1986 ގައި އިނގިރޭސިންނާ އާޖެންޓީނާ އަކީ އެކުވެރި ދެގައުމެއް ނޫނެވެ.

ފޯކްލޭންޑް އައިލެންޑްގެ، އާޖެންޓީނާގައި މަޝްހޫރު ނަމުންނަ، ލަސް މަލްވިނަސްގެ މިލްކުރެވިކަމަށް ދައުވާކޮށް، އޭގެ 4 އަހަރުކުރިން ކުރިން މި ދެގައުމުން ވަނީ، ކުރު، އެހެންނަމަވެސް ލޭއޮހޮރުވުން ބޮޑު ހަނގުރާމައެއް ކޮށްފައެވެ. ހަގުރާމަ ނިމުނުތާ އެންމެ 4 އަހަރު ފާއިތުވެގެން ދިޔަ ނަމަވެސް، ދެގައުމުގައި ދެމެދުގައި އޮތީ އިންތިހާއަށް ބޮޑު ނުތަނަވެސް ކަމެކެވެ.

ޑީއޭގޯ މަރަޑޯނާވެސް ހިމެނޭގޮތުން، އާޖެންޓީނާގެ އެތަކެއް ރައްޔިތުންނެއްގެ ހިތުގައި އޮތީ، އިގިރޭސިންގެ އަތުން ހަގުރާމާގައި އާޖެންޓީނާ ބަލިވެގެން ދިއުމުގެ ފުން ހިތާމައާއި މޮޅިވެރިކަމެވެ. އަދި ވަކީން ޚާއްސަކޮށް، މި ހަގުރާމާގައި އާޖެންޓީނާގެ 600 ސިފައިން މަރުވެދިއުމުގެ ރުޅިވެރިކަމާއި ހިތާމައެވެ. މި 600 ސިފައިންގެ ތެރޭގައި ގިނައީ، އާޖެންޓީނާ ސިފައިންގެ ތެރެއަށް އަލަށް ވަތް ޒުވާނުންނެވެ.

އާޖެންޓީނާއާ އިގިރޭސިންނާ ދެމެދު އުފެދުނު މި ކޯޅުމަށް ފިނިކަމެއް އައިސްފައި ނުވަނީސް، މި ދެގައުމުގެ ދެމެދުގައި އޮތް ދެކޮޅުވެރިކަމާއި ޖަޒްބާތަށް ނިމުންއައި މަގަކަށްވި، ޑިޕްލޮމަސީގެ ވަސީލަތަކަށް ވީ ފުޓު ބޯޅައެވެ. އެއީ ހަނގުރާމައިން އާޖެންޓީނާ ބަލިވެގެންދިޔަ ދިއުމެއްގެ ބަދަލު ހިފިއްޖެކަމުގެ އިހުސާސްތައް އާޖެންޓީނާގެ ރައްޔިތުންނަށް ކުރެވުނު ހިސާބުންނެވެ.

1986 ވަނަ އަހަރު މެކްސިކޯގައި ބޭއްވި ވޯލްޑަކަޕަށް އާޖެންޓީނާ ދަތުރުކުރިއިރު އެގައުމު ހިމެނުނީ މެދުމިނުގެ ޓީމެއްގެ ގޮތުގައެވެ. އެހެންނަވެސް، އެޓީމު އެއަހަރުގެ ވޯލްޑް ކަޕަށް ދަތުރު ކުރީ ދުނިޔޭގަ އޭރު ހުރި އެންމެ މޮޅު ފުޓްބޯޅަ ކުޅުންތެރިޔާ އެޓީމެއްގައި ހިމެނޭ ޓީމުގެ ގޮތުގައެވެ.

ނަތީޖާއެއްގެ ގޮތުން، ރަގަޅު ނަތީޖާއެއް ނެރެ މޮޅު ކުޅުމެއް ދެކުމަށް ޓީމުގެ މައްޗަށް ވަރަށް ބޮޑު ޕްރެޝަރއެއް އޮތެވެ. އަދި މި ޕްރެޝަރ މަރަޑޯނާގެ މައްޗަށް އިންތިހާއަށް އޮތެވެ.

