ޖުމްހޫރީ ޕާޓީގެ ލީޑަރުކަމުގެ އިތުރު ދައުރަކަށް، ވޯޓަކާއި ނުލާއި އެޕާޓީގެ މިހާރުގެވެސް ލީޑަރު ޤާސިމް އިބްރާހީމް އިންތިޚާބުވެއްޖެއެވެ.
ޖުމްހޫރީ ޕާޓީ އުފެދުނީއްސުރެ އެޕާޓީގެ ލީޑަރަކީ ޤާސިމް އިބްރާހީމެވެ. ޤާސިމް މިފަހަރު އިންތިޚާބުވެވަޑައިގަތީ 4 ވަނަ ދައުރަށެވެ. މިއަދު ކުރިއަށްދާ ކޮންގްރެސްގައި ވަނީ، ގާސިމް ފިޔަވައި އެހެން ބޭފުޅަކު އެ މަގާމަށް ކުރިމަތިލާފައި ނުވާތީ އިންތިހާބުވެއްޖެ ކަމަށް ނިންމައިފައެވެ. މަގާމަކަށް އެންމެ މީހަކު ކުރިމަތިލައިފި ނަމަ، އިންތިހާބަކާ ނުލައި މަގާމަށް ހޮވޭ ގޮތަށް އަސާސީ ގަވާއިދު ބޭއްވުމަށް ވެސް ކޮންގްރެސްގައި މިއަދު ނިންމިއެވެ.
އެންމެ ކެންޑިޑޭޓަކު ކުރިމަތިލާފައިވާތީ، އޮޓޮމެޓިކުން މަގާމުތަކަށް އިންތިޚާބުވެފައިވާ ފަރާތްތައް:
1. ޒުވާނުންގެ ލީގުގެ ރައީސް: ޔާމީން
2.ޒުވާޏުންގެ ލީގުގެ ނައިބު ރައީސް: ޝުއައިބު ޝިފާޒް ޝަރީފް
3. އަންހެނުންގެ ލީގުގެ ސެކްރެޓަރީ: އައިޝަތު ޝޫޒާ އަޙްމަދު
ޖޭޕީ ލީޑަރުކަމަށް ޤާސިމް ފިޔަވާ އިތުރު ބޭފުޅަކު ކުރިމަތި ނުލެއްވިނަމަވެސް، އެހެން މަޤާމުތަކުގެ ވާދަވެރިކަން ބޮޑެވެ. އެގޮތުން އެޕާޓީއަށް ފަސް ނާއިބު ލީޑަރުން އިންތިޚާބު ކުރަންޖެހޭއިރު، އެ މަޤާމަށް ވަނީ 12 ބޭފުޅަކު ކުރިމަތިލައްވާފައެވެ. އޭގެ ތެރޭގައި ޓްރާންސްޕޯޓް މިނިސްޓަރ އަދި ޤާސިމް އިބްރާހީމް އަނބިކަނބަލުން އާއިޝަތު ނަހުލާވެސް ހިމެނިވަޑައިގަންނަވައެވެ.
މަޤާމުތަކަށް އައްޔަން ކުރަންޖެހޭ ބޭފުޅުން އައްޔަން ކުރުމަށް ރޭ ވޯޓުލުން ކުރިއަަށް ގެންދަން ނިންމި ނަމަވެސް އިންތިޚާބުގައި ވާދަކުރާ ކެނޑިޑޭޓުންގެ ފޮޓޯ ވޯޓު ކަރުދާހުގައި ނެތުމުން އެކަމާއި ހަމަނުޖެހުން ހިންގުމުން ވަނީ މިއަދަށް ވޯޓުގެ ކަންކަން ފަސްކޮށްފައެވެ.
މިއަދު ވޯޓުގެ އިތުރުން ކުރިއަށްދާ އެންމެ މުހިންމު އެއްކަމަކީ ރިޔާސީ އިންތިޚާބުގައި ޖޭޕީން ނިންމާ ގޮތަކާއިމެދު ހުށަހެޅިފައިވާ ޤަރާރަށް ބަހުސްކޮށް ވޯޓަށް އެހުމެވެ. މިބައި އޮންނާނީ މިއަދު މެންދުރު ފަހުއެވެ.
