އަލްމަދަރުސަތުލް ޢަރަބިއްޔަތުލް އިސްލާމިއްޔާ ނުވަތަ ޢަރަބިއްޔާ ސްކޫލުގެ އައު ޢިމާރާތުގެ މަސައްކަތް ނުފެށި ލަސްވެފައިވާތީ އަނެއްކާވެސް އެސްކޫލުގެ ބެލެނިވެރިން އިހުތިޖާޖުކުރަން ފަށައިފިއެވެ.
މިއަދު ބައެއް ބެލެނިވެރިންވަނީ އަފރަބިއްޔާގެ އައު އިމާރާތް ހަދަން ހަމަޖެހިފައިވާ ބާޖަމާލުއްދީން ސަރަޙައްދަށް އެއްވެ ޝުޢޫރު ފާޅުކޮށްފައެވެ. އެމީހުން ބުނީ ޢަރަބިއްޔާގެ ބިންގާ އަދިވެސް ނޭޅޭކަމަށާ، 18 މަސްދުވަހުން ނިންމަން ބުނިތައް އެމުއްދަތު ފާއިތުވެ އެތައް ދުވަހެއްވީހިރުވެސް ނުވެސް ފެށޭކަމަށެވެ. އަދި 2 މަހުން ބާޖަމާލުއްދީން ބިން ހުސްކުރަން ވަޢުދުވެފައި ވެސް 7 މަސް ވީއިރު ވެސް ތަން ސާފުވެސް ނުކުރެވުނުކަމަށް ބެލެނިވެރިން ބުންޏެވެ.
އަދި އިންތިޚާބު ކައިރިވީމަ ވޯޓު ހޯދަން ބިންގާ އަޅުއްވަން މަޑުކުރަނީތޯ ސުވާލު އުފެދޭކަމަށާ، މިކަން ސިޔާސީ ނުކުރުމަށް މިއަދު އަރަބިއްޔާގެ ބެލެނިވެރިންވަނީ ގޮވާލާފައި އަޑުއުފުލާފައެވެ.
ޢަރަބިއްޔާގެ ބިންގާ އަދިވެސް ނޭޅޭ. 18 މަސްދުވަހުން ނިންމަން ބުނި. އެކަމަކު 2 މަހުން ބާޖަމާލުއްދީން ބިން ހުސްކުރަން ވަޢުދުވެފައި ވެސް 7 މަސް ވީއިރު ވެސް ތަން ސާފު ނުކުރެވުނު.
އިންތިޚާބު ކައިރިވީމަ ވޯޓު ހޯދަން ބިންގާ އަޅުއްވަން މަޑުކުރަނީތޯ ސުވާލު އުފެދޭ.
މިކަން ސިޔާސީ ނުކުރައްވާ. pic.twitter.com/9jCuLhmKyC— Arabiyya Family (@ArabiyyaFamily) February 19, 2023
އަރަބިއްޔާ ސްކޫލު އިމާރާތް ކުރުމަށް ބާޖަމާލުއްދީން ބިން ރައީސް އިބްރާހީމް މުޙައްމަދު ޞާލިޙް ހަމަޖެއްސެވީ 2021ވަނަ އަހަރުގެ ޑިސެމްބަރު މަހުގެ 20ވަނަ ދުވަހުއެވެ. އެއީ އެދުވަހު އަރަބިއްޔާގެ ބެލެނިވެރިންނާ ރައީސް އޮފީހުގައި ބައްދަލުކުރެއްވުމަށްފަހުއެވެ. އަރަބިއްޔާ ސްކޫލް އައު އިމާރާތުގެ މަސައްކަތާއި، ޖަމާލުއްދީން ސްކޫލް އެނެކްސް އިމާރާތުގެ ޑިޒައިން އެންޑް ބިލްޓްގެ މަސައްކަތް އެޑިއުކޭޝަން މިނިސްޓްރީން ބަޔަކާ ހަވާލުކުރީ، ޖެހިގެން އައި 2022ވަނަ އަހަރުގެ ސެޕްޓެމްބަރުމަހުގެ 29ވަނަ ދުވަހުއެވެ.
އެހެންނަމަވެސް މިއަދާހަމައަށްވެސް އެ މަސައްކަތް ފެށިފައެއް ނުވެއެވެ. މަސައްކަތް ހަވާލުކޮށްފައިވަނީ އަމީން ކޮންސްޓްރަކްޝަން ޕްރައިވެޓް ލިމިޓެޑާއެވެ.
މިއަހަރުގެ ޕީއެސްއައިޕީގެ ދަށުން ކުރިއަށް ގެންދާ މި ދެ އިމާރާތުގެ މަސައްކަތަށް އެކުންފުނިން ހުށަހަޅާފައިވަނީ 168،525،150.92އެވެ. މިދެއިމާރާތުގެ މަސައްކަތް 420 ދުވަހުގެ ތެރޭގައި ނިންމަންޖެހެއެވެ.
އަރަބިއްޔާ ސްކޫލްގެ އައު އިމާރާތް ހަދަން ހަމަޖެހިފައިވާ ބިމުގައި ހުރި ބައު ޖަމާލުއްދީން ސްކޫލް ތަޅާ ސާފުކުރުމުގެ މަސައްކަތް 2022ވަނަ އަހަރުގެ އޮކްޓޫބަރުމަހުގެ 14 އަށް އެއްކޮށް ނިންމާ އެޑިއުކޭޝަން މިނިސްޓްރީއާ ހަވާލުކުރެވޭނެ ކަމަށް އެމިނިސްޓްރީން ކުރިން އޮތީ ވިދާޅުވެފައެވެ.