މަރަޑޯނާ އެ ވޯލްޑްކަޕްގައި ދެއްކި ކުޅުމުން، އާޖެންޓީނާގެ ރައްޔިތުންގެ އުންމީދުތަކުގަ ކުލަޖެއްސިއެވެ. ޓީމުން، ކާމިޔާބު ކުރި ގޯލްތަކުގައި %71 ހިއްސާއަކީ މަރަޑޯނާ ސީދާ ގޮތެއްގައި ހިއްސާވެގެން ޖަހާފައިވާ ގޯލްތަކެވެ.

އާޖެންޓީނާ އެ ވޯލްޑްކަޕްގެ "ނޮކް އައުޓް" ސްޓޭޖަށް ދަތުރުކުރީ ގްރޫޕްގެ އެއްވަނާގަ އޮވެގެންނެވެ. އެއީ މަރަޑޯނާ ކާމިޔާބު ކޮށްދިން އެއް ގޯލާ އަދި އޭނާގެ އެހީތެރިކަމުގައި ކާމިޔާބުކުރި 4 ގޯލާއެކުގައެވެ. ގޯލު ތަފާތުން އިނގިރޭސި ވިލާތް އޮތީ ގްރޫޕް F ގެ އެންމެ ފުލުގައެވެ.

16 ގައުމަކުން ވާދަކުރަމުން ދިޔަ ވޯލްޑްކަޕްގައި، ޕެރަގުއާއި 3-0 އިން ބަލިކޮށް އިގރޭސި ވިލާތް ކުއާޓާރ ފައިނަލަށް ދަތުރު ކުރިއިރު، އާޖެންޓީނާއަށް ކުއާޓާރ ފައިނަލަށް ދަތުރުކުރެވުނީ، ދަތިތަކަކާއެކު، އުރުގުއާއީ 1-0 އިން ބަލިކޮށްގެންނެވެ. އެހެންކަމުން، ދެގައުމަށްވެސް ކުއާޓާރ ފައިނަލަށް ދަރުކުރެވުނު އިރު، ދެގައުމުވެސް އޮތީ ނަފްސާނީ ގޮތުން ވަރަށް ބޮޑު އުއްމީދެއްގައެވެ. އިގިރޭސިވިލާތް ލިބުނު މޮޅާއެކު ދެއްކި ކުޅުމުގެ ފުރިހަމަކަމުން އުއްމީދު އާކޮށްގެންނެވެ.

އެހެންނަމެވެސް، އާޖެންޓީނާގެ ހުރިހާވެސް އުއްމީދަކަށް ވެފައިއޮތީ ދުނިޔޭގެ އެންމެ މޮޅު ކުޅުންތެރިޔާ އާޖެންޓީނާގެ ޓީމުގައި، އެހާތަނަށް ދައްކަމުން ދިޔަ އާދަޔާ ޚިލާފު މޮޅުކުޅުމެވެ.

މަރަޑޯނާ ބުނެފައިވަނީ، ކުއާޓަރ ފައިނަލުގައި އިގިރޭސިވިލާތާއެކު ކުޅުމަށް ހަމަޖެހިފަ އޮތް އެ މެޗާހަމައަށް ދަތުރު ކުރި އިރު އާޖެންޓީނާގެ ރައްޔިތުންގެ "ޖަޒްބާތާ" "އުއްމީދު"ތައް މައްޗަށް ގޮސްފަ ހުރި މިންވަރަށް ބަލާއިރު، އޭރު އިހުސާސް ކުރެވުނީ، އިގިރޭސި ވިލާތާއެކު އިތުރު ހަގުރާމައަކަށް ތައްޔާރުވަމުން ދިޔަ ކަމުގެ އިހްސާސްތަކެއް ކަމުގައެވެ.

"ކަލާންގެ ދެއްވި އަތުން" ޖެހި ގޯލް

ކުއާޓާރ ފައިނަލުގައި އިގިރޭސިންނާއެކު އާޖެންޓީނާ މިކުޅުނު މެޗުގައި ފުރަތަމަ ހާފް ނިމިގެން ދިޔައީ އެއްވެސް ޓީމަކަށް ގޯލެއް ކާމިޔާބު ނުކުރެވިއެވެ.

