މި އަހަރުގެ ރިޔާސީ ބަޔާނުން ފެނިގެންދިޔައީ، ރައީސުލްޖުމްހޫރިއްޔާއަށް ޤާނޫނުއަސާސީން މަތިކޮށްފައިވާ ރިޔާސީ ބަޔާން އިއްވުމުގެ ބާރާއި ޒިންމާ، މި އަހަރުގެ ރިޔާސީ އިންތިޚާބަށް ވަޢުދުތަކެއް ވެވަޑައިގަތުމަށް ބޭނުންކުރެއްވިތަން ކަމުގައިި މޯލްޑިވްސް ނޭޝަނަލް ޕާޓީން އެމްއެންޕީން ބުނެފިއެވެ.
މަޖިލީހުގެ މައިނޯރިޓީ ޕާޓީން ރިޔާސީ ބަޔާނަށް ޖަވާބު ނުދިނުމުން، އެމްއެންޕީން ވަނީ މިއަދު ވަރަށް ހަފްސީލީ ގޮތެއްގައި ރައީސް އިއްވެވި ރިޔާސީ ބަޔާނަށް ޖަވާބުދާރީވެފައެވެ. އެޕާޓީން ބުނެފައިވަނީ މިބަޔާނުން ފެނުނީ ދައުލަތުގެ ހިންގުމުގެ ސިޔާސަތަކީ، ޤައުމީވިސްނުމާއި ރޭވުންތެރިކަމެއް ނެތި، ފެންފައިބާ ތަންތަނުގައި ޕެޗް އެޅުމުގެ ވިސްނުމުން ހިންގަވާ ސިޔާސަތެއްކަން ފެނި ހާމަވެގެން ދިޔަ ތަންކަމަށެވެ.
މީގެ އިތުރުން، ޤައުމުގައި އަވަހަށް ޙައްލުކުރަންޖެހޭ ސީރިއަސް މައްސަލަތަކެއް ހުރިއިރު، އެކަންކަމުގެ ޙައްލުތަކުގެ ވާހަކަނެތި، ވޯޓަށްޓަކައި މީހުން ރުއްސުމަށް ދޭ ހަދިޔާތަކެއްގެ ވާހަކަ މުޅި ރިޔާސީ ބަޔާނުގައި ހިމަނުއްވާފައިވީ ތަންކަމަށެވެ. އަދި މުޅި ދައުލަތް އެކުގައި ހިންގާނޭ ގޮތުގެ ތަޞައްވުރެއް ރައީސުލްޖުމްހޫރިއްޔާގައި އަދި ސަރުކާރުގައި ނެތްކަން ހާމަވެގެން ދިޔަ ކަމަށާއި، ހަމައެއާއެކު، މިހާރުވެސް އެކި ފަންތީގެ މީހުންގެ މެދުގައި ހުރި ތަފާތުތައް ހުރިގޮތަށް ބަހައްޓަވައިގެން status quo ދަމަހައްޓަވައިގެން، ޒިންމާދާރުކަމެއްނެތި ޚަރަދުތަކެއް ކުރެއްވުމުގެ އިޢުލާނުތަކެއް ކުރެއްވިތަން މިފަހަރުގެ ބަޔާނުން ފެނިގެން ގޮސްފައިވާކަމަށެވެ.
