ރ. ފުއްގިރި މައްސަލާގައި އިދިކޮޅު ރިޔާސީ ކެނޑިޑޭޓް ރައީސް ޔާމީނަށް ކުރާ ދައުވާގައި ޝަރީއަތުގެ ކުރީގެ ހުށަހެޅުންތަކާ މެދު ކްރިމިނަލް ކޯޓުން ނިންމި ގޮތް ވެސް ޔާމީންގެ ފަރާތްޕުޅުން އިސްތިއުނާފުކުރި މައްސަލައިގެ އަޑު އެހުން މާދަމާ ފެށުމަށް ތާވަލް ކޮށްފިއެވެ.
ހައިކޯޓުގެ އޮފިޝަލަކު ވިދާޅުވީ ފުއްގިރި މައްސަލައިގައި ޝަރީއަތުގެ ކުރިން ރައީސް ޔާމީންގެ ފަރާތުން ހުށަހެޅި ހުށަހެޅުންތައް ބަލައި ނުގަތް މައްސަލަ ހައިކޯޓުން ތާވަލް ކޮށްފައި ވަނީ މާދަމާ ހެނދުނު 10:30 އަށެވެ. މާދަމާގެ ޝަރީއަތާއި ގުޅޭގޮތުން ރައީސް ޔާމީންގެ ޤާނޫނީ ވަކީލުންގެ ޓީމުގައި ހިމެނޭ އާދަމް ޝަމީމް ވިދާޅުވީ މާދަމާ (28 މާރިޗުގައި) ހައިކޯޓުގައި އޮންނަ އަޑުއެހުމަކީ އޮންލައިންކޮށް ބާއްވާ އަޑުއެހުމެއް ނޫން ކަމަށެވެ. އެއީ ހައިކޯޓަށް ޙާޟިރުވެގެން ކުރިއަށް ގެންދާ އަޑުއެހުމެއް ކަމަށެވެ. އެހެންވީމާ މާދަމާ ރައީސް ޔާމީން ކޯޓަށް ވަޑައިގަންނަވާނެކަމަށެވެ.
މާދަމާ (28 މާރިޗުގައި) ހައިކޯޓުގައި އޮންނަ އަޑުއެހުމަކީ އޮންލައިންކޮށް ބާއްވާ އަޑުއެހުމެއް ނޫން. އެއީ ހައިކޯޓަށް ޙާޟިރުވެގެން ކުރިއަށް ގެންދާ އަޑުއެހުމެއް. އެހެންވީމާ މާދަމާ ރައީސް ޔާމީން ކޯޓަށް ވަޑައިގަންނަވާނެ ވާހަކަ މަޢުލޫމާތަށްޓަކައި ދަންނަވަން. pic.twitter.com/LQ0oPOZclh
— 𝗔𝗗𝗔𝗠 𝗦𝗛𝗔𝗠𝗘𝗘𝗠 (@AdamShameem) March 27, 2023
ފުއްގިރި މައްސަލައިގައި ޔާމީންގެ މައްޗަށް ދައުވާ އުފުލީ މިދިޔަ އަހަރުއެވެ. އެމައްސަލައިގެ އަޑުއެހުންތައް ކުރިއަށް ނުގެންގޮސް ގިނަ ދުވަސްތަކަކު ބޭއްވުމަށްފަހު އަލުން ޝަރީއަތް ހިންގަން ފެށީ ޔާމީންގެ މައްޗަށް ވ.އާރަށް މައްސަލައިގައި 11 އަހަރުގެ ޖަލު ހުކުމެއް އިއްވުމަށް ފަހުއެވެ. ފުއްގިރި ކުއްޔަށް ދިން މައްސަލަ އާއި ގުޅިގެން ޔާމީނާއި ސަން ކޮންސްޓްރަކްޝަން ކުންފުންޏާއި ސަން އިންވެސްޓްމަންޓްގެ މައްޗަށް ވެސް މަނީ ލޯންޑްރިންގެ ދައުވާކުރެއެވެ. އަދި މއ. ކުރިކީލަހިޔާ އަހުމަދު ކްރިކް ރިޒާގެ މައްޗަށް ރިޝްވަތު ދިނުމުގައި މެދުވެރިއަކަށް ވުމުގެ ދައުވާ ވެސް ކުރެއެވެ.
ޔާމީންގެ މައްޗަށް މަނީލޯންޑަރިންގެ ކުށުގައި ހިމެނޭ 3.4 މިލިއަން ޑޮލަރު 6 މަސް ދުވަހުގެ ތެރޭގައި ދައްކަން ހުކުމް ކޮށްފައިވަނީ ފަތުރުވެރިކަމަށް ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން އުފުލި ދެ ދައުވާ ސާބިތުވުމާއި ގުޅިގެންނެވެ.
ކްރިމިނަލް ކޯޓުން ކުރި ޢަމުރުގައިވާގޮތުން ވ.އާރަށް ކުއްޔަށް ދިނުމުގެ ރިޝްވަތަށް އެއް މިލިއަން ޑޮލަރު ނަންގަވައި، އެ ފައިސާ އެޗްއެސްބީސީއަށް ޖަމާކޮށް، އަދި އިތުރު ފައިސާއާއެކު ބީއެމްއެލަށް ޖަމާކޮށް، އަނެއްކާވެސް އިތުރު ފައިސާއާއެކު އިސްލާމިކް ބޭންކުގައި އޮތް ޔާމީންގެ އެކައުންޓަށް ޖުމްލަ 1،295،000 ޑޮލަރު 2017 ފެބުރުއަރީ 21ގައި ޖަމާކޮށްފައިވާކަމަށެވެ. އޭގެ ފަހުން އިސްލާމިކް ބޭންކުގައި އޮތް އިންވެސްޓްމަންޓް އެކައުންޓަށް 2021 މާޗް 14ގައި އިތުރު ފައިސާއާއކު ޖުމްލަ 3،413،230 ޑޮލަރު 36 މަސް ދުވަހުގެ މުއްދަތަށް އިންވެސްޓްކޮށްފައިވާކަމަށެވެ.
ޔާމީން 11 ޖަލަށްލާން ކުރި ހުކުމުގެ އިސްތިއުނާފަށް ހުށަހަޅާފައި ވިޔަސް، އެ މައްސަލަ ބަލައިގަތުމާ މެދު ހައި ކޯޓުން އަދި ވަކި ގޮތެއް ނުނިންމައެވެ.
