އުމަރު ނަސީރުގެ ވެރިކަމެއްގައި ނޫސް ރިޕޯޓަރަކަށް ވެވޭވޭނީ ދޮގު ނުހަދަން ހުވައެއް ކުރުމަށްފަހު ކަމުގައި އޭނާ ވިދާޅުވެއްޖެއެވެ.

އުމަރުގެ "އާ މިސްރާބަކަށް، އުމަރު 2023″ ރިޔާސީ ކެމްޕޭން ލޯނޗު ކުރުމަށް ރޭ ސަލްޓަން ޕާކުގައި ސަޕޯޓަރުންނާއެކު ބޭއްވި ޖަލްސާގައި، ރިޔާސީ ވައުދުތައް އިއުލާން ކުރައްވަމުން އުމަރު ވިދާޅުވީ ފްރީޑަމް އޮފް ސްޕީޗަށް ހުރަސް އަޅަމުންދާ ކަމަށް ބުނިނަމަވެސް އެކަމަށް ފަރުވާލެއް ނުބަހައްޓަވާނެ ކަމަށާއި، އެ މިންގަޑު އޭނާގެ ވެރިކަމެއްގައި ހިފަހައްޓަން ޖެހޭނީ އިންސާލާމް ދީނުގައި ފްރީޑަމް ސްޕީޗް ހިފެހެއްޓިފައި އޮތް މިންގަޑުގައި ކަމުގައެވެ.

ފްރީޑަމް އޮފް ސްޕީޗަށް ހުރަސް އެޅިއޭ ބުންޏަސް އަޅުގަޑަށް ހެޔޮ. އިސްލާމީ ޝަރީއަތުގައި ފްރީޑަމް އޮފް ސްޕީޗް ހިފެހެއްޓިފަ އޮތް މިންގަޑުގެ ތެރޭގަ އޭތި ހިފެހެއްޓޭނީ. މީހުންގެ އަބުރަކާ ނުބެހެވޭނެ. ދޮގެއް ނެހެދޭނެ. ހިތުހުރި އެއްޗެއް ނުބުނެވޭނެ، އޭތި ވެރިފައި ނުކޮށެއް. އެއީ އިސްލާމްދީން ގޮވާލާ ގޮތަކީ، އިނގޭތޯ.

އުމަރު ވިދާޅުވިއެވެ.

މިޖަލްސާގައި ވާހަކަ ދައްކަވަމުން އުމަރު އިތުރަށް ވިދާޅުވީ ފްރީޑަމް އޮފް ސްޕީޗުގެ މިންގަޑު އޮތީ އިސްލާމް ދީނުގައި ކަނޑައަޅާފައި ކަމަށާއި، ހިތުހުރި އެއްޗެއް ހިތުހުރި ގަޑިއެއްގައި ހިތުހުރި ގޮތަކަށް ބުނާކަށް ނުޖެހޭ ކަމުގައެވެ.

އަޅުގަޑުމެންގެ ރިޕޯޓަރުންވެސް އެދަނީ ހަމަ އެގޮތަށް ހަދަމުން. އަޅުގަޑުގެ ވެރިކަމެއްގެ ރިޕޯޓަރުންނަކީ ހުވައެއް ކޮށްގެން ތިބޭ ބަޔަކަށް އަޅުގަޑު ހަދާނަން. ދޮގު ނަހަދާން ހުވާ ކޮށްގެން ތިބޭ ބަޔަކަށް.

އުމަރުގެ ވެރިކަމުގައި ނިއުސް ރިޕޯޓަރަކަށް ވެވޭނީ ޚާއްސަ ހުވައެއް ކޮށްގެންކަން ހާމަ ކުރައްވަމުން އުމަރު ވިދާޅުވިއެވެ.

އުމަރުގެ "އާ މިސްރާބަކަށް، އުމަރު 2023″ ރިޔާސީ ކެމްޕޭން ލޯނޗު ކުރުމަށް، ސަޕޯޓަރުންނާއެކު ރޭ ބޭއްވި ޖަލްސާގައި ވާހަކަ ދައްކަވަމުން އުމަރު ވިދާޅުވީ އޭނާގެ ވެރިކަމެއްގައި ރާއްޖެއަށް ބޮޑު 50 ބަދަލެއް ގެނެސް ދެއްވާނެކަމުގައެވެ. އޭގެ ތެރެއިން ރޭގެ ޖަލްސާގައި އޭނާ އިއުލާން ކުރައްވާފައިވަނީ 25 ވަރަކަށް ބަދަލެވެ.