2023 ވަނަ އަހަރުގެ ރިޔާސީ ބަޔާނަށް މޯލްޑިވްސް ނެޝަނަލް ޕާޓީން ހުށަހަޅާ ޖަވާބުhttps://t.co/CKWn2iEQ99 pic.twitter.com/uefLD9goHt
— Maldives National Party (@MNP_Secretariat) February 21, 2023
ރިޔާސީ ބަޔާނަށް އެމްއެންޕީން ދިން ޖަވާބުގައި ރައީސްގެ ރިޔާސީ ބަޔާނުގައި އަޅިއަޅުވާލި 17 ކަމަކަށް ވަނީ ތަފްސީލީ ޖަވާބުތަކެއް ދީފައެވެ. އެޕާޓީން ބުނީ ޅަފަތުގައި އޮތް ޤާނޫނުއަސާސީ އަކާއި ހިންގުމުގެ އޮނިގަނޑު ވަރުގަދަ ކޮށް ދިވެހިދައުލަތަކީ ބޭރުގެ ނުފޫޒުތަކާއި މި ޒަމާނުގެ އޮއިވަރުތަކުގައި އަމިއްލަ ފައިމައްޗަށް ކޮޅަށްހުރެވޭ ވަރުގެ ދައުލަތަކަށް ހެދުމަށް ކުރަންޖެހޭ ޤައުމީ މަސައްކަތުގެ ބަދަލުގައި، އަމިއްލަ ފައިދާއަށް ވެރިކަމުގެ ބާރުތައް ބޭނުންކޮށްގެން، ދައުލަތުގެ އޮނިގަނޑު ހަލާކުކޮށްލާފައިވާކަމެވެ. އަދި ދައުލަތުގެ އަމިއްލަވަންތަކަމާއި، ހަމަހަމަކަމާއި، މިނިވަންކަން ނިގުޅައިގަނެ، ޤާނޫނުއަސާސީގައިވާ ދައުލަތުގެ އޮނިގަނޑުގެ ބާރުއެކުގައި ދުއްވާލާފައިވާ ކަމެވެ.
މިހާރު ރާއްޖޭގައި ކަންހިނގަމުންދާ ގޮތަށް ބަލައިފިނަމަ، ދިވެހިރާއްޖޭގެ ދައުލަތް ޤާނޫނުއަސާސީގައިވާ ގޮތަށް ހިނގާކަމުގައި ބުނެވޭނޭ ހަމައެއްވެސް ހަމައެއް ނެތް. ދިވެހިރާއްޖޭގައި ދައުލަތެއް ދެމިއޮތްކަމަށް ދަޢުވާކުރާނަމަ، އެކަމުގެ ދަލީލުތަކުގެ ގޮތުގައި ދައްކާނޭ އަމިއްލަ ވަންތަ ޚާރިޖީ ސިޔާސަތެއް، ދާޚިލީ ނިންމުންތަކެއް އަދި މިނިވަން މުއައްސަސާތަކެއް ނެތްކަމީ ސްކޫލް މަދަރުސާތަކުގެ ދަރިވަރުންނަށްވެސް އެނގި ފެންނަން އޮތް ޙަޤީޤަތް. ދައުލަތުގެ މައްޗަށް އިސްކޮށްފައިވާ އަމިއްލަ ވިސްނުންތަކެއްގެ ތެރެއިން ޤާނޫނުއަސާސީގައިވާ އުޞޫލުތައް މިވަނީ މުގުރާލާފަ. ހަމަހަމަކަމާއި ޢަދުލުވެރިކަން ގެއްލުވާލައިފަ.
– އެމްއެންޕީން ބުނެފައިވެއެވެ.
އެޕާޓީން ބުނީ މި ޙާލަތުގައި ވަކި ބަޔަކަށް ނޫނީ ދައުލަތުގެ ނަފާވެރިކަން ނުލިބުމާއި، ވަކިބަޔަކު ދައުލަތުގެ ރައްކާތެރިކަމުން މަޙްރޫމްވުމާއި، ވަކި ބައެއްގެ މައްޗަށް ޤަނޫނާއި ގަވާއިދު ނުހިނގުމާއި، ވަކި ކުލަޔަކުން ހެދުން ލައިގެން މެނުވީ ވަޒީފާއާއި ގެދޮވެރިކަން ފަދަ ފުރުޞަތުތައް ނުލިބުމާއި، ދައުލަތުގެ މުދާވެރިކަން ވަކި ޤައުމެއްގެ އަތްދަށަށް ދިޔުމާއި، ބައިނަލްއަޤްވާމީ މައިދާނުގައި ބުނަންޖެހޭ އެއްޗެއް ޤައުމުގެ ޙައްޤުގައި ބުނަން ދަތިވާ ޙާލަތަށް ޤައުމު ދިއުމަކީ ޙައިރާންވާންވީ ކަމެއް ނޫންކަމަށެވެ.