ނަތީޖާއެއްގެ ގޮތުން، އޮތް ބޮޑު ޕްރެޝަރައަށް ލުއިކަމެއް ނައިސް މެޗާއިގެން ކުރިޔަށް ދިއުމަށް ހުރިހާ ކުޅުންތެރިންނަށް މަޖުބޫރުވެގެން ދިޔައެވެ.

އެހެންނަމަވެސް، ދެވަނަ ހާފަށް ކުޅެން ދަޑަށް އެރުމާއެކު، ދެން ފެނިގެން ދިޔައީ، މުޅި ފުޓްބޯޅައިގެ ތާރީޚުގަައި އަބަދަށްޓަކާ، އެ ހިދުކޮޅެއްގެ ހަދާންތައް ދެމިގެންދާނެ ހިދުކޮޅުގެ ވަގުތުކޮޅެވެ.

މަރަޑޯނާ ބޯޅައާއިގެން އިގިރޭސިވިލާތުގެ ޑިފެންސް ފޫއަޅުވާލިއެވެ. އަދި ތިން ޑިފެންޑަރުންގެ އަތުން ބޯޅަ ސަލާމަތް ކުރުމަށްފަހު، ބޯޅަ ޕާސްކުރީ އާޖެންޓީނާގެ ސްޓަރައިކަރ ޖޯގް ވަލްޑަނޯ އަށެވެ. އޭނާ ބޯޅަ ކޮންޓްރޯލް ކޮށްލުމަށްފަހު، އިގިރޭސި ކުޅުންތެރިޔަކުގެ ފަހަތަށް ބޯޅަ ލާ، ދެން ބޯޅަ ފޮނުވާލީ ގޯލް ކުރިމަތީގައި އޮތް 6 ޔާޑުގެ އޭރިއާގެ ތެރެއަށެވެ.

އެވަގުތަކީ އިގިރޭސި ގޯލް ކީޕަރ ޕީޓަރ ޝިލްޓަންވެސް އަދި މަރަޑޯނާވެސް ބޯޅައާ ދިމާލަށް ފުންމާއިގަތް ވަގުތެވެ. އެހެންނަމަވެސް އަތަށް އަންގި ލައްވައިގެން ހުރި ގޯލް ކީޕަރަށް، އާޖެންޓިނާގެ ކެޕްޓަނަށްވުރެ 6 ސެންޓި މީޓަށްވުރެ ދިގުމިނެއްގެ އިސްކޮޅެއް ލިބިފައި ހުރުމުގެ އެޑްވާންޓޭޖެއް ލިބިފައި އޮތެވެ. އެހެންކަމުން އިގިރޭސިވިލާތުގެ ޓީމުގެ ގޯލް ކީޕަރަށްވުރެ މައްޗަށް ފުންމައިގެން ގޮސްގެންވެސް، ބޯޅައާއި އަރާ ހަމަކުރުން އެއީ "މުޢުޖިޒާތަކުން" މެނުވީ އާޖެންޓީނާގެ ކެޕްޓަނަށް ނުކުރެވޭނެ ކަމެއްކަމުގައި ބަލަންޖެހުނެވެ.

އެހެންނަމެވެސް، ކޮންމެވެސް ގޮތަކުން މި "މުޢުޖިޒާތް" ހަގީގަތަކަށް ވެގެން ހިގައްޖެއެވެ. ބޯޅައާ ދިމާލަށް ގޯލްކީޕަރާ އެކީ ފުންމައިގެން ދިޔަ މަރަޑޯނާ ކޮންމެވެސް ގޮތަކުން، ކީޕަރުގެ ޝިލްޓަންގެ އަތްމަތިންލާފަ ބޯޅަ ފޮނުވާލީ އިގިރޭސިވިލާތުގެ ގޯލްތެރެއަށެވެ.

