އެމްޑީޕީގެ އަސާސީ ޤަވާޢިދާ ޚިލާފަށް އެޕާޓީގެ ރައީސް މުޙައްމަދު ނަޝީދުގެ ފިކުރެއްގެ ދިރުމަށް ނިސްބަތްވާ މެމްބަރުން އިދިކޮޅު ޕީޕީއެމްއާއެކު މަސައްކަތްކުރަމުންދާތާ ކިތަންމެ ދުވަހެއް ވެއްޖެކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ)ވިދާޅުވެއްޖެއެވެ.
ނަޝީދާއި އެމަނިކުފާނުގެ ފިކުރެއްގެ ދިރުން ޙަރަކާތަށް އެންމެ ބޮޑަށް ފާޑުވިދާޅުވާ މަވޯޓާ ޝަރީފް ކުރެއްވި ޓްވީޓެއްގައި ވިދާޅުވެފައިވަނީ، އެމްޑީޕީގެ އަސާސީ ޤަވާޢިދާ ޚިލާފު ކަމަކަށް ވިޔަސް އެމްޑީޕީގެ ފިކުރެއްގެ ދިރުމަށް ނިސްބަތްވާ ރައްޔިތުންގެ މަޖިލީހުގެ މެމްބަރުން އިދިކޮޅު ޕީޕީއެމްއާއެކު ޖޮއިންޓު ޕާލަމެންޓްރީ ގްރޫޕެއްގެ ގޮތުގައި މަސައްކަތްކުރާތާ ކިތަންމެ ދުވަހެއްކަމަށެވެ. ރަސްމީކޮށް ފިކުރެއްގެ ދިރުން އުފެއްދުމުގެ މާކުރިންވެސް ރައީސް ނަޝީދުގެ ފެކްޝަނާއި ޕީޕީއެމްގެ ޕީޖީ ގްރޫޕުން އެކުގައި ވަކި އެޖެންޑާއެއްގެ ދަށުން މަސައްކަތްކުރަމުން އައިކަމަށް މަވޯޓާ ތުހުމަތުކުރެއްވިއެވެ.
MDP asaasee qavaaidhaa khilaafu kameh kamuga viyas FIkureggeDhirun aa eku PPM joint parliamentary group ehge gothuga masakkaiy kuraathaa kithamme dhuvaheh. FIkureggeDhirun ufedhumuge kurin ves @MohamedNasheed ge faction aa PPM PG ekkoh vaki agenda ehge dhashun masakkaiy kurey
— Ibrahim Shareef (@AdduShareef) March 16, 2023
އޭނާ މިހެން މިވިދާޅުވީ ޖުމްހޫރީ ޕާޓީން ކުރިއަށް އޮތް ރިޔާސީ އިންތިޚާބުގައި ރައީސް ޞާލިޙާ ވަކިން ވާދަކުރަން ނިންމުމާއެކު ނަޝީދުގެ ފުކުރެއްގެ ދިރުމާއެކު މަޖިލީހުގައި ޖޮއިންޓު ޕާލަމެންޓްރީ ގްރޫޕެއް ހަދައިގެން މަސައްކަތް ކުރަން އުޅޭ އަޑު ގަދަވެފައިވަނިކޮށެވެ. މަވޯޓާ ވިދާޅުވީ މަޖިލީހުގެ ތެރެއިން އެމްޑީޕީއަށް ވެރިކަން ގެއްލުވަލަން ފިކުރެއްގެ ދިރުމަށް ކުރެވޭނެ ކަމެއް ނޯންނާނެކަމަށެވެ. އެހެންނަމަވެސް ރައީސް ޞާލިޙާ ދެކޮޅަށް ފިކުރެއްގެ ދިރުމަށް އެންމެ އުނދަގޫވާނީ ކުރީގެ ރައީސް ޑރ.ވަޙީދާއެކު މަސައްކަތް ކުރަން ކަމަށާ، ކުރަން ޖެހިއްޖެނަމަ އެކަންވެސް ކުރާނެކަމަށް އެފިކުރުން ބުނެފައިވާކަމުގައި މަަވޯޓާ ވިދާޅުވެފައިވެއެވެ.
