ކޮވިޑް 19ގެ ސަބަބުން އަސަރު ކުރުވި އެއް ދާއިރާ އަކީ މުނިފޫހިފިލުވުމުގެ ދާއިރާއެވެ. ގިނަ ތަރިންތަކެއް މި ދާއިރާ ދޫކޮށް ގޮސްފައިވާއިރު، އެތައް ފިލްމެއްގެ މަސައްކަތް ހަތް މަހަށް ވުރެ ދިގު މުއްދަތަކަށް ހުއްޓާލަންޖެހިފައި ވެސް ވެއެވެ.
ގިނަ މީހުން އެއްތާކަށް އެއްވުން މަނާ ކޮށްފައިވާތީ، ކައިވެނި ހަފްލާތަކަކީ މުޅި ދުނިޔޭގައި ވެސް ބޭއްވުން މަދުކޮށްލި އެއްކަމެވެ. މީގެ ސަބަބުން ބޮޑެތި ހަފްލާތަކާއެކު ކައިވެނި ކުރަން ރާވައިގެން ތިބި މީހުން އަދި ތިބީ ހަމަ ކުރިއަށް ދާންވީ ގޮތެއް ނޭނގިފައެވެ.
އެގޮތުން ބޮލީވުޑްގެ ބައެއް ތަރިންވެސް މި އަހަރު ކައިވެނި ކުރާ ވާހަކަ ދައްކާފައިވާއިރު އެމީހުންގެ ކައިވެނިތައްވެސް ވަނީ ލަސްކުރަންޖެހިފައެވެ. މި ބަލާލަނީ ކޯވިޑް ޕެންޑަމިކްގެ ސަަބަބުން ކައިވެނި ލަސްކޮށްފައިވާ މަޝްހޫރު ބައެއް ތަރިންނަށެވެ.
ރަންބީރު – އާލިޔާ
ރަންބީރް ކަޕޫރާއި އާލިޔާ ބަޓް އެކަކު އަނެކަކު ދެކެ ލޯބިވެފައި ވަނީ އެމީހުންގެ ފިލްމު "ބްރަމަސްޓްރާ" ގެ ޝޫޓިން އިންނެވެ. އަދި އެދެމީޙުން މިއަހަރު ޑިސެމްބަރ މަހު ކައިވެނި ކުރާނެ ކަމުގެ ހަބަރު ފެތުރިފައިވާއިރު، ތަގުދީރުގައި އޮތީ އެހެން ގޮތެކެވެ. އެންކަމުން ދެތަރިންމިހާރު އަންނަ އަހަރަށް ދުވަހެއް ހޯދުމުގެ މަސައްކަތް ކުރަމުންދާ ކަމަށްވެސް ބައެއް ޚަބަރުތައް ބުނެއެވެ. އަދި އާލިޔާ މިހާރު މިވަނީ ލޯބިވެރިޔާ ރަންބީރާއި އެއް ބިލްޑިންގުން ފްލެޓެއް ގަނެފައެވެ.
އަރުޖުން ކަޕޫރު – މަލައިކާ
މަލައިކާ އާއި އަރުޖުން ލޯބީގެ ގޮތުން ގުޅިގެން އުޅޭތާ އެތައްދުވަހެއް ވެފައި ވާއިރު، ސޯޝަލް މީޑިއާގައި މި ދެމީހުންގެ ދިރިއުޅުމުގައި ވާހާކަމެއް ހެން ހިއްސާކުރެއެވެ. އަދި މި ޖޯޑު ފާހަގަވެފައި ވަނީ ސޯޝަލްމީޑިއާގައި ވެސް މާފޮޅުވައި ލޯބި ދެއްކުމަށް އެވަރެއް ނެތް ފަދަ ޖޯޑަކަށެވެ. މި ދެމީހުންގެ " ސްޕްރިންގ ވެޑިންގ" ރާވާފައި ވަނީ ކްރިސްޓިއަން ހަފްލާއެއްގެ ގޮތަށް ގެންދަން ކަމަށްވެސް ބައެއް ރިޕޯޓުތައް ބުނެއެވެ.
ވަރުން ދަވަން – ނަތާޝާ ދަލާލް
ވަރުން ދަވަން އާއި ނަތާޝާ ދަލާލް އަކީ ކުޑައިރުގެ ދެ ލޯބިވެރިންނެވެ. ބޭރު ގައުމެއްގައި ޑެސްޓިނޭޝަން ވެޑިން ހަފްލާއެއްގައި މި ދެތަރިން މިއަހަރުގެ މަރޗް މަހު ކައިވެނި ކުރަން ތައްޔާރުވަމުން ދިޔަ ކަމަށް މީޑިއާތަކުން ވަނީ ރިޕޯޓު ކޮށްފައެވެ. ނަމަވެސް ކޯވިޑްގެ ބަލިމަޑުކަން ލައިގަނެ މި ޕްލޭންވެސް ޖެހުނީ ފަސްކުރާށެވެ.
ރޯހްމަން ޝާވްލް – ސުޝްމިތާ ސެން
ދުވަހަކުވެސް ދިރިއުޅުން ފުރިހަމަ ކުރުމަށް ފިރިހެނެއްގެ ބޭނުން ޖެހޭނެކަމަށް ހީނުކުރާ ކަމަށްބުނި ސުޝްމިތާއަށް، އެންމެ ފަހުން ދުރުނުވެވޭ ވަރަށް ލޯބި ވެވުނީ އޭނާއަށްވުރެ 15 އަހަރު ހަގު މީހަކާއެވެ. މި ދެމީހުންގެ ގުޅުމަށް ދެ އަހަރު ވެފައިވާއިރު، ރޯހްމަން އަކީ ސުޝްމިތާގެ ކުދިންނާއި ވެސް ވަރަށް ގުޅޭ މީހަކަށް ވަނީ ވެފައެވެ. މީޑިއާ ރިޕޯޓުތައް ބުނާގޮތުގައި މިދެމީހުން ތައްޔާރުވަމުން ދަނީ ފިނިމޫސުމުގެ ކައިވެންޏެއް ނުވަތަ ވިންޓާ ވެޑިން އަކަށެވެ.