އެންމެ އާދައިގެ ފެންވަރުގެ ވީޑިއޯ ފޫޓޭޖުންވެސް، މި ބޯޅަ ގޯލަށް ވަނުމުގައި، އާދަޔާ ޚިލާފު ކޮންމެވެސް ކަމެއް ހިގާފަ އޮތްކަން ފާހަގާވާން ހުއްޓެވެ. އަދި ބޯޅަ ގޯލަށް ވަނުމާއެކު، އާދާޔާޚިލާފު ގޮތަކުން ބޯޅަ ގޯލަށް ވަތްކަމުގެ އިހުސާސުގައި، އިގިރޭސި ކުޅުންތެރިންވެސް އެވަގުތު ދަޑުމަތީގައި ހަރާކާތްތެރިވެފައިވަނީ ޝަކުވާކުރުމުގެ ރޫހުގައިކަން ވީޑިއޯ ފޫޓޭޖްތަކުން ފެންނާހުރެއެވެ.

އެހެންނަމަވެސް، މެޗުގެ ރެފްރީކަން ކުރަމުން އައި ޓިއުނީޝިއާގެ ރެފްރީ، އަލީ ބެނަކުއަރ ނިންމީ މިއީ ސައްހަ ގޯލެއް ކަމުގައެވެ.

ނަތީޖާއެއްގެ ގޮތުން އިގިރޭސި ޑިފެންޑަރ ޓެރީ ފެންވިކް ބޯޅަ ގޯލަށް ވަނުމާއެކު، އެބުރިގެންފަ، ޝަކުވާތަކާއެކު ރެފްރީއާ ދިމާލަށް ދުއްވައިގަތެވެ. އަދި އެއީ ސައްހަ ގޯލެއް ނޫންކަކަމުގެ ޝަކުވާތަކާއެކު، ރެފްރީގެ ފަހަތުން މެދު ރޮގާހަމައަށް ޝަކުވާ ކުރަމުން އޭނާ ހިގާފައިދިޔައެވެ. އަދި އަތް އުކަމުން ދުރަށް ދިއުމުގެ ކުރިން، ރުޅިވެރިކަމާއެކު، ރެފްރީގެ ގައިގަ ޖަހާފާނެހެން ހިވާފަދަ ހާލަތަކަށްވެސް އޭނާ ރެފްރީގެ ގާތުގައި މި ގޯލްގެ ޝަކުވާތައް ކޮށްފައި ވެއެވެ.

ފަހުން ބެލި ރީޕްލޭތަކުން، އިސްކޮޅުން ކުރު، 10 ނަމްބަރު ޖާޒީގައި ކުޅެމުންދިޔަ، ވާތްތެރި، ކުޅުންތެރިޔާ ކީޕަރާއެކީ ފުންމައިގެން ދިޔަ ދިއުމުގައި، ވައިގެތޭގައި ހުރި ބޯޅާގައި އަތުން ޖައްސާ، ބޯޅަ ގޯލްތެރެއަށް ފޮނުވާލާ މަންޒަރު ސާފުކޮށް ފެންނާން ހުރެއެވެ.

ވަގުތުން ރީޕްލޭ ބެލުމަށްފަހު ގޯލުގެ ހަގީގަތް ދެނެގަތުމުގެ ވަސީލަތް އޭރު ފީފާއިން ތައާރަފް ކޮށްފައެއް ނުވެއެވެ. ބޯޅަ ގޯލަށް ވަދެގެންދިޔައީ ޝައްކު އުފެދޭ ފަދަ ހާލަތެއްގައިތޯ ނުވަތަ ނޫންތޯ، މެކެސިކޯގެ އެސްޓާޑިއޯ އެޒްޓޭކާ ސިޓީގެ ސްޓޭޑިއަމަށް ވަދެތިބި އެއްތައް ހާސް އާޖެންޓީނާގެ ސަޕޯޓަރުން ބަލާކަށް ބޭނުމެއް ނުވިއެވެ.

މުޅި ދަޑު އޮތީ، މު އެމުބާރާތުގައި އާދަޔާ ޚިލާފު ކުޅުމެއް ދައްކަމުން ދިޔަ، އާޖެންޓީނާގެ ތަރި މަރަޑޯނާއަށް އޮހެމުންދިޔަ ތާއީދުން ގުގުމާފައެވެ.

