މިއަދު ގެޒްކޮށް އަމަލުކުރަންފެށި އެ އުސޫލުގެ މަގްސަދަކީ އޮފީސްތަކުން ކުރަންޖެހޭ މާލީ މުއާމަލާތްތައް، އޮންލައިން ބޭންކިން ނުވަތަ އިންޓަނެޓް ބޭންކިން މެދުވެރިކޮށް ނޫން ގޮތަކަށް ހިންގެން ނުހުންނަ ހާލަތްތަކުގައި އެފަދަ ހިދުމަތެއް ހޯދުމަށް މަގުފަހިކޮށްދިނުމެވެ.

އެގޮތުން ކޯޕަރޭޓް ކްރެޑިޓް ކާޑު ހެއްދުމުގައި އަމަލުކުރާނެ އުސޫލުތަކާއި، ކްރެޑިޓް ކާޑުގެ ނޮމިނީގެ މަސްއޫލިއްޔަތުތަކާއި ޒިންމާތައް އެ އުސޫލުގައި ބަޔާންކޮށްފައިވެ އެވެ.

އުސޫލުގައި ވާގޮތުން، ކޮންމެހެން ބޭނުންވެއްޖެ ހާލަތެއްގައި ކޯޕަރޭޓް ކްރެޑިޓް ކާޑު ހެއްދުމަށް އެދި، ހުށަހަޅާނީ އެކަމަށް އެދޭ މެދުވެރިކޮށް ފިނެންސް މިނިސްޓްރީއަށެވެ. އޭގައި ކާޑު ހައްދަން އެދޭ ބޭނުން ނުވަތަ މަގްސަދާއި ބޭނުންވާ "ކްރެޑިޓް ލިމިޓް" އާއި ވަކިވަކި ބޭނުންތަކަށް ހަރަދުކުރެވޭނެ އަދަދުގެ ތަފްސީލު ފަދަ މައުލޫމާތު ހުންނަން ޖެހޭނެ އެވެ.

އެ ކްރެޑިޓް ކާޑު ބޭނުންކޮށްގެން ހަރަދުކުރެވޭނީ، އުސޫލުގައި ވާގޮތުން، ދައުލަތުގެ މާލިއްޔަތު ގަވާއިދު ހުއްދަކުރާ ހަރަދުތައް ކުރުމަށް އެކަންޏެވެ. އަދި އެ ހަރަދުތަކަކީ ބަޖެޓް ކުރެވިފައިވާ ހަރަދުތަކެއް ކަމުގައިވާ ވާންވާނެ އެވެ.

ކޯޕަރޭޓް ކްރެޑިޓް ކާޑުން ކުރުމަށް ހުއްދަކޮށްފައިވާ ހަރަދު ނޫން އެހެން ހަރަދެއް ކުރަން ޖެހިއްޖެ ނަމަ އެ ކަމަކަށް ހަރަދުކުރުމުގެ ކުރިން، އެ ކަމެއްގެ ތަފުސީލު ފިނޭންސް މިނިސްޓްރީއަށް ހުށަހަޅައި، އެ ހަރަދެއް ކުރުމަށް މިނިސްޓްރީގެ ހުއްދަ ލިޔުމުން ހޯދަންޖެހޭނެ ކަމަށް އުސޫލުގައި ބުނެ އެވެ. އެ ކާޑުގެ ކްރެޑިޓް ލިމިޓް ކަނޑައަޅާނީ، އޮފީހަކުން ހުށަހަޅާ ހުށަހެޅުމަށް ރިއާޔަތްކޮށް މިނިސްޓްރީންނެވެ.

ކާޑު ހައްދާ މަގްސަދު ނޫން ކަމަކަށް ކާޑު ބޭނުންކޮށްފިނަމަ ނުވަތަ ހުއްދަ ނޫން އަމަލެއް ކޮށްފިނަމަ ނުވަތަ އެ އުސޫލާ ހިލާފުވެއްޖެ ނަމަ އެކަމަށް ޒިންމާވާ ފަރާތަކަށް، މާލިއްޔަތު ގަވާއިދުގެ ދަށުން ފިޔަވަޅު އެޅޭނެ އެވެ. އަދި ކާޑު ކެންސަލްކޮށް އެ ފަރާތުގެ ނަމުގައި އައު ކާޑެއް ހައްދައި ނުދިނުމުގެ އިހްތިޔާރު އުސޫލުގެ ދަށުން ފިނޭންސް މިނިސްޓްރީއަށް ލިބެ އެވެ.