އެމްއާރުއެމްއިން ކޯލިޝަން މަޝްވަރާ ކުރާނީ ރައީސް މައުމޫން ރާއްޖެ ވަޑައިގެންނެވުމުން ކަމުގައި އެޕާޓީން ބުނެފިއެވެ.
ކުރިއަށް އޮތް ރިޔާސީ އިންތިޚާބުގައި، ގުޅިގެން މަސައްކަތްކުރުމާއި ގުޅޭގޮތުން މަޝްވަރާކުރުމަށް އެމްއާރުއެމްގެ ޒަޢީމް، ރައީސް އަލްއުސްތާޛް މައުމޫން ޢަބްދުލްޤައްޔޫމަށް، މޯލްޑިވިއަން ޑިމޮކްރެޓިކް ޕާޓީގެ އެންމެ އިސްފަރާތް، ރައީސް އިބްރާހީމް މުޙައްމަދު ޞާލިޙް ފޮނުއްވަވާފައިވާ ސިޓީގެ ޖަވާބު މިއަދު އެޕާޓީން ވަނީ ދެއްވާފައެވެ.
އެމްއާރުއެމްއިން ބުނީ އިއްތިހާދު ސަރުކާރުގެ ބައިވެރިއެއްގެ ގޮތުގައި ފާއިތުވެ ދިޔަ އަހަރުތަކުގައި މިޕާޓީއަށް ކުރެވުނު ތަޖުރިބާތަކާއި މެދު، އަދި ކުރިޔަށް އޮތް ރިޔާސީ އިންތިޚާބާއި މެދު އެމަނިކުފާނާއި ބައްދަލު ކުރަން އެޕާޓީއިން ބޭނުންވާކަމަށެވެ. ނަމަވެސް، މިވަގުތު ރައީސް އަލްއުސްތާޛް މައުމޫން ޢަބްދުލްޤައްޔޫމް ހުންނެވީ އަމިއްލަ ދަތުރުފުޅެއްގައި ރާއްޖެއިން ބޭރުގައި ކަމަށްވުމުން މަޝްވަރާތައް މިވަގުތު ކުރެވެން ނެތްކަމަށް ދަންނަވާފައިވާކަމަށެވެ.
އަދި ރައީސް އަލްއުސްތާޛް މައުމޫން ޢަބްދުލްޤައްޔޫމް ރާއްޖެއަށް އެނބުރި ވަޑައިގަތުމުން، އެދިވަޑައިގެންފައިވާ ބައްދަލުވުން ބޭއްވުމަށް ފަސޭހަފުޅު ވަގުތެއް އެމަނިކުފާނާއި ޙިއްސާކުރާނެ ކަމަށް މިއަދު ފޮނުވި ސޮޓީގެ ޖަވާބުގައި ދަންނަވާފައިވާކަމަށް އެޕާޓީން ވަނީ ބުނެފައެވެ.
ސަރުކާރު ހިންގާ ކޯލިޝަންގައި ހިމެނޭ ޕާޓީތަކަށް ރައީސް ޞާލިހު ފޮނުވި ސިޓީގައި ގުޅިގެން މިހާތަނަށް ކޯލިޝަން ހަދަން ނިންމާފައިވަނީ އަދާލަތު ޕާޓީން އެކަންޏެވެ. މިސިޓީއާއިމެދު މިހާތަނަށް އެއްވެސް އެއްޗެއް ބުނެފައި ނުވަނީ ޖުމްހޫރީ ޕާޓީންނެވެ. އެޕާޓީގެ ޤައުމީ ޖަލްސާ މާދަމާ ފަށާއިރު އެޖަލްސާގައި މުހިންމު ކަންތައްތަކެއް ނިންމުމަށް ވަނީ ހަމަޖެހިފައެވެ.
