ހަޔަރ އެޑިއުކޭޝަން މިނިސްޓްރީގެ ޑެޕިއުޓީ މިިނިސްޓަރުކަމުގެ މަޤާމުގައި އިންނެވި އާމިނަތު މުޙައްމަދު ސަލީމްވެސް އޭނާ ނިސްބަތްވެވަޑައިގަންނަވާ ޖުމްހޫރީ ޕަޓީ ދޫކޮށް އަންނަ ރިޔާސީ އިންތިޚާބުގައި ރައީސް އިބްރާހީމް މުޙައްމަދު ޞާލިޙަށް ތާޢީދުކުރައްވަން ނިންމަވައިފިއެވެ.
ޖުމްހޫރީ ޕާޓީގެ ސްލޮޓެއްގައި، ހަޔަރ އެޑިއުކެޝަން މިނިސްޓްރީގެ ޑެޕިއުޓީ މިނިސްޓަރުކަމުގެ މަޤާމުގައި އިންނެވި އާމިނަތު މުޙައްމަދު ސަލީމް (ސޯނީ) ވަނީ އޭނާ ރައީސް ޞާލިޙަށް ތާޢީދުކުރެއްވިކަން ހާމަކުރައްވައި ޖުމްހޫރީ ޕާޓީން ވަކިކޮށްދިނުން އެދި އެޕާޓީގެ ސެކްރެޓަރީ ޖެނަރަލް ޢަލީ އާރިފަށް ސިޓީއެއް ފޮނުއްވާފައެވެ.
ޖުމްހޫރީ ޕާޓީގެ ކައުންސިލްގައިވެސް ހިމެނިވަޑައިގަންނަވާ ސޯނީގެ ސިޓީގައި ވަނީ ރައީސް އިބްރާހީމް މުޙައްމަދު ޞާލިޙްގެ ސަރުކާރަކީ މިހާތަނަށް ފެނުނު އެންމެ އަމާން އޮމާން ވެރިކަން ކަމަށެވެ. އަދި ރާއްޖޭގެ ތާރީޚުގައިވެސް ތަޢުލީމީ ޤާބިލް ޖީލެއް ބިނާކުރުމަށް އެންމެ ގިނަ މަސައްކަތް ކުރީ މިސަރުކާރުންކަމަށް ސޯނީ ވިދާޅުވެފައިވެއެވެ.
Kuriah oiy 2023 riyaasee inthihaabugai Raees @ibusolih ah thaaeedhu kuraathy adhi e masakkathugai amalee gothun ulhen beynun vaathy miadhu JP ge membarukamun isthiufa dheefeemeve. pic.twitter.com/BlOPDRhTKH
— Sony Adi Iad (@Soniy_adi) March 30, 2023
ސޯނީގެ އިތުރުންވެސް ޖުމްހޫރީ ޕާޓީގެ ސްލޮޓުގައި ސަރުކަރުގެ ސިޔާސީ އެކިއެކި މަޤާމުތަކުގައި ތިއްބެވި ބައެއް ބޭފުޅުން ވަނީ ޖުމްހޫރީ ޕާޓީން ވަކިވެ ރައީސް ޞާލިހަށް ތާޢީދުކުރަން ނިންމާފައެވެ. އެބޭފުޅުން މިކަން ހާމަކުރައްވަން ފެއްޓެވީ އަންނަ ރިޔާސީ އިންތިޚާބުގައި ރައީސް ޞާލިޙާ ވަކިން ވާދަކުރައްވަން ޖުމްހޫރީ ޕާޓީގެ ލީޑަރު ޤާސިމް އިބްރާހީމް ނިންމަވައި ޖޭޕީގެ ޓިކެޓު ހޯއްދަވަން ހުށަހެޅުއްވި ހިސާބުންނެވެ.
ޖޭޕީން އެންމެފަހުން ވަކިވި ބޭފުޅުންގެތެރޭގައި އެމްޓީސީސީގެ ސީއީއޯ އާދަމް އާޒިމާއި އެމްޑަބްލިޔުއެސްސީގެ އެމްޑީ ޙަސަން ޝާހް ހިމެނިވަޑައިގަންނަވައެވެ.
