ރައްޔިތުންގެ މަޖިލިސް މިއަހަރަށް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވި ރިޔާސީ ބަޔާނަށް ޖަވާބުދެއްވުމަށް ލިބުނު ފުރުސަތުގައި މަޖިލީހުގެ މައިނޯރިޓީ ޕާޓީން ޖަވާބު ނުދިނުމުން، މޯލްޑިވްސް ނޭޝަނަލް ޕާޓީން ރިޔާސީ ބަޔާނަށް ޖަވާބުދީފިއެވެ.

މަޖިލީހުގައި ތިން މެމްބަރުން ހިމެނޭ އެމްއެންޕީން ވަނީ މިއަދު ރިޔާސީ ބަޔާނުގެ ޖަވާބު މަޖިލީހަށް ފޮނުވާފައެވެ. އެޕާޓީން ބުނީ ރައްޔިތުންގެ މަޖިލީހުގެ ޤަވާއިދުގައި ބުނެފައިވާގޮތުން ކޮންމެ އަހަރަކު ރައީސުލްޖުމްހޫރިއްޔާ ރިޔާސީ ބަޔާން އިއްވެވުމުން މަޖިލީހުގައި ހިމެނޭ ޕާޓީތަކުގެ ތެރެއިން، ރައީސުލްޖުމްހޫރިއްޔާ ނިސްބަތްވާ ޕާޓީ ފިޔަވައި ދެން އެންމެ ގިނައިން މެންބަރުން ތިއްބެވި ޕާޓީތަކުގެ ފަރާތުން އެ ރިޔާސީ ބަޔާނަށް ޖަވާބު ތައްޔާރުކޮށް އެ ޖަވާބު މަޖިލީހުގެ ޖަލްސާއެއްގައި އިއްވަވަންވާނެކަމަށެވެ.

ނަމަވެސް ރައްޔިތުންގެ މަޖިލީހުގެ ގަވާއިދުގެ 32 ވަނަ މާއްދާގެ (ބ) ގައި ބަޔާންކޮށްފައިވާ 14 (ސާދަ) ދުވަހުގެ މުއްދަތުގެ ތެރޭގައި މަޖިލީހުގެ މައިނޯރިޓީ ލީޑަރު ރިޔާސީ ބަޔާނުގެ ޖަވާބުދެއްވާފައި ނުވާއިރު، މިހާރު ޤައުމުގެ ޙާލަތު އޮތް ގޮތުން ރިޔާސީ ބަޔާނަށް ރަސްމީގޮތެއްގައި ޖަވާބެއްދީ، އަދި އެ ޖަވާބު މަޖިލީހުގެ ލިޔުންތަކުގައި ދަފްތަރުކުރެވި އަދި ރައްޔިތުންގެ މަޖިލީހުގައި އެ ޖަވާބު ހުށަހެޅުމަކީ ކޮންމެހެން ބޭނުން ކަމެއްކަމަށް ދޭކޭކަމަށެވެ.

އެގޮތުން މިއަހަރުގެ ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާއަށް ރައީސުލްޖުމްހޫރިއްޔާ އިބްރާހީމް މުޙަންމަދު ޞާލިޙް ހުށަހަޅުއްވާފައިވާ ރިޔާސީ ބަޔާނަށް، ރައްޔިތުންގެ މަޖިލީހުގައި ތަމްސީލް ކުރާ އިދިކޮޅު ޕާޓީއެއްގެ ޙައިސިއްޔަތުން، މޯލްޑިވްސް ނޭޝަނަލް ޕާޓީން ހުށަހަޅާ، ރިޔާސީ ބަޔާނުގެ ޖަވާބު މިއަދު ވަނީ މަޖިލީހުގެ އިދާރާއަށް ހުށަހަޅައިފައކަމަށެވެ.

މި ޖަވާބުގައި، ރައީސުލްޖުމްހޫރިއްޔާ ރިޔާސީ ބަޔާނުގައި ފާހަގަކުރައްވާފައިވާ ކަންކަމާއި ސިޔާސަތުތަކަށް އަލިއަޅުވާލައި ޖަވާބުދީފައިވާނެ. އެގޮތުން، ޤައުމުގެ ދުސްތޫރީ ނިޒާމް ހިންގައި ޤާނޫނު އަސާސީއަށް ޢަމަލުކުރައްވާ ގޮތަށާއި، ޤައުމުގެ ދިފާޢީ، ޚާރިޖީ ސިޔާސަތާއި، ދައުލަތުގެ ދަރަންޏާއި އިޤްތިޞާދު، ތަޢުލީމާއި ޞިއްޙަތު، ޢަދުލު އިންޞާފާއި ކޮރަޕްޝަން، ތަޢުލީމާއި ޞިއްޙަތު، މަސްތުވާތަކެތީގެ މައްސަލަ އާއި ކުށްކުރުން، ޒުވާނުން، ވިޔަފާރިއާއި ޤައުމުގެ ޞިނާޢަތްތައް އަދި މީގެ އިތުރުންވެސް ރިޔާސީ ބަޔާނުގައި އަލިއަޅުވާލައްވާފައިވާ މުހިއްމު ހުރިހާ ދާއިރާތަކަށް ބިނާކުރަނިވިގޮތެއްގައި ޒިންމާދާރުކަމާއެކު ޖަވާބުދީފައިވާނެ.

– އެމްއެންޕީން ބުނެފައިވެއެވެ.

ހަމައެއާއެކު ރިޔާސީ ބަޔާން 2023 އަށް މި ޕާޓީން ހުށަހެޅި ޖަވާބު މަޖިލީހަށް ރަސްމީ ސިފައެއްގައި ބަލައިގަނެ، ރިޔާސީ ބަޔާނަށް ދޭ ޖަވާބުގެ ގޮތުގައި މަޖިލީހަށް ހުށަހެޅޭނެ ގޮތް ހަމަޖައްސަވައިދެއްވުން އެޕާޓީން ވަނީ މަޖިލީހުގައި އެދިފައެވެ.

ރިޔާސީ ބަޔާނަށް އިދިކޮޅުން ޖަވާބު ދީފައި ނުވަނީ މަޖިލިސް ހުޅުވުމަށް ބޭއްވި ދުވަހަ މައިނޯރިޓީ ލީޑަރާއި މަޖިލީހުގެ އިދިކޮޅު މެމްބަރުން މަޖިލިސް ތަޅުމުން ނެރެ، ހިންގި ކަންކަމާއި ގުޅިގެންނެވެ. މަޖިލީހުގެ މައިނޯރިޓީ ލީޑަރު އަހުމަދު ސަލީމް ވިދާޅުވީ އަޑުނީވޭ ބަޔާނަކަށް ޖަވާބުދާރީވާން ނުޖެހޭނެކަމަށެވެ.