އެމްޑީޕީން ވަކިވާހިތްވާ ބަޔަކު ވަކިވިޔަސް ވާނީ މިހާރުވެސް މިވާގޮތްކަމަށް ވިދާޅުވެ އެމްޑީޕީގެ ރައީސް ނަޝީދު ފެކްޝަނަށް ރައްޔިތުންގެ މަޖިލީހުގެ މަރަދޫ ދާއިރާގެ މެމންބަރު އިބްރާހީމް ޝަރީފް (މަވޯޓާ) ފާޑުވިދާޅުވެއްޖެއެވެ.
އޭނާ މިހެން ވިދާޅުވީ ރައްޔިތުންގެ މަޖިލީހުގައި ހިމެނިވަޑައިގަންނަވާ ބައެއް އެމްޑީޕީ މެމްބަރުން ޕާޓީން ވަކިވެވަޑައިގަތުމުގެ ވާހަކަތަކެއް ދައްކަވާފައިވަނިކޮށެވެ. އެއީ ނަޝިދު ފެކްޝަނަށް ނިސްބަތްވާ މެމްބަރުންނެވެ.
ރައްޔިތުންގެ މަޖިލީހުގެ އިއްޔެގެ ޖަލްސާގައި ފުލުހުންގެ ގާނޫނަށް ހުށަހެޅިފައިވާ އިސްލާހަށް ވާހަކަ ދައްކަވަމުން މެންބަރު އިބްރާހީމް ރަޝީދު (ބޮންޑޭ)ވަނީ އެ ގާނޫނަށް ސަރުކާރުން ގެންނަން ހުށަހަޅާފައިވާ އިސްލާހުތަކާ ދެކޮޅަށް ވާހަކަ ދައްކަވައިފައެވެ. އޭނާ ފާހަގަކުރެއްވީ ފުލުހުންގެ ވަޒީފާ ދިނުމުގެ ކުރިން ބެކްގްރައުންޑު ޗެކު ހެދުމުގައި ލުއި ދިނުމާ ގުޅޭ ކަންބޮޑުވުންތަކެވެ.
އެކަން ފާހަގަކޮށް، އެމްޑީޕީގެ ނަޝީދު ފެކްޝަނުގައި ހުންނަވާ އިބްރާހިމް ރަޝީދު ވިދާޅުވީ މިހާރު ސަރުކާރުން ހުށަހަޅަމުން އަންނަ ބިލުތަކާ މެދު ވަރަށް ކަންބޮޑުވާ ކަމަށެވެ.
އެމްޑީޕީގެ ސްޓޭންޑަޑެއް މީގެ ނެތް، ދެން އެމްޑީޕީގެ ލޯގޯގައި ވެސް އިންސާފު ގާއިމް ކުރަނީ، އިންސާފު ސިފަ ކޮށްދެނީ އެކަމަކު އެ އިންސާފާއި ހަމަހަމަކަމާއި ނަޒާހަތްތެރިކަން ނެތް ތަނެއް މިއީ. ސްޓޭންޑެޑް އަނބުރާ ރުޖޫއަވީމާ ޕާޓީއަށް ވަންނަ ގޮތަށް އަޅުގަނޑު ބޭނުން ރައީސް ނަޝީދާއި ސީރިއަސް ކޮށް މަޝްވަރާ ކުރަން.
– ބޮންޑޭ ވިދާޅުވިއެވެ.
މިބަހުސްގައި ވާހަކަ ދައްކަވަމުން ވިލުފުށީ ދާއިރާގެ މެމްބަރު ޙަސަން އަފީފް ވިދާޅުވީ، އެމްޑީޕީން އެފަދަ ބިލެއް މަޖިލީހަށް ހުށަހަޅަން ޖެހޭ އެއްވެސް ސަބަބެއް ވިސްނިވަޑައިނުގަންނަވާ ކަމަށާއި ނަމަވެސް އެ ޕާޓީގެ ބޮޑު އަޣުލަބިއްޔަތެއް އޮތުމުން ބޭނުން ގޮތަކަށް ފާސް ކުރެވިދާނެ ކަމަށެވެ. އެމްޑީޕީގެ ޕީޖީން އެ ބިލަށް ވޯޓު ދިނުމަށް ތްރީލައިން ވިޕެއް ނެރޭނެ ކަމަށާއި އެ އަށް ވޯޓު ނުދީފި ނަމަ އަނެއްކާވެސް ފިޔަވަޅު އަޅާނެ ކަމަށް އަފީފް ވިދާޅުވިއެވެ. ނަަމަވެސް ފިޔަވަޅު އަޅައި ޕާޓީން ވަކި ކުރިޔަސް މިހާރު މައްސަލައެއް ނެތް ކަމަށް އެމްޑީޕީގެ އެންމެ ސީނިއާ އެއް މެމްބަރު ވިދާޅުވިއެވެ.
