މިއަހަރުގެ ރިޔާސީ އިންތިޚާބަށް އެކީގައި މަސައްކަތް ކުރުމަށް، ރައީސް އިބުރާހިމް މުހައްމަދު ސާލިހާއެކީ ކޯލިޝަން ހެދުމަށްޓަކާ އަދާލަތު ޕާޓީން އެމްޑީޕިއާއެކީ މަޝްވަރާތައް ފަށަައިފިއެވެ.
އަދާލަތު ޕާޓީގެ ތަރުޖަމާނު އަލީ ނަޒީރު މިރޭ ކުރެއްވި ޓުވީޓެއްގައި ވިދާޅުވެފައިވަނީ އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ސާލިޙުގެ ދައުވަތަށް، އެޕާޓީއާއެކު މަޝްވަރާކުރުމަށް ޢަދާލަތު ޕާޓީގެ މަޝްވަރާ މަޖިލީހުން ނިންމާފައިވާތީ، ކުރިޔަށް އޮތް ރިޔާސީ އިންތިޚާބުގައި އެމްޑީޕީގެ ކެންޑިޑޭޓަށް ތާއީދުކުރުމާ ގުޅޭގޮތުން އެމްޑީޕީއާއެކު މިއަދު އެޕާޓީން މަޝްވަރާ ކޮށްފައިވާ ކަމުގައެވެ.
އެހެންނަމަވެސް މި މަޝްވަރާތަކު ނަތީޖާއަކީ ކޮބައިކަމެއް އޭނާގެ ޓުވީޓުގައި ވިދާޅުވެފައެއް ނުވެއެވެ. އަދި މަޝަވަރާތަކުގައި ބައެވެރިވީ ބޭފުޅުންގެ މައުލޫމާތެއްވެސް އޭނާ ހާމަކުރައްވާފައެއް ނުވެއެވެ.
އެމްޑީޕީގެ ރިޔާސީ ކެންޑިޑޭޓް ރޖ އިބްރާހީމް މުހައްމަދު ސާލިޙުގެ ދައުވަތަށް، އެޕާޓީއާއެކު މަޝްވަރާކުރުމަށް ޢަދާލަތު ޕާޓިގެ މަޝްވަރާ މަޖިލީހުން ނިންމާފައިވާތީ، ކުރިޔަށް އޮތް ރިޔާސީ އިންތިޚާބުގައި އެމްޑީޕީގެ ކެންޑިޑޭޓަށް ތާއީދުކުރުމާ ގުޅޭގޮތުން އެމްޑީޕީއާއެކު މިއަދު މަޝްވަރާކުރެވުނު.
— Ali Nazeer (@alynazeer) February 21, 2023
ކޯލިޝަނާއެކު ރިޔާސީ އިންތިހާބަށް ނިކުތުމަށް އެދި ރައީސް ސޯލިހު ސޮއި ކުރައްވައި، މިހާރުވެސް ސަރުކާރުން ހިންގާ ކޯލިޝަންގައި ތިބި ޕާޓީތަކަށް ފޮނުއްވި ސިޓީފުޅުގައި ވިދާޅުވެފައި ވަނީ ކޯލިޝަންގައި ހިމެނޭ ޕާޓީތަކުގެ ފަރާތުން ވޭތުވެދިޔަ ހަތަރު އަހަރު ތެރޭގައި ވަރަށް ފުރިހަމަ އެއްބާރުލުމެއް ލިބިފައިވާ ކަމަށާއި ކުރިއަށް އޮތް ރިޔާސީ އިންތިހާބުގައި ވެސް އެ ޕާޓީތަކާއެކު އިންތިހާބަށް ނިކުންނަވަން އެމަނިކުފާނު ބޭނުންފުޅުވާ ކަމަށެވެ.
މި ވެރިކަން އުފެއްދީ މި ޕާޓީތަކުން ގުޅިގެން އުފެއްދި ކޯލިޝަނަކުން ރިޔާސީ އިންތިހާބުގެ ފުރަތަމަ ބުރުގައެވެ. މިއީ އާ ގާނޫނުއަސާސީއަށް އަމަލުކުރަން ފެށިފަހުން ފުރަތަމަ ބުރުގައި އުފެދުނު ފުރަތަމަ ވެރިކަމެވެ. އެ ނޫން ހުރިހާ ވެރިކަންތަކުގައި ވެސް ކޯލިޝަން ހަދަނީ ދެ ވަނަ ބުރުގައެވެ.
އެމްޑީޕީގެ ރިޔާސީ ޓިކެޓް ކާމިޔާބު ކުރައްވައި ރައީސް އިބްރާހިމް މުހައްމަދު ސޯލިހް ވިދާޅުވެފައި ވަނީ އެމަނިކުފާނުގެ ވިސްނުންފުޅު ހުރީ އެހެން ޕާޓީތަކާ އެކު އުފައްދާ ކޯލިޝަނަކުން އަނެއްކާ ވެސް ވެރިކަން ކުރެއްވުމެވެ. އެކަމަށްޓަކައި ޕާޓީތަކާ އެކު މަޝްވަރާކުރެއްވުމުގެ ހުރިހާ ބާރެއް އެމްޑީޕީގެ ގައުމީ މަޖިލީހުން އެމަނިކުފާނަށް ވަނީ ދެއްވައިފައެވެ.
ރައީސް ވިދާޅުވެފައި ވަނީ އިންތިހާބު ކާމިޔާބުކުރައްވަން ބޭނުންފުޅުވަނީ އެއް ބުރުން ކަމުގައެވެ. އެކަން ކުރެވޭނީ ހުރިހާ ޕާޓީތަކުން ވެސް ގައުމުގެ ހަމަޖެހުމާއި ކުރިއެރުމަށް މިހާރު ގެންގުޅޭ ވިސްނުމުގައި އެއްބައިވަންތަކާ އެކު ދެމިތިބެގެން ކަމަށް ވެސް އެމަނިކުފާނު ވަނީ ވިދާޅުވެފައެވެ.
އެމްޑީޕީއާއި އަދާލަތު ޕާޓީން ކޯލިޝަން މަޝްވަރާތައް ފަށާފައިވާއިރު، ކޯލިޝަންގައި ހިމެނޭ އެހެން ޕާޓީތަކުން ރައީސް ސާލިހުގެ ސިޓީފުޅަށް އަދި ޖަވާބެއް ދީފައެއް ނުވެއެވެ.