މި މެޗަށްފަހު މަރަޑޯނާ ބުނެފައިވަނީ، މި ގޯލް ކާމިޔާބު ކުރީ "ބޮލުން ކުޑަކޮށް ބޯޅާގައި ޖައްސާ، އެހެންނަމަވެސް، "ކަލާނގެ އަތުން" ކަމުގައެވެ.

އަދި އޭގެވެސް ފަހުން މި ގޯލާ ގުޅޭގޮތުން މަރަޑޯނާ ވަނީ، މި ގޯލަކީ، 1982ގެ ހަގުރާމައަށް އިގިރޭސިންގެ ކިބައިން ހިފުނު "ރަމްޒީ ބަދަލު ހިފުމެއްގެ" ގޮތުގައިވެސް ސިފަ ކޮށްފައެވެ.

"ރޯލިން ސްޓޯން" މެގަޒިންއަށް ފަހުން ދިން އިންޓަވިއުއެއްގައި މަރަޑޯނާ ބުނެފައިވަނީ، އެމެޗުގައި ހިގައިދިޔަ ހުރިހާ ކަމެއްގެ ޒިންމާއެއްވެސް އުފުލަން ޖެހޭނީ އިގިރޭސި ކުޅުންތެރިން ކަމުގައެވެ.

"އަހަރެންނަށް އިގޭ މިއީ ހަމަނުޖެހޭ ވާހަކައަކަށް ވެދާނެކަންވެސް. އެހެންނަމަވެސް، މިއީ އަހަރުމެންގެ އިހުސާސް. އަހަރުމެން ދިޔައީ ދަޑުމަތީގައި، އަހަރުމެންގެ ދިދައާއި، އަހަރުމެން ދަރިން ދިފާއު ކުރަމުން"

– މަރަޑޯނާ ބުނެފައި ވެއެވެ.

ގަރުނުގެ ގޯލް

1986ގެ ވޯލްޑްކަޕްގައި، އިގިރޭސިވިލާތާއި އާޖެންޓީނާ ދެމެދު ކުޅެވުނު މިމެޗްގައި މެޗް އޮފިޝަލުން ހެދި، މިބޮޑު ގޯހާއި، އަދި އިގިރޭސި ކުޅުންތެރިންގެ ނުރުހުމާއެކުވެސް، އާޖެންޓީނާ 1-0ގެ ނަތީޖާއަކުން ކުރި ހޯދިތާ 4 މިނިޓްފަހުން ދެން ފެނިގެން ދިޔައީ، ދުނިޔޭގެ ކުޅިވަރުގެ ތާރީޚު އަނެއްކާވެސް އެވަގުތޮ ކޮޅެއްގެ މަތިން ތާއަބަަދަށް ހަދާންކުރާނެ ވަގުތުކޮޅެކެވެ.

އިގިރޭސި ޑިފެންޑަރ ބާރަށް ދުވެފައި އިގިރޭސި ގޯލް އޭރިއާގެ ތެރެއަށް ވަދެގަތް ނަމަވެސް، ބޯޅަ އޭނާގެ ފައިން ނެއްޓި އޭރު އޮތީ ގޯލްގެ އެތެރޭގެ ލައިންގެ ކުރިޔަށް، ކީޕަރުގެ ކުރިމަތީ ހުއްޓިގެން ހުރި އިގިރޭސި ޑިފެންސްގެ އެންމެ ފަހު ކުޅުންތެރިޔާ ފެންވިކްގެ ކުރިމަތީގައި، މަރަޑޯނާގެ އަތުގައެވެ.

މަރަޑޯނާ ބޯޅައާ އެކު ހަރަކާތްތެރިވިލެއް އަވަސްކަމާ ސްޕީޑުގެ ބާރުކަމުން، ފެންވިކް ދެއަތަށް ހަރަކާތްތެރި ވަމުން ދަނިކޮށް، 25 އަހަރު މަރަޑޯނާ ފައިން ބޯޅަ ނެގުމަށްފަހު ފެންވިކްގެ ބޯމަތިން ނަގާ، އިގިރޭސި ވިލާތުގެ ކީޕަރ ޝިލްޓަންއާ ކުރިމަތިލިއެވެ. ދެން ފެނިގެން ދިޔައީ، މަރަޑޯނާ މިމެޗްގައި ދެވަނަ ފަހަރަށް ބޯޅަ ގޯލަށް ވެއްދުމަށް ޝެލްޓަންއާއި ކުރިމަތި ލީ، ހުނަރުން ފުރިންގެންވާ ހަގީގީ މަންޒަރެވެ.

