިސް ގެއަށް ވަތް ފިރިހެންމީހާ އެންހެން ފިރިހެނެއްގެ އަތުގައި ހިފައި ދަމާ ކޫއްތާފައި ސިޑިމަތިން ގެނެސް ގޭގެ މައިދޮރުން ބޭރަށް ކޮއްޕައި ވައްޓާލި މަންޒަރެވެ. އޭރު ވެއްޓުނު އެފިރިހެންމީހާގެ އަތްތިލައިންނާއި، މޫނުމަތިން ލޭތައް އޮހޮރެއެވެ. ޒަޚަމްތައް ހުރީ ރޮލަށެވެ. އޭނާއަށް ތަދެއް އިހްސާސްވާހެނެއް ހިޔެއް ނުވެއެވެ. ފެންނަ ފެނުމަށްވެސް އޭނާ ހުރީ މަސްތުވެފައިކަން އެނގެއެވެ. ވެލި ފޮޅަމުން ތެދުވެ ދެންވެސް އޭނާ ދިމާކޮށްލީ އެގޭ ދޮރަށެވެ. އެކަމަކު އެހެން ފިރިހެނަކު ހުރީ ދޮރު ބައްދައިގެންނެވެ. އަތްމަޅައިގެންފައި " ދެން މިގެއަށް ވަދެފިއްޔާ މަރާލާނަމޭ! ރައްކާވާށޭ!" ކިޔާފައި އޭނާ ބަރުއަޑުން ހަޅޭ ލަވައިގަތެވެ.

ޒަޚަމްވެފައިވާ އެފިރިހެންމީހާ ފެނުމުން އަހަރެންވީ ހައިރާނެވެ. އެއީ އަހަރެންދެކެ ފަރިތަ އަދި މަދުމަދުން ބައްދަލުވެ، ވާހަކަވެސް ދެކެވިފައިވާ މީހަކަށް ވާތީއެވެ. މާރާމާރީ ހިންގައި ތަޅާފޮޅުމަކީ ދުވަހަކުވެސް އޭނާގެ ކިބައިން ފެނިދާނެ ކަމެއް ކަމުގައި އަހަރެންނަށް ހީކުރެވިފައިވެސް ނުވާތީއެވެ. އޭނާގެ މިޒާޖާއި ގުޅޭ ކަމަކަށް ނުވާތީއެވެ. އެކަމަކު މީހަކު ފެންނަ ގޮތަކުން އޭނާގެ ދިރިއުޅުމާއި އަޚުލާޤެއް ނޭނގޭނެތާއެވެ. އަހަރެންނަށްވެސް މިވީ އެހެންނެވެ. ބައްދަލު ނުވާތާ އެތައް އަހަރެއް ފަހުން މިފެނުނީ މުޅިން ތަފާތު ސޫރައެއްގައެވެ.

އެއީ ޔާސިރެވެ. އޮލިމްޕަހުގެ ސްޓޭޖް ޝޯވތަކުގެ ތެރެއިން ފެނުނު ކޮމޭޑިއަން އެކެވެ. އޭނާގެ ފަންނާއި ހުނަރު މޮޅުކަން އޭނާ އެރި ފުރަތަމަ ޝޯވ އިންވެސް ހާމަކޮށްދިނެވެ. އެއާއި އެކު އޭނާ ވެގެން ދިޔައީ މީހުންގެ މުނިފޫހި ފިލުވައި ދިނުމުގައި، އެފަދަ ދެވަނައެއް ނެތް މީހަކަށެވެ. ދިރިއުޅުމުގައި ދިމާވާ ހިތްދަތިކަމާއި އެކަނިވެރިކަން މަތިން ހަނދާން ނައްތާލައި ހިތްހަމަ ޖައްސާލަން ބޭނުންވާ ކޮންމެ މީހަކަށް އޭނާ ކުޅެފައިވާ ސްޓޭޖް ތަމްސީލްތަކާއި ފިލްމު ތަކަކީ ރަނގަޅު ބައިވެރިއެކެވެ.

