ވެރިކަންކުރާ މައި ޕާޓީ، އެމްޑީޕީއާއި، އިދިކޮޅު ޕީޕީއެމްއާއި ހަމައަށް އަދެވޭ ވަރުގެ ފެންވަރެއް ޖުމްހޫރީ ޕާޓީގައި އަދި ނެތްކަމަށް އާރުޑީސީގެ މެނޭޖިން ޑިރެކްޓަރ މޫސާ އަލި މަނިކު ވިދާޅުވެއްޖެއެވެ.
އޭނާ މިހެން ވިދާޅުވީ ކުރިއަށް އޮތް ރިޔާސީ އިންތިޚާބުގައި އެމްޑީޕީއާއި، ރައީސް ޞާލިހަށް ތާއީދު ނުކޮށް އިންތިޚާބުގައި ވަކިން ވާދަކުރުމަށް ޖުމްހޫރީ ޕާޓީން ނިންމުމާއި ގުޅިގެން ސިޔާސީ މަސްރަހަށް އައިސްފައިވަ ބަދަލުތަކާއި ގުޅިގެން ކުރި ޓުވީޓެއްގައެވެ. ބައެއް ފަރާތްތަކުން ދެކޭ ގޮތުގައި މިފަހަރުގެ އިންތިޚާބަކީ ޤާސިމަށް ވެރިކަމަށް އައުމަށް އެންމެ ބޮޑު ފުރުސަތެއް އޮތްފަހަރެވެ.
މޫކޭ ވިދާޅުވީ ރިޔާސީ އިންތިޚާބުގައި ޖުމްހޫރީ ޕާޓީން ވާދަކުރިި ނަމަވެސް ވެރިކަންކުރާ މައި ޕާޓީ، އެމްޑީޕީއާއި، އިދިކޮޅު ޕީޕީއެމްއާއި ހަމައަށް އަދެވޭ ވަރުގެ ފެންވަރެއް ޖުމްހޫރީ ޕާޓީގައި އަދި ނެތްކަމަށެވެ. ކޮންމެ ހިސާބެއް ޖެހި ކަމުގައި ވީނަމަވެސް މިފަހަރުގެ އިންތިޚާބުގައި ފެންނަނީ ޖުމްހޫރީ ޕާޓީ ހަމަ ތިންވަނައަށް ދާތަންކަމަށް އޭނާ ވިދާޅުވިއެވެ. ނަމަވެސް މިފަހަރުވެސް ޓްރައި ކޮށްލުމަކީ ހަމަ ރަނގަޅުކަމެއްކަމަށް މޫކޭ ވިދާޅުވިއެވެ.
އަދި އެމްޑީޕީ އާއި ޕީޕީއެމް ގެ ކުރިއަށް އާދެވޭ ފެންވަރަށް ޖޭޕީއެއް ނުދޭ. ކޮންމެ ހިސާބެއް ޖެހިޔަސް 3 ވަނަ ނޫން ތަނަކަށް ޖޭޕީ ފިޓެއް ނުވޭ. ޓްރައި ކޮށްލުން ގޯހެއް ނޫން.
– މޫކޭ ވިދާޅުވިއެވެ.
ސެޕްޓެމްބަރު 9 ގައި އޮންނަ ރިޔާސީ އިންތިހާބުގައި ކޯލިޝަން ހެދުމަށް ރައީސް އަދި އެމްޑީޕީގެ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހް، ޖޭޕީ އަށް ދައުވަތު ދެއްވާފައި ވަނިކޮށް އެ ޕާޓީން ވަނީ ރިޔާސީ އިންތިހާބުގައި ވަކިން ވާދަ ކުރަން ނިންމައިފައެވެ. އަދި ޖޭޕީގެ ރިޔާސީ ޕްރައިމަރީގައި ވާދަކުރުމުގެ ފުރުސަތު ވެސް ވަނީ ހުޅުވާލައިފައެވެ.
ޖޭޕީން ވަނީ ރައްޔިތުންގެ މަޖިލިހުގެ ރައީސް، އެމްޑީޕީގެ ރައީސް މުހައްމަދު ނަޝީދުގެ ފެކްޝަނާ ގުޅެން ނިންމައި، ދެ ފަރާތުން ގުޅިގެން މެނިފެސްޓޯއެއް އެކުލަވާލުމުގެ މަސައްކަތް ވެސް ފަށައިފައެވެ. ދެބައި މީހުންގެ ފުރަތަމަ ބައްދަލުވުން މިދިޔަ ބުރާސްފަތި ދުވަހު ބޭއްވި އިރު، އަންނަ ހަފްތާގައި ވެސް މިފަދަ ބައްދަލުވުމެއް ބާއްވަން ވަނީ ރާވައިފައެވެ.
