އަންހެނުންގެ ދުވަހެއް ފާހަގަ ކުރުމަށް އެމްޑީޕީންވެސް ޖަލްސާއެއް ބާއްވަނީ

މިއަހަރުގެ އަންހެނުންގެ ދުވަސް ފާހަގަ ކުރުމަށް އެމްޑީޕީންވެސް ޚާއްސަ ޖަލްސާއެއް ބޭއްވުމަށް ނިންމައިފިއެވެ.

ބައިނަލްއަގުވާމީ ގޮތުން ފާހަގަކުރާ އަންހެނުންގެ ދުވަހަކީ ކޮންމެ އަހަރެއްގެވެސް މާޗް މަހުގެ 8 ވަނަ ދުވަހެވެ.

އެމްޑީޕީގެ އަންހެނުންގެ ރޫހުގެ ފަރާތުން މިއަދު ކުރި ޓުވީޓެއްގައި ބުނެފައިވަނީ، މި ޖަލްސާ ބޭއްވުމަށް ހަމަޖެހިފައިވަނީ، ހެންވޭރު ބޮޑުތަކުރުފާނު މަގުގައި ހުންނަ އެޕާޓިގެ މައި ހަރުގޭގައި، މާދަމާ ހަވީރު 4:00 ގައި ކަމުގައެވެ. އަދި އެމްޑީޕީގެ އަންހެނުންގެ ރޫހުގެ ރައީސާ، އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ކުރެއްވި ޓުވީޓެއްގައިވަނީ މި ޖަލްސާގައި ވީހާވެސް ގިނަ އަންހެނުން ބައިވެރިވުމަށް އެދިވަޑައިގެންފައެވެ.

މިއަހަރުގެ ބައިނަލްއަގުވާމީ އަންހެނުންގެ ދުވަހުގެ ޝިއާރަކީ، "އަންހެނުން ބާރުވެރިކުރުވުމާއި ހަމަހަމަކަން ގާއިމް" ކުރުމެވެ.

އަންހެނުންގެ ދުވަސް ފާހަގަ ކުރުމަށް އެމްޑީޕީން ޖަލްސާއެއް ބޭވުމަށް ނިންމާފައިވާއިރު، ޖުމުހޫރީ ޕާޓީގެ ޑެޕިއުޓީ ލީޑަރު އަދި ޓްރާންސްޕޯޓު މިނިސްޓަރު އައިޝަތު ނަހުލާވެސް ވަނީ އެޕާޓީގެ ޖަލްސާއެއް ބޭއްވުމަށް ނިންމާފައެވެ.