ކޮންމެ ފަދަ ޙާލަތެއްގައިވެސް ރާއްޖެ ދޫކުރައްވާ ވަޑައިނުގަންނަވާނެކަމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ރައީސް ޔާމީން މިހެން ވިދާޅުވެފައިވަނީ، އިދިކޮޅު ޕީއެންސީގެ ރައީސް އަދި މިވަގުތު އިދިކޮޅު ކޯލިޝަން ހިންގެވުމާއި ހަވާލުވެހުންނެވި ޢަބްދުއްރަހީމް ޢަބްދުﷲ، ރައީސް ޔާމީނާއި މާފުށީ ޖަލުގައި ބައްދަލުކުރެވުމުން ދެއްކި ވާހަކަފުޅުގައިކަމަށް ޕީޕީއެމް އިން ބުނެއެވެ.
މިގޮތުން ދިވެހި ރައްޔިތުންގެ ހައްގުގައި ވާންޖެހުނު ކޮންމެ ޤުރުބާނީއެއް ވާން ތައްޔާރަށް ހުންނެވިކަމަށާއި، ކޮންމެ ފަދަ ޙާލަތެއްގައިވެސް ރާއްޖެ ދޫކުރައްވާ ވަޑައިނުގަންނަވާނެކަމަށް ރައީސް ޔާމީން ވިދާޅުވިކަމަށް ޕީޕީއެމް އިން ބުނެއެވެ. އަދި ލޯކަލް ކައުންސިލް އިންތިޚާބުގައި މިސަރުކާރުން ބަލިކުރުމަށްޓަކައި ސާބިތުކަމާއި، ހިތްވަރާއެކު ރައްޔިތުން މަސަކަތްކޮށްދެއްވުމަށް ރައީސް ޔާމީން ގޮވާލެއްވިކަމަށްވެސް ޕީޕީއެމް އިން ބުނެއެވެ.
ރައީސް ޔާމީނަށްޓަކައިވެސް އަދި މިޤައުމަށްޓަކައިވެސް މިއަދު ކޮށްދެވޭނެ އެންމެ މުހިންމު މަސައްކަތަކީ ކައުންސިލް އިންތިޚާބުގައި އެމްޑީޕީއާއި ކޯލިޝަން ސަރުކާރު ބަލިކުރުންކަމަށާއި، ވޯޓުފޮށިން އެ ނަތީޖާ ދައްކައިދެއްވުމަށް ރައީސް ޔާމީންގެ ސަޕޯޓަރުންނަށައި، ހުރިހާ ރައްޔިތުންނަށް އެމަނިކުފނު ގޮވާލެއްވިކަމަށްވެސް ޕީޕީއެމް އިން ބުނެއެވެ.
ރައީސް ޔާމީން މިހެން ވިދާލުވެފައި މިވަނީ އެމަނިކުފާނު ޖަލަށް ލެއްވިތާ އެއްއަހަރު ފުރުމާއިގުޅިގެން އިދިކޮޅު ކޯލިޝަނުން މުޅި ރާއްޖޭގައި ހަރަކާތްތަކެއް ހިންގަމުންދާ ދަނޑިވަޅެއްގައެވެ. މިއަދު މާފުށީ ބޭރުގައާއި ރާއްޖޭގެ އެކި ކަންކޮޅުތަކުގައި އިދިކޮޅު ކޯލިޝަނަށާއި ރައީސް ޔާމީނަށް ސަޕޯޓްކުރާ މީހުން ވަނީ މުޒާހަރާކޮށްފައެވެ.
ރައީސް ޔާމީން ގެންދަވަނީ އެމަނިކުފާނުގެ ސަރުކާރުގައި އެމްއެމްޕީއާރުސީ މެދުވެރިކޮށް ކޮރަޕްޝަން ހިންގިކަމަށް ބުނެ އުފުލި މަނީލޯންޑަރިންގެ ކުށް ސާބިތުވެ 5 އަހަރު ދުވަހުގެ ޖަލު ޙުކުމެއް ތަންފީޒްކުރައްވަމުންނެވެ. އެމަނިކުފާނު ހުންނެވީ މާފުށީ ޖަލުގައެވެ.
ކޮމެންޓު ފޮނުވާ