ހިތާމައިން ހަލާކުވެފައިވާ މީހަކުވެސް އޭނާ ހެއްވައިލާނެއެވެ. ހާސްކަމާއި ބިރުވެރިކަމުގެ ދުނިޔެއިން ނެރެދޭނެއެވެ. މީހުން އޭނާ އާއި މެދު ބުނެ އުޅުނެވެ. އޭނާއަކީ އުފަންވިއިރުވެސް ކޮމޭޑިއަން އެކެވެ. ކޮންމެ ކަމެއްވެސް ކޮންމެ ހާލަތެއްވެސް އޭނާ މަޖާކޮށްލައި ފާނެއެވެ. ކޮންމެ ކަމަކާއި މެދު އޭނާ ދެކޭ ނަޒަރަކީ ޕޮޒިޓިވް ވިސްނުމެކެވެ. އެނޫން މީހަކަށް އެހާ އުފަލަކު ނޫޅެވޭނެއެވެ. އޭނާގެ ސްޓޭޖް ތަމްސީލްތަކުގެ ތެރެއިން އޭނާ ބުނި ޖުމުލައެއް މިއަދުވެސް ހަނދާން އެބަހުއްޓެވެ. އޭނާ ބުންޏެވެ. " މިދުނިޔޭގައި އެންމެ އުފަލުގައި އުޅޭނީ ކުޑަކުދީންނާއި މޮޔައިންނެވެ. އެމީހުންނަކަށް ދިރިއުޅުމުގައި ވިސްނަންޖެހޭ ކަމެއް ނޯންނާނެއެވެ. ކޮމޭޑިއަންއަކަށް ނުވިނަމަ އޭނާ ވާނީ މޮޔައަކަށެވެ." އެރޭ އެންމެންވެސް އެވާހަކަ އަޑުއަހާފައި ހުނެވެ. އެކަމަކު އެވާހަކައިގައި ފޮރުވިފައިވާ މާނަ އެނގޭނީ ކާކަށް ހެއްޔެވެ؟

އަހަރެން ފެނުމުން އޭނާ ދިނީ ރަކި ހިނިތުންވުމެކެވެ. ވާހަކައެއް ނުދައްކައެވެ. އޭރުވެސް އަނެއް ފިރިހެންމީހާ ހުރީ ގޭގެ ދޮރުމަތީގައެވެ. ހީވާގޮތުން އޭނާ އެތަނުގައި މަޑުކުރީ ދެވަނަ ފަހަރަށްވެސް ޔާސިރު އެގެއަށް ވަނުމަށް މަސައްކަތްކޮށްފާނެތީ އެކަން ހުއްޓުވުމަށެވެ. ޔާސިރުވެސް އެއްވެސް އެއްޗެއް ނުބުނެ ހުރީއެވެ.

ވެގެން އުޅޭ ގޮތް އަވައްޓެރިއެއްގެ ގާތުގައި އަހާލީމެވެ. އޭނާ ބުނީ އެ އެޕާޓްމަންޓަކީ ޔާސިރުގެ ކުރީގެ އަނބިމީހާ އާއި ދަރިފުޅާއި އެ އަންހެންމީހާގެ އާއިލާގެ މީހުން ދިރިއުޅޭ އެޕާޓްމަންޓް ކަމަށެވެ. ޔާސިރުގެ އަންހެނުން އެހެން ފިރިހެނަކާއި ހިތާވެ ޔާސިރު ގާތުން ވަރިވެގެން އައުމުން އޭނާގެ ދުނިޔެ ބަނަވީއެވެ. ހިތާމަތަކުގައި ބައިވެރިވެ އޭނާއަށް މަގު ދައްކާނެ މީހަކު ނެތުނީއެވެ. އެންމެ އުފާކޮށްދީ އެކަނިވެރިކަން ފިލުވައިދީ އުޅުނުނަސް އޭނާގެ އެކަނިވެރިވީ ވަގުތު ހެއްވާލައި އުފާކޮށްލައިދޭނެ މީހަކު ނެތީއެވެ.

އެރީތިކަމާއި ޒުވާންކަން މިހާރަކު ނެތެވެ. އެއީ ޔާސިރުކަން އެނގޭނީވެސް އޭނާ ދެކެފަރިތަ ދަންނަ މީހަކަށެވެ. ބޮލުގެ އިސްތަށިގަނޑާއި ތުނބުޅި ދިގުވެ ހޭވިފައެވެ. ލައިގެން ހުރި ގަމީސް ދައުވެ ކަޅުވެފައެވެ. ލައިގެން ހުރި ޖިންސް ދޫވެ ޅިނދުކަށިމަތިން ވެއްޓިފައި އޮތް އިރު ލައިގެން ހުރި ބޮކްސާގަނޑުވެސް އޮތީފެންނާށެވެ. ހުސްފައިގައި ހުރި އިރު، ދެފައިގައި ހިފާފައިހުރި ބޯ ހިރަފުހުގެ ސަބަބުން ހީވަނީ އިސްޓާކީނަކަށް އަރައިގެން ހުރިހެންނެވެ.

