ކުރިޔަށް އޮތް ރިޔާސީ އިންތިޚާބުގައި ވާދަ ކުރައްވާނޭކަން އިއުލާންކޮށް، އަދި މިހާރު ރިޔާސީ ކެމްޕޭންވެސް ލޯނޗު ކުރައްވާފައިވާ، ކުރީގެ ހޯމް މިނިސްޓަރު އުމަރު ނަސީރު، އޭނާގެ ވެރިކަން ނިންމަވާނީ ސުވަރުގެ ދެވޭވަރަށް ވެރިކަން ކުރެއްވުމަށްފަހު ކަމުގައި ވިދާޅުވެއްޖެއެވެ.

އުމަރުގެ "އާ މިސްރާބަކަށް، އުމަރު 2023″ ރިޔާސީ ކެމްޕޭން ލޯނޗު ކުރުމަށް ރޭ ސަލްޓަން ޕާކުގައި ސަޕޯޓަރުންނާއެކު ބޭއްވި ޖަލްސާގައި، ރިޔާސީ ވައުދުތައް އިއުލާން ކުރައްވަމުން އުމަރު ވިދާޅުވީ އޭނާގެ ވެރިކަމެއްގައި އިސްލާމް ދީން އަދާ ކުރަމުންދާ ރޯލު މުޅިން އެހެން ހަރުފަތަކަށް އުފުލާލާނެ ކަމުގައެވެ.

މިގޮތުން އޭނާގެ ވެރިކަމުގައި އިސްލާމީ އުސޫލުތަކާއި އިސްލާމީ ޝަރީއާގެ ހަމަތައް ވެގެން ދާނީ ދަައުލަތުގެ އެންމެ މަތީ އުންސުރަށް ކަމުގައެވެ.

ދިވެހި ދައުލަތް ހިންގާނީ އިސްލާމީ ވެރިއެއް. އޭނަ ދޮގެއް ނަހަދާނެ. އޭނަ ރަލެއް ނުބޯނެ. އޭނަ ވައްކަމެއް ނުކުރާނެ. އޭނަ ޝަހުވަތުގެ ފަހަތަކުން ނުދުވާނެ. އެއީ އިސްލާމީ ވެރިއެއްގެ ގައިގަ ހުންނަންޖެހޭ ސިފައަކީ. ﷲ އިރާދަ ކުރެއްވިޔާމު ތިބޭފުޅުންނަށް އެ ސިފަތައް އަޅުގަޑު ކިބައިން ދައްކާނަން.

ރޭގެ ރިޔާސީ ކެމްޕޭން ލޯނޗިން ޖަލްސާގައި ވާހަކަ ދައްކަވަމުން އުމަރު ވިދާޅުވިއެވެ.

ރޭގެ ޖަލްސާގައި އިތުރަސް ވާހަކަ ދައްކަވަމުން އުމަރު ވިދާޅުވީ އޭނާގެ ވެރިކަމުގައި އަދުލުވެރިކަން އޮންނާނޭ ކަމުގައެވެ. މިގޮތުން އުމަރު ވިދާޅުވީ ފްލެޓް ލިބޭނީ އެންމެ ހައްގު މީހާއަށް ކަމަށާއި، ވަޒީފާ ލިބޭނީ އެންމެ ގާބިލް މީހާއަށް ކަމަށެވެ. އަދި ވިދާޅުވީ މީހުން މެރުމާއި، ރޭޕް ކުރުމާއި މަސްތުވާ އެއްޗެހި އެތެރެކޮށް ކޮރަޕްޝަން ހިންގާ މީހުންނާ ދޭތެރޭ އިސްލާމީ ޝަރީއަތުގަ ހުރި ހުކުމްތައް ގާއިމް ކުރާނެ ކަމުގައެވެ.

އުމަރު ވިދާޅުވީ ގުރުއާނަކީ މިހާރު ހަމައެކަނި މިސްކިތްތަކުގައި ރީތިކޮށް ކިޔަވާ އެއްޗަކަށް ވެއްޖެ ކަމަށާއި، ގުރުއާނަށް އަމަލު ކުރަމުން ނުދާ ކަމުގައެވެ. އަދި ވިދާޅުވީ އޭނާ އިސްލާމީ ޝަރީއަތުގައި ހިފާ، އަމަލު ކުރަމުން ދާނީ ގުރުއާންގައި އަންގަވާފަ އޮތް ގޮތަށް ކަމަށެވެ. އަދި ވިދާޅުވީ ވެރިކަން ކޮށްފައި ދާނީ ސުވަރުގެއަށް ދެވޭވަރަށް ވެރިކަން ކޮށްފަ ކަމުގައެވެ.

މަހުޝަރުގެ ބިމުގައި އަޅުގަޑު ހުރެ ޖަވާބުދާރީވާން ޖެހޭނެކަން މިއަދުވެސް އަޅުގަޑު ހަނދާން ކުރަމުން މިވާހަކަ މި ދަންނަވަނީ، އަދި ﷲގެ ވާގިފުޅާއެކުގާ އެދުވަހުވެސް އަޅުގަޑު ހަނދާން ކުރާނަން. ވެރިކަން ކޮށްފާ އިރާދަކުރެއްވިޔާ އަޅުގަޑު ދާނީ ސުވަރުގެއަށް ދެވޭވަރަށް ވެރިކަން ކޮށްފަ ދާނީ.

ވެރިކަން ކުރައްވާނީ ސުވަރުގެ ދެވޭ ފެންވަރަށް ކަމުގައި ވިދާޅުވަމުން، ރޭގެ ޖަލްސާގައި އުމަރު ވިދާޅުވިއެވެ.

އުމަރުގެ "އާ މިސްރާބަކަށް، އުމަރު 2023″ ރިޔާސީ ކެމްޕޭން ލޯނޗު ކުރުމަށް، ސަޕޯޓަރުންނާއެކު ރޭ ބޭއްވި ޖަލްސާގައި ވާހަކަ ދައްކަވަމުން އުމަރު ވިދާޅުވީ އޭނާގެ ވެރިކަމެއްގައި ރާއްޖެއަށް ބޮޑު 50 ބަދަލެއް ގެނެސް ދެއްވާނެކަމުގައެވެ. އޭގެ ތެރެއިން ރޭގެ ޖަލްސާގައި އޭނާ އިއުލާން ކުރައްވާފައިވަނީ 25 ވަރަކަށް ބަދަލެވެ.