މިއަހަރު ބާއްވާ ރިޔާސީ އިންތިހާބުގައި ޖުމްހޫރީ ޕާޓީން ކުރިއަށްދާނެ ގޮތެއް ކަނޑައެޅުމަށް ބާއްވާ އެ ޕާޓީގެ ގައުމީ ކޮންފަރެންސްގައި ބައިވެރިވުމަށް ނައިބު ރައީސް ފައިސަލް ނަސީމަށް ދައުވަތު ފޮނުވާފައިވާ ކަމަށާއި ނަމަވެސް ކޮންފަރެންސްގައި ބައިވެރިވެވަޑައި ނުގެންނެވި ސަބަބެއް ނޭގޭކަމަށް ޖުމްހޫރީ ޕާޓީން ބުނެފިއެވެ.
ޖޭޕީގެ ކޮންފަރެސް ފެށުމަށް ބޭއްވި ޖަލްސާގައި، އެ ޕާޓީގެ ލީޑަރު ގާސިމް އިބްރާހީމް، އެމްޑީޕީގެ ރައީސް މުހައްމަދު ނަޝީދު، އަދާލަތު ޕާޓީގެ ރައީސް އިމްރާނާއި، މޯލްޑިވްސް ރީފޯމް މޫވްމެންޓް (އެމްއާރްއެމް) ފަރާތުން އެ ޕާޓީގެ ރައީސް ފާރިސް މައުމޫން އަދި ބޭރު ގައުމުތަކުން ރާއްޖެއަށް ކަނޑައަޅާފައިވާ ސަފީރުން ބައިވެރިވެ ވަޑައިގެންނެވިއެވެ.
ކޮންފަރެންސްގައި ބައިވެރިވެވަޑައިގަތުމުގެ ދައުވަތު ޖޭޕީން ވަނީ ރައީސް އިބްރާހީމް މުހައްމަދު ސޯލިހަށްވެސް ފޮނުވައިފައެވެ. ނަމަވެސް އެ މަނިކުފާނު ނުރަސްމީ ދަތުރުފުޅެއްގައި މިވަގުތު ހުންނެވީ ސިންގަޕޫރުގައެވެ. ކޮންފަރެންސްގައި ބައިވެރިވެވަޑައިގަތުމުގެ ދައުވަތު ޖޭޕީގެ ފަރާތުން ވަނީ ނައިބު ރައީސް ފައިސަލަށް ވެސް ފޮނުވައިފައެވެ. ފައިސަލަކީ ޖޭޕީގެ ފަރާތުން ނައިބު ރައީސްގެ މަގާމުގައި ހުންނެވި ބޭފުޅެކެވެ.
ޖޭޕީގެ ތަރުޖާން އަލީ ޞާލިހު ވިދާޅުވެފައިވަނީ ކޮންފަރެންސްގައި ބައިވެރިވެވަޑައިގަތުމުގެ ދައުވަތު ނައިބު ރައީސަށް ފޮނުވާފައިވާނެ ކަމަށާއި ކޮންފަރެންސްގައި ނައިބު ރައީސް ބައިވެރިވެވަޑައި ނުގެންނެވި ސަބަބެއް ދަންނަވަން ދަތި ކަމަށެވެ.
މިޖަލްސާގައި ނައިބް ރައީސް ބައިވެރިވެ ވަޑައި ނުގަންނަވާއިރު، ވަރަށް ފަހުން އެމަނިކުފާނު ވަނީ ކުރިޔަށް އޮތް ރިޔާސީ އިންތިޚާބުގައި ރައީސް ޞާލިހަށް ތާއީދު ކުރައްވާ ވާހަކަފުޅު ދައްކަވާފައެވެ. އެހެންނަމަވެސް، ނާއިބު ރައީސް ފައިސަލް ނަސީމު ނިސްބަތްވާ ޖުމުހޫރީ ޕާޓީން ބުނެފައިވަނީ، އެޕާޓީން ރިޔާސީ އިންތިޚާބާއި ގުޅޭގޮތުން ނިންމުމެއް ނިންމާނީ ކުރިޔަށްދާ ކޮންގްރެސްއަށްފަހުގައި ކަމުގައެވެ.
ފައިސަލް ނަސީމު ނާއިބު ރައީސްކަމަށް ވަޑައިގެންނެވީ ޖޭޕީގެ ސްލޮޓުގައި ކަމަށްވި ނަމަވެސް، މަގާމާއި ހަވާލުވެ ވަޑައިގެންނެވި ފަހުން ޕާޓީގެ ހަރަކާތްތަކުން ފެނިގެން ގޮސްފައެއް ނުވެއެވެ.
މިހާރު ކުރިޔަށްދާ ޖެޕީގެ ގައުމީ ކޮންފަރެންސްގައި އެޕާޓީގެ އެތެރޭގެ އިންތިޚާބުތަކުގެ އިތުރުން، 2023 ވަނަ އަހަރުގެ ރިޔާސީ އިންތިހާބާ ގުޅޭ ނިމުންތައް ނިންމާނެއެވެ. ޖޭޕީގެ ގައުމީ ކޮންފަރެންސްގައި އެ ޕާޓީގެ ލީޑަރު، ޕާޓީގެ ޑެޕިއުޓީ ލީޑަރުން، ޒުވާނުންގެ ލީގުގެ ރައީސް، ޒުވާނުންގެ ލީގުގެ ނައިބު ރައީސް، ޒުވާނުންގެ ލީގުގެ ސެކްރެޓަރީ، ޒުވާނުންގެ ލީގުގެ މެމްބަރުން، އަންހެނުންގެ ލީގުގެ ރައީސް، އަންހެނުންގެ ލީގުގެ ނައިބު ރައީސް، އަންހެނުންގެ ލީގުގެ ސެކްރެޓަރީގެ އިތުރުން އަންހެނުންގެ ލީގުގެ މެމްބަރުން، އަދި ގައުމީ ކޮންފަރެންސްއިން އިންތިހާބުކުރާ 25 މެމްބަރުން އިންތިޚާބު ކުރުމަށްވަނީ ހަމަޖެހިފައެވެ.
މީގެ އިތުރުން، އަސާސީ ގަވާއިދަށް ގެންނަން ޕާޓީގެ ކައުންސިލުން އެންޑޯޒްކޮށްފައިވާ އިސްލާހުތަކަށް ބަހުސްކޮށް ގޮތެއް ނިންމުންވެސް މި ކޮންގްރެސްގައި އޮންނާނެއެވެ. އަދި އަސާސީ ގަވާއިދުގެ ދަށުން ޕާޓީގެ ލީޑަރު އަޔަންކުރައްވަންޖެހޭ މަގާމުތަކަށް ބޭފުޅުން އައްޔަންކުރެއްވުންވެސް އޮންނާނެއެވެ.
