ރާއްޖެގައި އޮތް އެންމެ ބޮޑު އިންޓަނޭޝަނަލް އެއަރޕޯޓު ކަމުގައިވާ، ވެލާނާ އިންޓަރނޭޝަނަލް އެއަރޕޯޓަށް ކުރިމަތިވާ ކޮންމެ ނުރައްކަލަކީ ރާއްޖޭގެ ސަލާމަތާއި އަދި އިގްތިސާދާއި ގުޅިފައިވާ ކަމެއްކަމުގައި ޑިފެންސް މިނިސްޓަރު މާރިޔާ ދީދީ ވިދާޅުވެއްޖެއެވެ.
ވެލާނާ އިންޓަރނޭޝަނަލް އެއަރޕޯޓުގެ ސަލާމަތާއި ރައްކާތެރިކަން ދެމެހެއްޓެނިވި ގޮތެއްގައި ކަށަވަރުކުރުމަށް ތަޢާރަފްކުރި “ބިނާރު” ކެމްޕެއިން އިފްތިތާޙްކޮށްދެއްވައި ވާހަކަފުޅުދައްކަވަމުން މާރިޔާ ވިދާޅުވީ އެއަރޕޯޓަށް ކުރިމަތިވާ ކޮންމެ ނުރައްކަލަކީ ރާއްޖޭގެ އަމާންކަމާއި ގުޅިފައިވާ ކަމެއް ކަމަށާއި، އެހެންކަމުން އެއަރޕޯޓުގެ ސަލާމަތާއި ރައްކާތެރިކަން އެންމެ މަތީ ފެންވަރުގައި ބެލެހެއްޓުމަކީ މުޅި ރާއްޖޭގެ ސަލާމަތާއި ރައްކަތެރިކަމަށްޓަކާ ކޮންމެހެންވެސް މުހިންމު ކަމެއް ކަމުގައެވެ.
މި ރަސްމިއްޔާތުގައި ވާހަކަ ދައްކަވަމުން މާރިޔާ ވިދާޅުވީ ރާއްޖެއާއި ބޭރު ދުނިޔެ ގުޅުވާލަދޭ މި އެއަރޕޯޓަކީ ރާއްޖެއަށް ދިމަވާ ކޮންމެ ކަމެއްގައިވެސް، ރާއްޖެއަށް ބޭރުގެ އެހީތެރިކަން ހޯދާ ދިނުމުގައިވެސް އެންމެ މުހިންމު ދައުރެއް އަދާކުރާ މުހިންމު އެއް ބައިވެރިޔާ ކަމުގައެވެ.
މާރިޔާ ވިދާޅުވީ ރާއްޖެއަކީ އިންޕޯޓަށް ބަރޯސާ ވެފައި އޮންނަ ގައުމަކަށް ވުމުގެ އިތުރުން، ރާއްޖޭގެ އިގްތިސާދު ފަތުރުވެރިކަމަށް ބަރޯސާވެފަ އޮންނަ އޮތުމަށް ބަލާއިރުވެސް، މި ސިނާއަތުތައް ކުރިއެރުވުމުގައިވެސް ވެލާނާ އިންޓަރނޭޝަނަލް އެއަރޕޯޓުން އަދާކުރާ ދައުރަކީ މުހިންމު ދައުރެއް ކަމުގައެވެ.
އެހެންކަމުން، ވެލާނާ އިންޓަރނޭޝަނަލް އެއަރޕޯޓަށް ކުރިމަތިވާ ކޮންމެ ހާލަތެއްވެސް ސީދާގޮތުން ރާއްޖޭގެ ސަލާމަތާއި، ރައްކާތެރިކަމާއި އަދި އިގްތިސާދީ ދުޅަހެޔޮކަމާއިވެސް ގުޅި ލާމެހިގެންދާކަމުގައިވެސް މާރިޔާ ވިދާޅުވިއެވެ.