އަޅުގަނޑަށް ވަރިހަމަ ކޮންމެ ފިޔަވަޅެއް އެޅިޔަސް. އަޅުގަނޑަށް އެންމެ ރަނގަޅީ ތިޔަ ޕާލިމެންޓަރީ ގްރޫޕުން އަޅުގަނޑު ވަކިކޮށްދެއްވިއްޔާ.
– އަފީފް ވިދާޅުވިއެވެ.
އެމްޑީޕީން ވަކިވުމުގެ ވާހަކަ އަފީފް އާއި ބޮންޑޭ ދައްކަވާއިރު އެ ޕާޓީގެ ވިޕްލައިންތަކާ ހިލާފުވި މައްސަލާގައި ޕީޖީން މިހާރު ވެސް ވަނީ އެކި ފަހަރުގެ މަތިން ފިޔަވަޅު އަޅައިފަ އެވެ. އެ ޕާޓީގެ ޕީޖީން މިހާރު އަންނަނީ އަޅާ ފިޔަވަޅުތައް އިތުރަަށް ހަރުކަށިކޮށް އެމްޑީޕީގެ އެތެރޭގެ އިންތިހާބުތަކުގައި ވަދަ ނުކުރެވޭ ގޮތް ހަދަން ވެސް މަސައްކަތް ކުރަމުންނެވެ. ފިކުރެއްގެ ދިރުން ފެކްޝަން އެމްޑީޕީގެ ރިޔާސީ ޕްރައިމަރީ ނާކާމިޔާބުވުމަށް ފަހު ދަނީ އިންތިހާބުގައި ރައީސް އިބްރާޙިމް މުހައްމަދު ސޯލިހާ ދެކޮޅަށް މަސައްކަތް ކުރަމުންނެވެ.
Vakivaa hivvaa bayaku vakivaan vee noontho. Vaki viyas adhi nuviyas mihaaru mivaa goi vaanee.
— Ibrahim Shareef (@AdduShareef) March 8, 2023
މި ދެބޭފުޅުންގެ ކަންބޮޑުވުންތަކާ ގުޅިގެން، ބޮންޑޭއާއި، ހަސަން އަފީފް އިދިކޮޅު ޕީޕީއެމްއާއި ގުޅިގެން މަސައްކަތް ކުރުމުގެ ދައުވަތު އެޕާޓީންވަނީ ދީފައެވެ.
މިދެބޭފުޅުންގެ ވާހަކަތަކާއި ގުޅިގެން ކުރީގެ ޑިފެންސް މިނިސްޓަރު އާދަމް ޝަރީފް ކުރެއްވި ޓްވީޓެއްގައި ވަނީ އެ ދެ ބޭފުޅުން ޕީޕީއެމާ ގުޅުމަށް ދައުވަތު ދެއްވައިފައެވެ.
މަޑުއްވަރީ ދާއިރާގެ މެމްބަރުކަން ވެސް ކުރައްވާ އާދަމް ޝަރީފް ވިދާޅުވިގޮތުގައި، އަފީފާއި ބޮންޑޭ އަކީ ވެސް ވަރަށް ތަޖުރިބާ ހުރި ދެ ބޭފުޅުން ކަމަށާއި ވެރިކަން މިހާރުގެ ވެރިކަން ބަދަލުކުރުމަށް އެ ދެ މެމްބަރުން މުހިންމު ވާނެ ކަމަށެވެ.
