މުދާ އުފުލާ ބޯޓެއް ކަމުގައިވާ އާގަލާ ބޯޓުގައި އަލިފާން ރޯވުމާއި ގުޅިގެން އެމްންއެޑީއެފްއިން ހަރަކާތްތެރިވާން ފަށައިފިއެވެ.
މި ހާދިސާއާއި ގުޅިގެން އެމްއެންޑީއެފްއިން ބުނެފައިވަނީ މ. ތުވަރު ކައިރިން ދަތުރު ކުރަމުންދިޔަ "އާގަލާ" ނަމަކަށް ކިޔާ މާލެ ދަތުރުކުރާ ބޯޓެއްގައި، ކަނޑިުމަތީގައި އަލިފާން ރޯވުމާއި ގުޅިގެން ސެންޓްރަލް އޭރިއާ ކޮމާންޑުން ހަރަކާތްތެރިވަމުން ދާކަމުގައެވެ.
އަދި މި ހާދިސާގައި ހާލުގައި ޖެހުނު، އެބޯޓުގެ ފަޅުވެރިންނަށް އެހީތެރިކަން ފޯރުކޮށްދީފައި ވާކަމަށްވެސް އެމްއެންޑީއެފްއިން ބުނެފައި ވެއެވެ.
އެމްއެންޑީއެފްއިން ބުނެފައިވަނީ، މި ހާދިސާ ހިނގާފައިވަނީ އެ ބޯޓު މ.ތުވަރުން 0.96 ނޯޓިކަލް މޭލު ބޭރުގައި އޮއްވައި ކަމުގައެވެ. އަދި މި ބޯޓުގައި ވަރަށް ބޮޑަށް އަލިފާން ރޯވުމުގެ ސަބަބުން އެ ބޯޓުން ދަތުރުކުރި 15 ފަޅުވެރިން (5 ދިވެހިންނާއި، އިންޑިއާ 5 މީހުންނާއި އަދި ބަންގްލަދޭޝް 5 މީހުން) ކަނޑަށް ފުންމާލުމުގެ ސަބަބުން ކަނޑުވެފަ ތިއްބައި، އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންގެ ސިފައިން ވަނީ އެމީހުންގެ ތެރެއިން ފެންނަންތިބި 14 މީހުން ސަލާމަތްކޮށްފައި ކަމުގައެވެ.
އަދި ފަޅުވެރިންގެ ތެރެއިން އިންޑިއާ މީހަކު ފެނިފައިނުވާތީ، އެމީހާ ހޯދުމުގެ މަސައްކަތް އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންގެ ސިފައިން ދަނީ އެ ސަރަހައްދުގައި ކުރަމުންނެވެ.
އެމްއެންޑީއެފްއިން ހާމަ ކޮށްފައިވާ ގޮތުގައި، މި ހާދިސާގެ ރިޕޯޓް އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންއަށް ލިބުނީ ރޭ 02:47 ހާއިރުއެވެ.
އާގަލާ ބޯޓަކީ އައްޑޫގެ ވިޔަފާރިވެރިއްގެ ބޯޓެކެވެ. މި ބޯޓުވެ ވެރިފަރާތުން އައްޑޫގައި އާގަލާ މާރޓްގެ ނަމުގައި ފިހާރައެއް ހިންގުމުގެ އިތުރުން އިތުރު އެހެން ވިޔަފާރިތައްވެސް ކުރަމުން ދެއެވެ.