ސަރުކާރު ހިންގާ ކޯލިޝަންގައި ހިމެނޭ ޖުމްހޫރީ ޕާޓީއަށް ނިސްބަތްވާ ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު ޢަލީ ޙުސައިން ސަރުކާރަށް ފާޑުކިޔާތީ އެމްޑީޕީގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ނުރުހުން ފާޅުކުރައްވައިފިއެވެ.
މަވޯޓާއަކީ ރައީސް އިބްރާހީމް މުޙައްމަދު ޞާލިޙަށް ތާޢީދުކުރައްވާ މެމްބަރެކެވެ. އަދި ސަރުކާރު ދިފާޢުކުރައްވައި އެންމެގިނައިން ވާހަކަފުޅުދައްކަވާ އެއް މެމްބަރެވެ. މަވޯޓާ ވިދާޅުވީ ޖޭޕީ ސަރުކާރު ކޯލިޝަނުގައި އޮއްވައި އެޕާޓީއަށް ނިސްބަތްވާ ޢަލީ ޙުސައިން ދައްކަވަނީ ވަރަށް ހެއްވާ ވާހަކަތަކެއްކަމަށެވެ. ޖޭޕީ ކޯލިޝަންގައި އޮއްވައި އެކަހަލަ ފިތުނަވެރި ވާހަކަތައް ދެއްކުމަކީ އެކަށީގެންވާކަމެއް ނޫންކަމަށްވެސް މަވޯޓާ ވިދާޅުވިއެވެ.
JP aa MDP coalition partner egge gothuga ovvaa dhen @AleeVoice midhakkavanee varah hevvaa vaahaka eh. E kahala fithuna veri vaahaka dhakkavan ekasheegen nuvey JP coalition ga oihaahidhaku @VaguthuOnline
— Ibrahim Shareef (@AdduShareef) March 7, 2023
ޢަލީ ޙުސައިންނަކީ އޭނާ ނިސްބަތްވާ ޕާޓީއަށް ބެލުމެއްނެތި އަބަދުވެސް ސަރުކާރަށް ފާޑުވިދާޅުވާ މެމްބަރެކެވެ. ޚާއްސަކޮށް ސަރުކާރުގެ ޚާރިޖީ، އިޤްތިޞާދީ ސިޔާސަތުތަކަށް އޭނާ އަންނަނީ ރައްޔިތުންގެ މަޖިލީހުގެ ތެރޭގައާއި މަޖިލީހުން ބޭރުގައިވެސް ފާޑުވިދާޅުވަމުންނެވެ.
އަދި އަންނަ ރިޔާސީ އިންތިޚާބުގައި މިހާރުގެ ސަރުކާރާ ވަކިން ޖޭޕީން ކެންޑިޑޭޓެއް ނެރުމަށް އެންމެބޮޑަށް ވަކާލާތުކުރައްވާ އެއް މެމްބަރަކީވެސް ޢަލީ ޙުސައިނެވެ.
