މަސްތުވާތަކެތި ޓްރެފިކް ކުރުމުގެ ތުހުމަތުގައި ބަންދު ކޮށްފައިވާ ދިވެހި އަންހެން ޕައިލެޓްގެ ބަންދުގެ މުއްދަތު ކުރިމިނަލް ކޯޓުން އިތުރު ކޮށްފިއެވެ.
މަސްތުވާތަކެތި ޓްރެފިކް ކުރުމުގެ ތުހުމަތުގައި ދިވެހި އަންހެން ޕައިލެޓެއް ހައްޔަރުކޮށްފައިވަނީ ފާއިތުވު ފެބްރުއަރީ މަހުއެވެ.
އެ މައްސަލައިގައި ހައްޔަރު ކޮށްފައި ވަނީ ކޮން އެއާލާއިނެއްގައި މަސައްކަތް ކުރާ ޕައިލެޓެއްކަން ސާފެއް ނުވެއެވެ. އެނގިފައިވާގޮތުން އޭނާގެ ބަންދަށް ކޯޓުން އެންމެ ފުރަތަމަ ޖެހީ 15 ދުވަހުގެ މުއްދަތެކެވެ. އެ މުއްދަތު ހަމަވެފައިވަނީ އިއްޔެގެ ނިޔަލަށެވެ. އަދި ފުލުހުން ބުނެފައިވަނީ، ތަހުގީގު އިތުރަށް ކުރިޔަށް ގެންދިއުމަށް، އިތުރު 10 ދުވަހުގެ މުއްދަތު ކޯޓުން ޖަހާފައިވާ ކަމުގައެވެ.
މައުލޫމޫތު ލިބިފައިވާ ގޮތުގައި މިމައްސަލާގައި ހައްޔަރު ކޮށްފައިވަނީ މެދު ރާއްޖެތެރޭގެ ރަށަކަށް ނިސްބަތްވާ އަންހެނެކެވެ. އަދި މަސްތުވާތަކެތި ފެނިފައިވަނީ މި އަންހެން މީހާ ދިރިއުޅޭ ކޮޓަރިން ކަމަށްވެސް މައުލޫމާތު ލިބިފައި ވެއެވެ.
މަސްތުވާތަކެތީގެ މައްސަލާގައި ދިވެހި އަންހެން ޕައިލެޓް ހައްޔަރު ކުރިއިރު، 21 އަހަރުގެ އިތުރު ފިރިހެނަކުވެސް ހައްޔަރު ކޮށްފައިވެއެވެ. އޭނާގެ ބަންދަށްވެސް އެންމެ ފުރަތަމަ 15 ދުވަސް ކުރިމިނަލް ކޯޓުން ޖެހިނަމަވެސް، އޭނާގެ ބަންދުގެ މުއްދަތު އިތުރުކުރިކަން ސާފު ވެފައެއް ނުވެއެވެ.
