މާލޭ ފިހާރައެއްގެ ތެރެއަށް ވަދެ ވަޅިން ހަމަލާދީ ޒަޚަމްކޮށްލި މީހާއަށް ވެންޓިލޭޓަރުގައި ފަރުވާ ދެމުންދަނިކޮށް އޭނާ ނިޔާވެއްޖެއެވެ.
މިދިޔަ ހުކުރު ދުވަހުގެ ރޭ މާލޭގެ ފިހާރައަކަށްވަދެ ހިންގި މިމާރާމާރީގައި ޒަޚަމްކޮށްލާފައިވަނީ އުމުރުން 30 އަހަރުގެ ދިވެހި ފިރިހެނަކަށް ކަމަށް ފުލުހުން ވިދާޅުވެއެވެ.
އޭނާއަށް ލިބިފައިވާ ޒަޚަމްތަކަށް އައިޖީއެމްއެޗްގައި ދިޔައީ ފަރުވާދެމުންނެވެ. އައިޖީއެމްއެޗްއިން ވިދާޅުވީ އޭނާއަށް ފަރުވާދެމުންދަނީ އައިސީޔޫގައި ކަމަށެވެ. އަދި އޭނާއަށް ފަރުވާ ދެމުންދިޔައީ ވެންޓިލޭޓަރުގައި ކަމަށްވެސް އެހޮސްޕިޓަލުން ވިދާޅުވިއެވެ.
ފިހާރަތެރެއަށް ވަދެ އެމީހާގެ ބޮލަށާއި، ކަރު، މޭމަތި، ބަނޑުގެ އިތުރުން ފައިގެ ދެ ކަކުލަށް ވެސް ވަނީ ވަޅި ހަރައި ފުންކޮށް ޒަހަމް ކޮށްލާފައެވެ. އައިޖީއެމްއެޗްގެ މީޑިއާ އޮފިޝަލަކު ވިދާޅުވީ، މިއަދު ހެނދުނުގެ ވަގުތެއްގައި އެ މީހާ ނިޔާވެފައިވާ ކަމަށެވެ. އޮފިޝަލް ވިދާޅުވިގޮތުގައި، އެ މީހާ ނިޔާވެފައި ވަނީ މިއަދު ހެނދުނު 6:46 ހާއިރު އެވެ.
