މިމަހުގެ ފުރަތަމަ 25 ދުވަހު ރާއްޖެއަށް 27،182 ފަތުރުވެރިން ޒިޔާރަތްކޮށްފައި ވާކަމަށް ޓޫރިޒަމް މިނިސްޓްރީން ބުނެފިއެވެ.

އެ މިނިސްޓްރީން މިހާރު ކޮންމެ ހަފްތާ އަކު އާންމުކުރާ ތަފާސްހިސާބުގެ ތެރެއިން ރޭ އާންމުކުރި ހިސާބުތައް ދައްކާގޮތުން މި އަދަދާ އެކު، ރާއްޖޭގެ ބޯޑަރު އަލުން ހުޅުވާލިފަހުން ރާއްޖެ ޒިޔާރަތްކުރި ފަތުރުވެރިންގެ އަދަދަ މިވަނީ 67،564 އަށް އަރާފައެވެ. އަދި ޖެނުއަރީ 1 އިން ފެށިގެން މިހާތަނަށް ރާއްޖެ އައި ފަތުރުވެރިންގެ އަދަދު މިހާރު 450،411 އަށް އަރައެވެ.

ރާއްޖޭގެ ބޯޑަރު އަލުން ހުޅުވި ފަހުން އެންމެ ގިނަ ފަތުރުވެރިން ޒިޔާރަތްކުރާ ގައުމަކީ އަދިވެސް ރަޝިއާ އެވެ. ބޯޑަރު އަލުން ހުޅުވި ފަހުން އެ ގައުމުން މިހާތަނަށް 14،855 ފަތުރުވެރިން ވަނީ ރާއްޖެ އައިސްފައެވެ. ލިސްޓުގެ 2 ވަނައަށް މިދިޔަ ހަފްތާގައި އެރި އިންޑިއާ އަދިވެސް އޮތީ ހަމަ ދެވަނާގައެވެ. އިންޑިއާއިން މިހާތަނަށް 7،652 ފަތުރުވެރިން ވަނީ ރާއްޖެ އައިސްފައެވެ.

ރާއްޖެއަށް އެންމެ ގިނަ ފަތުރުވެރިން އައި 5 ގައުމު:

ރަޝިއާ – 14،855
އިންޑިއާ – 7،652
އިނގިރޭސި ވިލާތް – 5،035
އެމެރިކާ – 5،027
ޔޫއޭއީ – 4،319

ރާއްޖެ އަންނަ ފަތުރުވެރިންގެ އަދަދު އިތުރުވަމުން ދިޔަ ވަރަކަށް އެއަރ ލައިން ތަކުން ރާއްޖެއަށް ކުރާ ދަތުރު ތައްވެސް ގެންދަނީ އިތުރު ކުރަމުންނެވެ. މިވަގުތު ރާއްޖެއަށް ދަތުރުކުރާ ޖުމްލަ 16 އެއަރލައިންގެ ތެރެއިން މިހާތަނަށް އެންމެ ގިނަ މީހުން އުފުލާފައިވަނީ އެމިރޭޓްސް އިން ނެވެ. އެ އެއަރލައިނުން މިހާތަނަށް 21،624 ފަތުރުވެރިން ވަނީ އުފުލާފައެވެ. ކުރިންމި ލިސްޓުގެ 5 ވަނާގައި އޮތް، އިންޑިއާގެ އެއަރލައިން އިންޑިގޯ މިހާރުވަނީ 4 ވަނައަށް ޖެހިލާފައެވެ.

ރާއްޖެއަށް އެންމެ ގިނަ ފަތުރުވެރިން އުފުލި 5 އެއަރލައިން:

އެމިރޭޓްސް – 21،624
ޤަތަރު އެއަރވޭސް – 19،500
އޭރޯފްލޮޓް – 9،590
އިންޑިގޯ – 5،745
ޓަރކިޝް އެއަރލައިންސް – 5،526

ދިވެހިންގެ ގައުމީ އެއަރލައިން މޯލްޑިވިއަން އޮތީ މި ލިސްޓުގެ 7 ވަނައިގަ އެވެ. މޯލްޑިވިއަނުން މިހާތަނަށް ޖުމްލަ 3،150 ފަތުރުވެރިން ވަނީ އުފުލާފައެވެ.

މިނިސްޓްރީން މިދިޔަ ހަފްތާގައި ލަފާކޮށްފައި ވަނީ އަންނަ ޑިސެމްބަރު މަސް ނިމޭއިރު 25 އެއަރ ލައިނަކުން ރާއްޖެއަށް ދަތުރު ކުރާނެ ކަމަށެވެ. ނަމަވެސް މިހާރު މިއަދަދު ވަނީ 26 އަށް އިތުރު ކޮށްފައެވެ.