ކީޕަރު ޝެލްޓަން ބޯޅައާއި ކުރިމަތިލުމަށް ކުރިޔަށް ނިކުތް ވަގުތު، ބޯޅަ ގޯލަށް ވައްދާލުމަށް މަރަޑޯނާ ކުރި ހަރާކާތާއެކު ކީޕަރު ބޯޅައަށް ޑައިވް ކުރިއެވެ. އެވަގުތު، ކީޕަރުގެ ގައިން ކަޓުވާލުމަށްފަހު، އަދި ދެންހުރި ކުޅުންތެރިޔާ ބަޗަރ ދުވެފަ އައިސް މަރަޑޯނާގެ ފަޔަށް ޓެކްލް ކުރުމުގެ ކުރިން، އިގިރޭސި ވިލާތުގެ ގޯލްގެ ތެރެއަށް ބޯޅަ ފޮނުވާލާ، ދުނިޔޭގެ ފުޓު ބޯޅާއިގެ ތާރީޚުގެ ތެރެއަށް މަރަޑޯނާ ވަދެގެންދިޔައެވެ.

އެންމެ 10 ސިކުންތުގެ ތެރޭގައި، 11 ފަހަރަށް ބޯޅާގައި ހުނަރުވެރިކަމާއެކު ފައިން ޖައްސާ، 3 ފަހަރަށް ބޯޅަ ފައިން ހުއްޓުމަކަށް ގެނެސް، އަދި 2 ފަހަރަށް ބޯޅަ ފައިމަތީގައި ވަށާ ޖެއްސުމަށްފަހު، މަރަޑޯނާ އިގިރޭސި ގޯލްގެ ތެރައަށް ފޮނުވާލާ އާޖެންޓީނާއަށް ކާމިޔާބު ކޮށްދިނީ، "ގަރުނުގެ ގޯލު"ގެ ގޮތުން މަޝްހޫރިވެގެންދިޔަ ގޯލެވެ. އަދި އާޖެންޓީނާ 1986 ގެ ވޯލްޑްކަޕްގެ ސެމީ ފައިނަލަށް ދަތުރުކުރާނެ ކަމުގެ ޔަގީންކަން ކުޅިބަލަން ތިބި އެގައުމުގެ އެތައް މިލިއަން ރައްޔިތުންނަށް ޔަގީން ކޮށްދިނެވެ. އަދި އިގިރޭސި ވިލާތް މިމުބާރާތުން އަލްވަދާއު ކިއެވެ.

އެމެޗުގައި ކުޅެމުންދިޔަ އިގިރޭސި ވިލާތުގެ ސްޓްރައިކަރ ގޭރީ ލިންކަރ ފަހުން ބުނެފައިވަނީ، މަރަޑޯނާގެ މި ގޯލަށްފަހު، އޭނާއަށްވެސް ދަޑުމަތީގައި ހުރެގެންވެސް، މަރަޑޯނާއަށް ހިތާހިތުން ތައުރީފު ކުރެވުނެވެ. "އަހަރެންނަށް ދުވަހަކުވެސް ދަޑުމަތީގައި އެކަހަލަ އިސާސެއް ކުރެވިފައެއް ނުވޭ. އެހެންނަމަވެސް، ހަގީގަތަކީ އެއީ. އެއީ ފަހަރެއްގަވެސް އަހަރުމެންނަށް މުހިންމު މެޗަކަށް ނުވާތީއެއްވެސް ނޫން" އޭނާ ބުނެފައި ވެއެވެ. "އެއީ އެހާ ރީތި ގޯލެއް ސްކޯ ކުރުމަކީ، ކޮންމެ ކޮންމެ މީހަކަށް ކުރެވިދާނެ ކަމަކަށް ނުވާތީ". އޭނާ ބުނެފައި ވެއެވެ.

