ރިޔާސީ އިންތިޚާބަށް ކޯލިޝަން ހެދުމުގެ ބާރު ރައީސަށް ދީފި

ކުރިޔަށް އޮތް ރިޔާސީ އިންތިޚާބު އެމްޑީޕީއަށް ކާމިޔާބު ކޮށްދިނުމަށްޓަކާ، ސިޔާސީ ލީޑަރުންނާއި އަދި ސިޔާސީ ޕާޓީތަކާއި ކުރާންޖެހޭ މަޝްވަރާތަކެއް ކުރިޔަށް ގެންދިއުމުގެ ހުރިހާ ބާރެއް، އެމްޑީޕީގެ އެންމެ އިސް ލީޑަރު، ރައީސް އިބުރާހިމް މުހައްމަދު ސާލިހަށް ދިނުމަށް، އެޕާޓީގެ ގައުމީ މަޖިލިހުން ނިންމައިފިއެވެ.

ކޯލިޝަން ހެދުމަށް ކުރާންޖެހޭ އެންމެހާ މަސައްކަތްތަކެއް ކުރުމުގެ ހުރިހާ ބާރެއް ރައީސް ސާލިހަށް ދިނުމަށް، ރޭއް ބޭއްވުމުން އެމްޑީޕީގެ ގައުމީ މަޖިލީހަށް ހުށެހެޅުނު ގަރާރު ގައުމީ މަޖިލީހުން ފާސް ކޮށްފައިވަނީ ހާޒިރުވި 85 މެމްބަރުންގެ ތެރެއިން 81 މެމްބަރުންގެ ވޯޓުންނެވެ.

އެމްޑީޕީގެ ގައުމީ މަޖިލީހުގައި 140 އަށް ވުރެ ގިނަ މެމްބަރުން ތިއްބަވާއިރު، ރޭ ބޭއްވުނު ބައްދަލުވުމުގައި އެ ޕާޓީގެ ރައީސް ނަޝީދަށް ތާއީދުކުރާ މެމްބަރުން ބައިވެރިވެފައެއް ނުވެއެވެ.

ކޯލިޝަން ހެދުމުގެ ބާރު ރައީސަށް ދިނުމަށް ގައުމީ މަޖިލިހަށް ގަރާރު ހުށަހެޅުއްވީ ކިނބިދޫ ދާއިރާގެ މެމްބަރު މުހައްމަދު ނާޝިޒްއެވެ.

އޭނާގެ ގަރާރުގައި ބުނެފައިވަނީ އެމްޑީޕީގެ ރިޔާސީ ޓިކެޓް ރައީސް ސާލިހާއި ހަވާލުކުރަން އެޕާޓީގެ ޕްރައިމަރީން މެމްބަރުން ނިންމާފައި ވާކަމަށާއި، އެހެންކަމުން ރިޔާސީ އިންތިހާބު ނިމުމާ ހަމައަށް އެ ޕާޓީގެ އެންމެ އިސް ފަރާތަކަށް ވާނީ ރިޔާސީ ކެންޑިޑޭޓު ކަމަށް އަސާސީ ގަވައިދުގެ 59 ވަނަ މާއްދާގެ (ނ) ގައި ކަނޑައަޅާފައިވާ ކަމަށެވެ.

އެހެންކަމުން، ޕާޓީގެ ގައުމީ މަޖިލީހާއި، ގައުމީ ހިންގާ ކޮމިޓީއާއި އަދި ޕާލަމެންޓްރީ ގުރޫޕުގެ ލަފާގެމަތިން، ޕާޓީގެ ސިޔާސަތުތައް ތަންފީޒު ކުރަމުން ދިއުމަކީ ޕާޓީގެ އެންމެ އިސްފަރާތުގެ މަސްއޫލިއްޔަތެއް ކަމުގައިވެސް ނާޝިޒު ހުށަހެޅުއްވި ގަރާރުގައި ބުނެފައި ވެއެވެ.

މިގޮތުން ފާއިތުވެދިޔަ އިންތިޚާބުތަކުގައިވެސް އިއްތިހާދު ނުވެ އެމްީޕީއަށް އެކަށީގެންވާ ނަތީޖާއެއް ނެރެވިފައި ނުވާކަމަށް ބުނެ، ފާސްކުރި ގަރާރުގައި ވަނީ ރިޔާސީ އިންތިޚާބަށް އިއްތިހާދުވުމުގެ ހުރިހާ މަޝްވަރާއެއް ކުރިއަށް ގެންދިއުމުގެ ބާރު ރައީސަށް ދިނުމަށް ނިންމާފައެވެ.

