މިއަދު އޮތް ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރިޔާސީ ބަޔާން އިއްވެވުމާ ދެކޮޅަށް އިހްތިޖާޖުކުރި އިދިކޮޅު މެމްބަރުން މަޖިލީހުގެ ތަޅުމުން ނެރެން އަންގެން ސެކިއުރިޓީން އުޅުނު މައްސަލާގައި މަޝްހޫރު ދީނީ ޢިލްމުވެރިޔާ ޢަލީ ޒައިދު ކަންބޮޑުވުން ފާޅުކުރައްވައިފިއެވެ.
ޒައިދަކީ ރައިސް ޞާލިޙަށް ވަރަށްބޮޑަށް ތާއީދުކުރައްވާ ބޭފުޅެކެވެ. މިއަދުގެ ޙާދިސާއާ ގުޅިގެން ޒައިދު ކުރެއްވި ޓްވީޓެއްގައިވަނީ ރިޔާސީ ބަޔާން ހުށައެޅުމާ ދެކޮޅުހެދުމަކީ އެމީހަކު އެވަގުތަށް މަޖިލިސް ހޯލުން ނެރެންވާނެ ކަމެއްކަމަށެވެ. އެހެން ނަމަވެސް ބޮޑު ސިންގާ ފިރިހެނަކު ބާރުގެދަށަށްގެންނަން ދެ އަންހެން ކަނބަލުން މިއުޅުއްވަނީ ކީއްވެތޯ ޒައިދު ސުވާލު އުފައްދަވާފައިވެއެވެ. އެކަމާ އިސްނަގައި އެކަން ކުރަންވާނީ ފިރިހެނުން ނޫންތޯއާއި މީ ބަލަން ވަރަށް ހުތުރު މަންޒަރެއްކަމަށް ޒައިދު ވިދާޅުވެފައިވެއެވެ.
ރިޔާސީ ބަޔާން ހުށައެޅުމާ ދެކޮޅުހެދުމަކީ އެމީހަކު އެވަގުތަށް މަޖިލިސް ހޯލުން ނެރެންވާނެ ކަމެއް! ނަމަވެސް ކީއްވެތޯ ބޮޑު ސިންގާ ފިރިހެނަކު ބާރުގެދަށަށްގެންނަން ދެ އަންހެން ކަނބަލުން މިއުޅުއްވަނީ؟ އެކަމާ އިސްނަގައި އެކަން ކުރަންވާނީ ފިރިހެނުން ނޫންތޯ! މީ ބަލަން ވ ހުތުރު މަންޒަރެއް! https://t.co/4hJFpg0c07
— Ali Zaid (@alizaid1000) February 6, 2023
ރައީސް ޞާލިޙާ ދެކޮޅަށް މުޒާހަރާ ކުރާ އިދިކޮޅު މީހުން މިއަދުގެ ރައްޔިތުންގެ މަޖިލީހުގެ ޖަލްސާ ފެށުނުއިރު މަޖީލީހުގެ ބޭރުގައި މުޒާހަރާކުރަމުންދިޔައެވެ. އަދި އިދިކޮޅު މަޖިލިސް މެމްބަރުން ދިޔައީ މަޖިލީހުގެ އެތެރޭގައި އިހްތިޖާޖުކުރަމުންނެވެ. އެއާއެކު ރިޔާސީ ބަޔާން އިއްވަވަން ދަތިފުޅުވެ މަޖިލީހުގެ ޖަލްސާ ހުއްޓާވެސްލިއެވެ. އަލުން ޖަލްސާ ފެށީ އިދިކޮޅު މެމްބަރުން މަޖިލީހުގެ ތަޅުމުން ނެރެފައެވެ. ގަދަކަމުން މެމްބަރުން ނެރެން އުޅުމުގެ ތެރޭގައި ބައެއް މެމްބަރުންނަށް އަނިޔާވެފައިވާކަމަށް ޕީޕީއެމްއިން ބުނެއެވެ.