އޭގެ ފަސް

ދުނިޔޭގެ ފުޓު ބޯޅާއިގެ ތާރީޚުގެ ޚާއްސަ މެޗެއްގެ ގޮތުގައި ބެލެވޭ މިމެޗުގައި، މެޗްގެ 81 ވަނަ މިނިޓްގައި އިގިރޭސި ޓީމުގެ ލިންކަރ އިގިރޭސި ޓީމަށް ގޯލެއް ކާމިޔާބު ކޮށްދީ އުއްމީދު އާކޮށްދިނެވެ. އެހެންނަމަވެސް މިމެޗް ނިމިގެން ދިޔައީ 2-1ގެ ނަތީޖާއަކުން އާޖެންޖީނާ މޮޅުވެގެންނެވެ.

2000 ވަނަ އަހަރު ނެރެވުނު މަރަޑޯނާގެ އޮޓޯ ބައޮގްރަފީ "އަހަރެންނަކީ އެލް ޑީއޭގޯ" ގައި މަރަޑޯނާ ބުނެފައިވާ ގޮތުގައި މިމެޗަކީ ދަޑުމަތީގައި ނުކުތް ނަތީޖާއަށްވުރެ މާ މުހިންމު މެޗެކެވެ.

"އެއީ ފުޓުބޯޅަ ޓީމެއް ބަލިކުރެވިގެން ދިޔަ މެޗެއް ނޫން. އެއީ ގައުމެއް ބަލިކުރެވިގެން ދިޔަ މެޗެއް. މިމެޗްގެ ކުރިން، އަހަރުމެން އެންމެވެސް ބުނަމުން ދިޔައީ މިމެޗަކީ މަލްވިނާސް ހަގުރާމަ (1982 ވަނަ އަހަރު، އިގިރޭސީ ވިލާތާއި އާޖެންޓީނާއައި ދެމެދު ފޯކްލޭންގެ ރަށްތަކާ ގުޅޭގޮތުން ކުރި ހަގުރާމަ) އާއި އެއްވެސް ގުޅުމެއް އޮންނާނެ މެޗެއް ނޫންކަމުގަ. އެހެންނަމަވެސް، އަހަރުމެން އެންމެންނަށްވެސް އިގޭ މިހަގުރާމާގައި އަހަރުމެންގެ އެތަކެއް ކުޑަ ކުދިންނެއް މަރުވެގެން ގޮސްފައިވާ ކަން. އެމީހުން އަހަރުމެން ދެކެފައިވަނީ ފައްސާލި ކުދި ކުދި ދޫނިތަކެއްގެ ގޮތުގއި"

– މަރަޑޯނާ އޭނާގެ މި ބައޯގްރަފީގައި ލިޔެފައި ވެއެވެ.

"އެހެންކަމުން، މި މެޗަކީ އަހަރުމެން އެމީހުންގެ ކިބައިން ހިފި ބަދަލު ހިފުމެއް. އެއީ އަހަރުމެންނަށް މަލްވިއަން ހަގުރާމައިން ލިބުނު ހިތާމަތަކުން އަރައިގަތުމަށް ލިބުނު ހިތްވަރެއް. މި މެޗްގެ ކުރިން މިމެޗާއި ހަގުރާމައާއި ނުގުޅުވާނެކަމަށް އަހަރުމެން އެންމެން ބުނަމުން އައި ނަމަވެސް އެއީ ދޮގެއް. އެއީ ދޮގެއް. އަހުރުމެން އެންމެންވެސް ވިސްނާފަ އޮތީ އެހެން. އެއީ އާދައިގެ ގޭމެއް ނޫން."

މި މުބާރާތުގައި، 2-0 އިން ބެލްޖިއަމް ބަލިކޮށް އާޖެންޓީނާ ވޯލްޑްކަޕްގެ ފައިނަލަށް ދަތުރު ކުރިއެވެ. މި މެޗްގައި އާޖެންޓީނާއަށް ދެގޯލްވެސް ކާމިޔާބު ކޮށްދިނީ މަރަޑޯނާއެވެ.