ރިޔާސީ އިންތިޚާބަށް ކޯލިޝަން ހެދުމުގެ ބާރު ރައީސަށް ދީފައިވާއިރު، އަދި މިހަފްތާގެ ހުކުރު ދުވަހުގެ ރޭ، އެމްޑީޕީގެ ރިޔާސީ ޓިކެޓް ހަވާލު ކުރުމަށް އެޕާޓީން ހަމަޖައްސާފައި ވަނިކޮށް، ރިޔާސީ ޓިކެޓް ހަވާލުކުރުން ހުޓުވާ ދިނުމަށާއި، އަދި އެޕާޓީގެ ރިޔާސީ ޕްރައިމަރީ އަލުން ބާއްވާ ދިނުމުގެ ވަގުތީ އަމުރެއް ހޯދުމަށް، ޕޮލިސް ބޯޑުގައި ހިމެނިވަޑައިގަންނަވާ، އަދި އެމްޑީޕީގެ ކުރީގެ އިންޓަރނޭޝަނަލް ސްޕޯލްސްޕާރސަން ހާމިދު އަބުދުލް އަފޫލު ވަނީ ސިވިލް ކޯޓަށް މައްސަލަ ހުށަހަޅުއްވާފައެވެ.

މި މައްސަލާގައި ހާމިދުގެ ވަކީލެއްގެ ގޮތުގައި ކޯޓަށް ވަޑައިގަތުމަށް ހަމަޖެހިފައިވަނީ، ނަޝީދުގެ ދައުރުގައި ބަންޑާރަނައިބުކަން ކުރެއްވި ދިޔާނާ ސައީދެވެ. ދިޔާނާއަކީ މީގެކުރިން ނަޝީދަށް ފާޑުވިދާޅުވެފައިވާ ބޭފުޅެއް ނަމަވެސް، ފާއިތުވެދިޔަ ރިޔާސީ ޕްރައިމަރީގައި ނަޝީދަށް ތާއީދު ކުރައްވާ، ޕްރައިމަރީ ކެމްޕޭންގައިވެސް ނަޝީދު އަރުހުގައި، ކެމްޕޭނަށް އައްޑޫއަށް ވަޑައިގެންނެވި ބޭފުޅެކެވެ.

ހާމިދު ސިވިލް ކޯޓަށް މައްސަލަ ހުށަހެޅުއްވީ، ޕާޓީން ވަކިކުރި މެމްބަރުންގެ ވޯޓު ލުމުގެ ހައްގު ގެއްލޭގޮތަށް ބޭއްވި ޕްރައިމަރީއަކީ ސައްޙަ އިންތިޚާބެއް ނޫންކަމަށް ކަނޑައަޅާދީ، އެ މެމްބަރުން ހިމަނައިގެން އަލުން ރިޔާސީ ޕްރައިމަރީ ބާއްވާދިނުމަށް ކޯޓުން އެމްޑީޕީގެ މައްޗަށް އަމުރު ކޮށްދިނުމަށެވެ. އޭގެ އިތުރުން، ރިޔާސީ ޕްރައިމަރީއާއި ގުޅިގެން ކޯޓުން ވަކި ގޮތެއް ނިންމުމުގެ ކުރިން ރައީސް ސާލިހާއި އެޕާޓީން ރިޔާސީ ޓިކެޓް ހަވާލުކޮށްފާނެތީ، ރިޔާސީ ޓިކެޓް ހަވާލުކުރުން ހުއްޓުވައިދިނުމުގެ ވަގުތީ އަމުރެއްވެސް ކޯޓުން ނެރެ ދިނުމަށް ހާމިދު އެދިފައި ވެއެވެ.

ފާއިތުވެދިޔަ މަހުގެ 28 ވަނަ ދުވަހު ބޭއްވުނު ރިޔާސީ ޕްރައިމަރީ ރައީސް ސާލިހު ކާމިޔާބު ކުރެއްވީ 61 އިންސައްތައިގެ ބޮޑު އަޢުލަބިއްޔަތަކުންނެވެ. ޕްރައިމަރީގެ އިންތިޚާބުގައި ބަލިވި، އެ ޕާޓީގެ ރައީސް މުހައްމަދު ނަޝީދަށް ލިބިވަޑައިގެންނެވީ އެންމެ 39 އިންސައްތަ ވޯޓެވެ.