އުފާވެރި ދިރިއުޅުމުގެ ތެރެއަށް ފުންމާލީ ދުރުން އައި އެހެން ފިރިހެނެކެވެ. މުއްސަނދިކަމާއި ތަނަވަސްކަމުގެ ދަޅަތައް ދައްކައި ޔާސިރުގެ އަނބިމީހާ ހައްލައިލީއެވެ. ރެސްޓޯރެންޓްތަކާއި ރިޒޯޓުތަކަށް ރައްޓެހިކަމުގައި އޭނާ ގޮވައިގެން ދާންފެށީއެވެ. ޔާސިރުގެ ނިކަމެތިކަމާއި ނުފުދުންތެރިކަން ވިސްނައިދިނީއެވެ. އޭނާގެ ޗާލާކީ ދިރިއުޅުމުގެ ދަޅަތަކަށް ޔާސިރުގެ އަނބިމީހާ ދަހިވެތިކުރުވީއެވެ.

އެކުއުޅެވޭތޯ ޔާސިރު ބެލިއެވެ. ނަސޭހަތް ދިނެވެ. ދޫ ދިނެވެ. ދަރިފުޅަކަށްޓަކައިވެސް ވަކި ނުވުމަށް އާދޭސްކުރިއެވެ. އެކަމަކު އަނބިމީހާ އެކަމެއް ނުހުއްޓިއެވެ. ވަރިވީވެސް އޭނާ ކޯޓަށް ގޮހެވެ. ކޯޓުގައި އަނބިމީހާ ދެއްކި ވާހަކަތައް ތޫނު ކަށިތަކެއް ފަދައިން ހިތަށް ހެރުނީއެވެ. ކޯޓުގައި ޔާސިރުގެ އަންހެނުން ބުނީ ޔާސިރު ހަރަދު ނުކުރާކަމަށެވެ. އަދި އޭނާއަށް ބޭނުންވާ އެއްޗެހި ހޯދައި ނުދޭ ކަމަށެވެ. ކައިވެނީގެ އެންމެ މުހިއްމު އެއްގުޅުމަކީ އަނބިފިރިކަމުގެ ގުޅުންކަމަށާއި އޭނާ ހިތްހަމަޖެހޭ ވަރަށް ޔާސިރަށް އެކަންވެސް ކޮށްނުދެވޭ ކަމަށެވެ. ކޯޓު ރޫމުގައި ޔާސިރު އިންނަން ޖެހުނީ ލަދުން އިސްޖަހައިގެންނެވެ. ބުނާނެ އެއްޗެއް ހަދާނެ ގޮތެއް ނޭނގިފައެވެ.

އަނބިމީހާ ވަކިވުމުން ދަރިފުޅުވެސް ދޭން ޖެހުނީ އޭނާއަށެވެ. ތުއްތު ކުއްޖަކު މަންމަ ބަލަން ހުއްޓައި ކޯޓުންވެސް ބައްޕަ އާއި ހަވާލު ނުކުރާނެތީ ޔާސިރަށް އެހަނގުރާމަ ކުރުމުގެ ބޭނުމެއް ނުވިސްނުނެއެވެ. އޭނާ ހިތާމައިން ރުޔެވެ. ހިތް ހަލާކުވެ ގިސްލިއެވެ. އެކަމަކު އޭނާ ހެއްވާލަދޭނެ މިހަކު ނައެވެ.

އެކަނިވެރި އާވާރާ ރޭތަކުގައި އޭނާގެ ބައިވެރިޔަކަށްވީ ސިނގިރޭޓެވެ. ފަހުން މަސްތުވާތަކެއްޗެވެ. އެއާއި އެކު އެއްދުވަހުން އަނެއް ދުވަހަށް އޭނާގެ ދިރިއުޅުން ދިޔައީ އަނދިރިކަން ނޭނގޭ ފުންވަޅުގަނޑަކަށް ވެއްޓެމުންނެވެ. ޔާސިރުގެ އެތައް ރައްޓެހިންނެއްވެސް ތިއްބެވެ. އޭނާގެ ހާލު އަހައި ހިއްވަރެއް ދޭނެ މީހަކު ނެތެވެ. ޖެއްސުމަކަށް ހަދާފައިވެސް އެމީހުން ބުނެލާ ބަސްބަހުން ޔާސިރުގެ ހިތް ދިޔައީ ކުދި ކުދިވަމުންނެވެ. އަނބިމީހާ ނުބެލެހެއްޓުނު، އޭނާގެ ބޭނުންތައް ފުއްދައި ނުދެވުނު މީހެކޭ، ފިރިހެނަކަށްވެސް ނުވެއޭ ބުނެ ރައްޓެހިން ކުރި މަލާމާތްތަކުންނެވެ.

