އައިޖީއެމްއެޗްގައި ހުންނަ އެމްއާރުއައި މެޝިންގައި މައްސަލަޖެހި، މެޝިނުން ޚިދުމަތް ދެވެމުން ނުދާތާ މަހެއްހާ ދުވަސް ފާއިތުވެ، ޚިދުމަތަށް ވަރަށް ބޮޑަށް ބުރޫ އަރައިފިއެވެ.
ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، މި މެޝިނަށް މައްސަލަތަކެއް ކުރިމަތިވެ، އެމްއައިއާރުގެ ޚިދުމަތް އައިޖީއެމްއިން ހޯދުމަށް ބޭނުންވާ، ކިއުގައި ތިބީ މީހުންގެ އަދަދު މިހާރުވަނީ ވަރަށް ބޮޑަށް މައްޗަށް ގޮސްފައެވެ.
އައިޖީއެމްއެޗްގެ އޮފިޝަލަކު މައުލޫމާތު ދީފައިވާ ގޮތުގައި، އެމްއާރުއައި މެޝިނަށް ކުރިމަތިވެފައިވާ މައްސަލަތައް ހައްލުކުރުމަށް ބޭރުގެ ޓެކްނީޝަނުންގެ ޓީމެއް މިހާރުދަނީ މަސައްކަތް ކުރަމުންނެވެ. އަދި ކުރިޔަށް އޮތް މަދު ދުވަސްކޮޅެއްގެ ތެރޭގައި އެ ހޮސްޕިޓަލުގައި ހުރި މެޝިނުން ޚިުދުމަތް ދެވެން ފެށޭވަރު ވާނެކަމަށްވެސް އޮފިޝަލް މައުލޫމާތު ދީފައި ވެއެވެ.
އެމްއާރުއައި ހަދަންޖެހޭ މީހުން އަދަދު ގިނަވެ، ޚިދުމަތަށް ބުރޫ އަރާފައި މިވަނީ މިހާރު މި ޚިދުމަތް އެންމެ މެޝިނެއްގެ އެހީގައި ދޭން ޖެހިފައިވާތީއެވެ. މިހާރު އެމްއާރުއައި ހެދުމަށް ބޭނުން ކުރެވެމުންދަނީ ދަރުމަވަންތަ ހޮސްޕިޓަލުގައި ހުރި މެޝިނުން އެކަންޏެވެ.
އައިޖިއެމްއެޗްއާއި އަދި ދަރުމަވަންތަ ހޮސްޕިޓަލުގައި ހުންނަ ދެ މެޝިނުން ޚިދުމަތް ދެމުންދިޔައިރުވެސް، އެމްއާރުއައި ހަދަންޖެހޭ މީހުން ޚިދުމަތް ހޯދުމަށް ގިނަ ދުވަހު މަޑުކޮށްގެން ތިބެންޖެހޭކަމުގެ ޝަކުވާތައް މެދުނުކުނޑި އާންމުން ކުރަމުން ގޮސްފައި ވެއެވެ.
