ތ. ހިރިލަންދޫގައި ފެނަކަ ކޯޕަރޭޝަނުން އިމާރާތްކުރި އާ އޮފީސް އިމާރާތް، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ރަސްމީކޮށް ހުޅުވައިފި އެވެ.
ރައީސް ސޯލިހު ހިރިލަންދުއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ހިރިލަންދޫ ފެނަކަ އޮފީސް ހުޅުވުމަށް ހާއްސަ ރަސްމިއްޔާތެއް މިއަދު ހެނދުނު އެރަށު ފެނަކަ އިންޖީނުގެ ސަރަހައްދުގައި ވަނީ ބާއްވާފަ އެވެ.
އެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މީގެ ކުރިން ރާއްޖޭގެ ރަށްރަށުގެ ކަރަންޓްގެ ހާލަތު އޮތީ އެންމެ އެކަށީގެންވާ ގޮތެއްގައި ނޫންކަމަށެވެ. އެހެން ނަމަވެސް މިސަރުކާރުން ރާއްޖޭގެ ރަށްރަށުގެ ކަރަންޓްގެ ހާލަތު ރަނގަޅު ކުރުމަށް ގިނަ މަސައްކަތްތަކެއް ކޮށް، ހިރިލަންދޫގެ ކަރަންޓްގެ ހާލަތުވެސް ރަނގަޅު ކުރެވިފައިވާ ކަމަށް ވިދާޅުވިއެވެ.
އަދި ހިރިލަންދޫގައި އަލަށް ހުޅުވުނު އިންޖީނުގޭގެ އޮފީސް އިމާރާތާއި އެކު މުވައްޒަފުންނަށް ފަސޭހަތަކާއި، ހިދުމަތްތައް ފުރިހަމަ ވެގެންދާނެ ކަމަށާއި އެ އޮފީސް އިމާރާތުގެ ހުރިހާ މަސައްކަތެއްވެސް ކޮށްފައި ވަނީ ހިރިލަންދޫގެ ރައްޔިތުންކަން އެމަނިކުފާނު ފާހަގަކުރެއްވިއެވެ.
ހިރިލަންދޫގައި ފެނަކަ ކޯޕަރޭޝަނުން ޢިމާރާތް ކުރި، އޮފީސް އިމާރާތަކީ، 30 މުވައްޒަފުންނަށް މަސައްކަތްކުރެވޭނެ ޖާގައިގެ ގޮތުން ތަނަވަސް އޮފީސް އިމާރާތެކެވެ. ރިސެޕްޝަނަކާއި، ލޮބީ، މީޓީން ރޫމް، މެނޭޖާ ރޫމް، ޓެކްނިކަލް ސްޓާފް ރޫމް، ރެސްޓް ރޫމް، ޕޭންޓްރީ އަދި ފާހާނަ ހިމެނޭ ގޮތަށް ތަރައްގީކޮށްފައިވާ މި އޮފީސް އިމާރާތަކީ ތ. އަތޮޅުގައި އިމާރާތް ކުރަމުންދާ 10 އޮފީސް އިމާރާތުގެ ތެރެއިން މަސައްކަތް ނިންމައި ރަސްމީކޮށް ހުޅުވުނު ފުރަތަމަ އޮފީސް އިމާރާތެވެ.