މަސްތުގެ ދުނިޔެއަށް ގެނބެމުން ދިޔަވަރަކަށް ޔާސިރުގެ ދިރިއުޅުން ދިޔައީ ހަލާކުވަމުންނެވެ. އެންމެ ފަހުން ވަޒީފާއިންވެސް ކަނޑާލީ އޮފީހުގެ މަސައްކަތަށް ފަރުވާކުޑަވުމާއި، މަސްތުވާތަކެތި ބޭނުން ކުރާ ކަމަށް ކުރެވުނު ތުހުމަތުތަކާއި އެކުގައެވެ.

ހަމަ ހޭވެރިކަން ހުންނަ ކޮންމެ ހާލަތެއްގައި ޔާސިރު ދަރިފުޅު ދެކިލަން އާދެއެވެ. އެކަމަކު އެފަދަ ކޮންމެ ދުވަހެއްގައި ހިނގާނީ މިއަދު މިހިނގިފަދަ ހަނގުރާމައެކެވެ. ޔާސިރު ދާންޖެހޭނީ ގައިން ލެއި ކޮށާލައިގެންނެވެ. ދަރިފުޅު ގާތުގައި މަންމަ ބުނާނީ ބައްޕައަކީ ފަތްބޯ މީހެއް ކަމަށެވެ. ގޮތްކުޑަ އަނިޔާވެރިއެއް ކަމަށެވެ. ދަރިފުޅު ބޭނުން އެއްވެސް ކަމެއް ކޮށްދެވޭނެ މީހެއް ނޫންކަމަށެވެ.

ޔާސިރަށް ދަރިފުޅާއި ބައްދަލު ކުރުމުގެ ފުރުޞަތު ދިނުމަށް ކޯޓުން އަންގާފައި އޮތް ނަމަވެސް ޔާސިރުގެ އަންހެނުން އެގޮތެއް ބޭނުމެއް ނުވެއެވެ. އޭނާ ބޭނުންވަނީ އޭނާވެސް ޔާސިރު އާއި ވަކިވި ފަދައިން ދަރިފުޅުވެސް ޔާސިރާއި މުޅިން ވަކިކޮށްލާށެވެ.

ވީކަމެއް ވެ ނިމުނު ފަހުން، ފުލުހުންގެ ދެމީހަކު އެ ގޯޅިގަނޑުގެ ތެރެއަށް އައިސް ވަނެވެ. އެމީހުން އައިސް ހިފީ ޔާސިރުގެ އަތުގައެވެ. އެއްވެސް އެއްޗެއް ޔާސިރުވެސް ނުބުނެއެވެ. އެމީހުންނާއިއެކު ގޮސް ޖިޕަށް އެރިއެވެ. އޭނާ ހަޅޭކެއް ނުލަވައެވެ. ގަދައެއް ނުހަދައެވެ.

"މިއަދުގެ ޑްރާމާ މިނިމުނީ. ދެން އަންނަ ހަފްތާގައި އަނެއްބައި." ކައިރީ ހުރި ގޭގެ ދޮރުމަތީގައި ހުރި އަވައްޓެރިއަކު ބުންޏެވެ.

އެހެންވީމާ އަހަރެންނަށް މިފެނުނީ، އާދަވެ ހިނގާ ޑްރާމާއެއްގެ އެއްބައޭ ހިތަށް އެރިއެވެ. އެކަމަކު ޔާސިރުގެ ހާލަށް ހިތުގައި ހަމްދަރުދީ އުފެދުނެވެ. އަތްނބަކާއި ދަރިއެއްގެ ވަކިވުމުން ފިރިހެނަކަށް ކުރި އަސަރާއި މެދު ވިސްނާލުމުންނެވެ.

– ނިމުނީ –