އަދި ފައިނަލުގައި ވެސްޓް ޖާމަނީ 3-2 އިން ބަލިކޮށް ވާލްޑްކަޕް 1986 ގެ ތަށި މަރަޑޮނާގެ ކެޕްޓަންކަމުގައި އާޖެންޓީނާ އުފުލާލިއެވެ.

މިމެޗުގައި ދެޓީމު 2-2 އިން އެއްވަރު ވެފައިވަނިކޮށް، އާޖެންޓީނާއަށް ކުރި ހޯދާދިނީ، މެޗް ނިމެން 5 މިނިޓަށް ވެފައިވަނިކޮށް، ގޯލްޖެހި ކުޅުންތެރިޔާއަށް މަރަޑޯނާ ޕާސްކޮށްދިން ބޯޅައިން ޖެހި ގޯލުންނެވެ.

މިއީ އޭގެ ކުރިން ބޭއްވުނު ތިން މުބާރާތުގެ ތެރެއިން މަރަޑޯނާގެ ހިތްވަރުން އެހާތަނަށް އާޖެންޓީނާއަށް އުފުލާލެވުނު ދެވަނަ ތައްޓެވެ. އަދި އެންމެފަހަށް، މިހާތަނާ ހަމައަށް، އާޖެންޓީނާއަށް ކާމިޔާބު ކުރެވުނު ބައިނަލް އަގުބާމީ އެވަރުގެ ހަމައެކަނި ބޮޑު މުބާރާތްވެސްމެއެވެ.

1990ގެ ވޯލްޑްކަޕްގައި އިޓަލީގައި ކުޅެމުން ދަނިކޮށް، މަރަޑޯނާގެ ކަކުލު ހުޅަށް އަނިޔާވިއެވެ. އެ ވޯލްޑްކަޕްގައި އާޖެންޓީނާ ފައިނަލަށް ދަތުރު ކުރި ނަމަވެސް، ވެސްޓު ޖަރުމަނު އަތުން ބަލިވެގެން ދިޔައީއެވެ.

އޭގެ 4 އަހަރުފަހުން، އެމެރިކާގައި ބޭއްވި ވޯލްކަޕް މުބާރާތުގައި، މުބާރާތުގެ މެދުތެރެއިން، މަރަޑޯނާ، މަނާ ޑްރަގެއް ކަމުގައިވާ ފެޑްރިންއަށް ޕޮޒިޓިވް ވުމާގުޅިގެން، މުބާރާތާ އަލްވަދާއު ކިއުމަށްފަހު ދާންޖެހުނީ އެބުރި ގައުމަށެވެ.

މި ވޯލްޑްކަޕް ވެގެން ދިޔައީ މަރަޑޯނާގެ އެންމެ ފަހުގެ ވޯލްޑްކަޕަށެވެ.

އަބަދަށްޓަކާ ދުނިޔެ ހަދާންކުރާނެ ތަރިއެއް:

މިއަދު އަޅުގަޑުމެން، ދުނިޔޭގައި މިހާތަނަށް އުފެދު އެންމެ މޮޅު ފުޓްބޯޅަ ކުޅުންތެރިޔާގެ ވަކިވެދިއުމުގެ ހިތާމަ ކުރަމުންދާއިރު، އޭނާގެ ކުޅިވަރު ހަޔާތުގެ މުހިންމު އެތަކެއް ހަދާންތަކެއް މިދަނީ އާކުރަމުންނެވެ. ކުޅިވަރާއި، ޑްރަގާއި، އަދި އަމިއްލަ ހަޔާތުގެވެސް، އެތައް ހަލަބޮލިކަމެގެއް ތެރެއިންވެސް، މަރަޑޯނާ ތާރީޚުގެ ތެރެއަށް ދޫކޮށްލީ ތާއަބަދަށްޓަކާ، އެހަދާންތަކާއި ދުރަށް ދުނިޔެއަށް ނުދެވޭނެ ހަދާންތަކެކެވެ.

އެއީ ދުނިޔޭގެ ކުޅިވަރުގެ މައިދާނުން ދުވަހަކުވެސް ފޮހެވިގެން ނުދާނޭ ހަދާންތަކެކެވެ.