ކުރިއަށް އޮތް ރިޔާސީ އިންތިޚާބުގައި ރައީސް އިބްރާހީމް މުޙައްމަދު ޞާލިޙާއެކު ކޯލިޝަން ހަދުމާމެދު އިތުރު މަޝްވަރާއަކަށް ނުގޮސް ތާޢީދުކުރަން ނުނިންމީ ކީއްވެގެންތޯ އައްސަވައި ރައްޔިތުންގެ މަޖިލީހުގެ މަޑަވެލި ދާއިރާގެ އެމްޑީޕީ މެމްބަރު ޙުސައިން ފިރުޝާން ޢަދާލަތު ޕާޓީގެ ރައީސް ޝައިޚް އިމްރާން އަބްދުﷲ އާއި އެޕާޓީއަށް ސުވާލެއް ކުރިމަތިކޮށްފިއެވެ.
ފިރުޝާން މިގޮތަށް ސުވާލުކުރެއްވީ ރިޔާސީ އިންތިޚާބުގައި ކޯލިޝަން ހެދުމާ ގުޅޭގޮތުން އެމްޑީޕީއާއެކު މަޝްވަރާކުރަން ނިންމައި އެކަން ޢަދާލަތު ޕާޓީން ހާމަކުރުމާ ގުޅިގެންނެވެ. ޢަދާލަތުން މިގޮތަށް ނިންމީ ތާޢީދު ކޮށްދިނުން އެދި މިހާރުގެ ސަރުކާރުގައި ހިމެނޭ ކޯލިޝަން ޕާޓީތަކަށް ރައީސް ޞާލިޙް ފޮނުއްވި ސިޓީ ފުޅަކާ ގުޅިގެންނެވެ. އެސިޓީފުޅު ޢަދާލަތު ޕާޓީއަށްވެސް ވަނީ ލިބިފައެވެ.
Keehve tho ithuru mashvaraa akaa nulai thaaedhu nudhevvee? Mihaaru sarukaarun dheefa oiy % kudakamun bodu % akah demand kuravvan tho @ShimranAb ? https://t.co/jYJXSsYJc4
— Hussain Firushan 🇲🇻 (@husnfirey) February 20, 2023
ރައީސް ސިޓީފުޅަށްފަހު ޢަދާލަތު ޕާޓީން ހާމަކޮށްފައިވަނީ އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގައި މިހާރުގެ ރައީސް އަދި އެމްޑީޕީގެ ކެންޑިޑޭޓު، ރައީސް އިބްރާހިމް މުހައްމަދު ސޯލިހަށް ތާއީދުކުރަން މަޝްވަރާ ކުރާ ގޮތަށް އަދާލަތު ޕާޓީން ނިންމާފައިވާކަމަށެވެ.
އެޕާޓީން މިގޮތަށް ނިންމީ މިރޭ ބޭއްވި އެޕާޓީގެ ކުއްލި މަޝްވަރާ މަޖިލީހުގެ ބައްދަލުވުމުގައެވެ. މިބައްދަލުވުން ޗެއާ ކުރައްވީ އަދާލަތު ޕާޓީގެ ރައީސް އަދި ހޯމް މިނިސްޓަރ އިމްރާނެއެވެ. މިބައްދަލުވުމުގައި ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލީ ޒާހިރާއި، އިސްލާމިކް މިނިސްޓަރ ޑރ.އަހުމަދު ޒާހިރުވެސް ބައިވެރިވެ ވަޑައިގަންނަވައެވެ.
ރައީސް ސޯލިހުގެ ދައުވަތާ ގުޅޭ ގޮތުން ގޮތެއް ނިންމުމަށް ބޭއްވި ބައްދަލުވުމުގައި، ރައީސް ސޯލިހުގެ މި ހިނގާ ރިޔާސީ ދައުރުގެ ތަޖުރިބާ އެހެން ސަރުކާރުތަކަށް ވުރެ ރަނގަޅުކަން ފެނިފައިވާ ކަމަށް މަޝްވަރާ މަޖިލީހުން ފާހަގަ ކުރިއެވެ. ނަމަވެސް އެ މަޖިލީހުން ނިންމީ ރައީސަށް ތާއީދު ދިނުމުގެ ކުރިއަށް އެމްޑީޕީއާއެކު އިތުރަށް މަޝްވަރާ ކުރުމަށެވެ.
ކޯލިޝަނާއެކު ރިޔާސީ އިންތިހާބަށް ނިކުތުމަށް އެދި ރައީސް ސޯލިހު ސޮއި ކުރައްވައި ސިޓީފުޅު ފޮނުއްވީ ޖުމްހޫރީ ޕާޓީ އާއި އަދާލަތު ޕާޓީ އަދި މޯލްޑިވްސް ރިފޯމް މޫވްމަންޓަށެވެ. ސިޓީފުޅުގައި ރައީސް ސޯލިހު ވިދާޅުވެފައި ވަނީ ކޯލިޝަންގައި ހިމެނޭ ޕާޓީތަކުގެ ފަރާތުން ވޭތުވެދިޔަ ހަތަރު އަހަރު ތެރޭގައި ވަރަށް ފުރިހަމަ އެއްބާރުލުމެއް ލިބިފައިވާ ކަމަށާއި ކުރިއަށް އޮތް ރިޔާސީ އިންތިހާބުގައި ވެސް އެ ޕާޓީތަކާއެކު އިންތިހާބަށް ނިކުންނަވަން އެމަނިކުފާނު ބޭނުންފުޅުވާ ކަމަށެވެ.
އެމްޑީޕީގެ ރިޔާސީ ޕްރައިމެރީ ތަނަވަސް އަޣުލަބިއްޔަތުން ކާމިޔާބުކުރައްވައި މިހާރު ރަސްމީކޮށް ރައީސް ޞާލިޙަށް އެމްޑީޕީގެ ރިޔާސީ ޓިކެޓު އަރުވާފައިވީނަމަވެސް ސަރުކާރު ކޯލިޝަންގައި ހިމެނޭ އެއްވެސް ޕާޓީއަކުން އަދި ރައީސް ޞާލިޙަށް ތާޢީދުކުރާކަން ހާމައެއް ނުކުރެއެވެ.
