ދިވެހިރާއްޖޭގެ ޝަރުޢީ ދާއިރާ މިހާރު މަސައްކަތް ކުރަމުންދަނީ މިނިވަންކަމާ ފުރިހަމަ މުސްތަގިއްލުކަމާއެކު ކަމަށް ރައީސުލްޖުމްހޫރިއްޔާ އިބުރާހިމު މުހައްމަދު ސާލިހު ވިދާޅުވެއްޖެއެވެ.

ރައީސް ސާލިހު މިހެން ވިދާޅުވީ ޖުޑީޝަލް އަހަރު ފެށުމަށް ދަރުބާރުގޭގައި ރޭ ބޭއްވި ޖަލްސާގައި ވާހަކަ ދައްކަވަމުންނެވެ.

މިޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، ޝަރުއީ ދާއިރާ މިނިވަންކަމާއި އަދި މުސްތަގިއްލުކަމާއެކު ހިނގަން ފެށުމާއެކު، ފަނޑިޔާރުންގެ ނިންމުންތަކާމެދު ރައްޔިތުންގެ ހިތްތަކުގައި މިހާރު އަންނަނީ އިތުބާރު އުފެދެމުން ކަމުގައެވެ. އަދި އެމަނިކްފާނު ވިދާޅުވީ ފަނޑިޔާރުން ކަން ކުރާންވީ ގޮތާއި ނުކުރާންވީ ގޮތް ބުނެދޭންޖެހޭ އެހެން ބަޔަކު ނުތިބޭނެކަމަށެވެ. އެގޮތުން ރާއްޖޭގެ ފަނޑިޔާރުގޭގެ މައްޗަށް ދިވެހިންގެ ހިތްތަކުގައި ކުރިން އޮތް ނުރަގަޅު ތަސައްވުރު މިހާރު މަޑުމަޑުން ރަގަޅުވަމުން އަންނަކަމަށް ފާހަގަ ކުރައްވަމުން ރައީސް ސާލިހު ވިދާޅުވީ ފަނޑިޔާރުންގެ ނިންމުންތަކާމެދު ރައްޔިތުންގެ ހިތްތަކުގައި އިތުބާރު އުފެއްދުމަކީ ސަރުކާރުގެ ސްޓެރަޓީޖިކް އެކްޝަން ޕްލޭންގެ ވަރަށް މުހިންމު އަމާޒެއް ކަމުގައެވެ.

ފަނޑިޔާރުގެއާމެދު ރައްޔިތުންގެ ހިތްތަކުގައި އިތުބާރު އުފެދެނީ އަދުލަށް ހުކުމް ކުރުމުން. އަދި އެ ހުކުމަކީ ކަމުގެ މުވާލާތް ނުކެނޑެނީސް، ނުވަތަ ވަގުތު ފާއިތުވުމުގެ ކުރިން އިއްވާ ހުކުމަކަށްވެސް ވާންޖެހޭ.

ރޭގެ ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވުއެވެ.

ރޭ ދަރުބާރުގޭގައި ބޭއްވުނު ޖަލްސާގައި އިތުރަށް ވާހަކަ ދައްކަވަމުން ރައީސް ސާލިހު ވިދާޅުވީ ފަނޑިޔާރުގޭގެ ޒިންމާ އަކީ އަނިޔާއިން އެއްކިބާވެ އަދުލަށް ނިޔާ ކަނޑައަޅާ، ރައްޔިތުންގެ ހައްގުތައް ހޯދާދިނުން ކަމަށެވެ. އަދި އެ ޒިންމާ އަދާކުރެވޭނީ، ޤާނޫނުގެ ވެރިކަން ދެމެހެއްޓުމަކީ ފަނޑިޔާރުންގެ އެންމެ އިސް އަމާޒު ކަމުގައި ހަދައިގެން ކަމުގައިވެސް ރައީސް ވިދާޅުވިއެވެ.

ރައީސް ސާލިހު ވިދާޅުވ ީމިހާތަނަށްވެސް ރައްޔިތުންގެ ޝަކުވާ އަކީ ކޯޓުތަކުން މައްސަލަތައް ލަސްވުން ކަމަށާއި، އެ ޝަކުވާއަށް ހޯދުނު އެއް ހައްލަކީ އޮންލައިންކޮށް ޝަރީއަތް ކުރެވޭނެ ނިޒާމް ރާއްޖޭގެ ކޯޓުތަކުގައި ޤާއިމްކޮށް ނިންމުން ކަމުގައެވެ.

އިތުރަށް ވާހަކަ ދައްކަވަމުން، ޝަރުޢީ ދާއިރާގެ ކުރިއެރުމަށް ޤާނޫނީ އޮނިގަނޑުގެ ތެރެއިން ގެންނަވާ މުހިންމު ބައެއް ބަދަލުތަކަށް އިޝާރާތްކުރައްވައި ރައީސުލްޖުމްހޫރިއްޔާ ވަނީ ރާއްޖޭގެ އެކި ސަރަޙައްދުތަކުގައި ޑިސްޓްރިކްޓް ކޯޓުތަކެއް އުފެއްދުމަށް ކޯޓުތަކުގެ ޤާނޫނަށް މިހާރު ހުށަހަޅާފައިވާ އިޞްލާޙާއި ރާއްޖޭގެ ޝަރުޢީ ދާއިރާއަށް މުޅިން އަލަށް ސަރކިޓް ކޯޓުގެ ނިޒާމު ތަޢާރަފްކުރުމަށާއި އިންޓަރގްރޭޓެޑް ކޭސް މެނޭޖްމަންޓް ސިސްޓަމެއް ކޯޓުތަކުގައި ޤާއިމުކޮށް ނިންމުމަށް ކުރިޔަށްދާ މަސައްކަތް ފަދަ މުހިންމު މަސައްކަތްތަކާއި ކޯޓުތަކުގެ ޢުމްރާނީ ތަރައްޤީއަށް ކުރެވިފައިވާ އަދި ކުރިޔަށްގެންދާ މުހިންމު ބައެއް މަޝްރޫޢުތައް ފާހަގަކުރައްވާފައެވެ.

މި ރަސްމިއްޔާތުގައި ރައީސުލްޖުމްހޫރިއްޔާ ވަނީ، ޝަރުޢީ ދާއިރާގައި 35 އަހަރަށްވުރެ ދިގުމުއްދަތެއްގައި ޚިދުމަތްކުރެއްވި ފަރާތްތަކަށް އެބޭފުޅުންގެ ޚިދުމަތުގެ އަގުވަޒަންކުރުމުގެ ގޮތުން ދެއްވި ފިލާ އެފަރާތްތަކާ ހަވާލުކޮށްދެއްވާފައެވެ.

މި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި އުއްތަމަ ފަނޑިޔާރު އޮނަރަބްލް އަލްއުސްތާޛު އަޙްމަދު މުޢްތަޞިމް ޢަދުނާނުގެ އިތުރުން ވަޒީރުންނާއި ސަރުކާރާއި ދަޢުލަތުގެ އެކި އިދާރާތަކުގެ އިސްވެރިންނާއި ޝަރުޢީ ދާއިރާގެ އިސްބޭފުޅުން ބައިވެރިވެވަޑައިގެންނެވިއެވެ.